প্ৰধান মন্ত্ৰীৰ কাৰ্য্যালয়ে ভাৰতৰ ৰাষ্ট্ৰীয় ঘাইপথ প্ৰাধিকৰণৰ কেইটামান পৰামৰ্শৰ তালিকাসহ ৰাষ্ট্ৰীয় ঘাইপথ মন্ত্ৰ্যালয়লৈ প্ৰেৰণ কৰা এখন পত্ৰই দেশৰ বিত্তীয় অৱস্থাটোৰ মন্দামুখী ৰূপটো প্ৰকট কৰি তুলিছে।
প্ৰধান মন্ত্ৰীৰ প্ৰধান সচিব নৃপেন্দ্ৰ মিশ্ৰই যোৱা ১৭ আগষ্টতে প্ৰেৰণ কৰা পত্ৰখনৰ বিষয়বস্তুৱে ৰাষ্ট্ৰীয় সংবাদ মাধ্যমতো গুৰুত্বসহ ঠাই পাইছে।
পত্ৰখনত প্ৰধান মন্ত্ৰীৰ কাৰ্য্যালয়ে ৰাষ্ট্ৰীয় ঘাইপথ প্ৰাধিকৰণৰ পৰা পোৱা বুলি কৈ কেইবাটাও সংস্কাৰমূলক পৰামৰ্শ বিবেচনাৰ বাবে আগ বঢ়াই দিছে ৰাষ্ট্ৰীয় ঘাইপথ মন্ত্ৰ্যালয়ক।
ইয়াৰ ভিতৰত পথ নিৰ্মাণৰ কাম বন্ধ কৰাৰ পৰামৰ্শটো আৰু সম্পূৰ্ণ হোৱা ৰাষ্ট্ৰীয় পথবোৰক উপাৰ্জনৰ আহিলা কৰিবলৈ ব্যক্তিগত খণ্ডক গতাই দিয়াৰ পৰামৰ্শই বিতৰ্কৰ মাজেৰে চৰ্চাত আছে।
পত্ৰখনত পথ নিৰ্মাণৰ বাবে বেচৰকাৰী বিনিয়োগকাৰী আগ বাঢ়ি নহাটোকো আঙুলিয়াই দিয়া হৈছে।
“পথ নিৰ্মাণ বিত্তীয়ভাৱে অ-ধাৰণক্ষম হৈ পৰিছে। বেচৰকাৰী বিনিয়োগকাৰী আৰু নিৰ্মাণ কোম্পানিবোৰে নতুন পথ নিৰ্মাণৰ প্ৰকল্পবোৰৰ পৰা নিজকে আঁতৰাই আনিছে।” লাইভ মিণ্ট নামৰ নিউজ পৰ্টেলটোত পত্ৰখনৰ পৰা এই উদ্ধৃতি দিয়া হৈছে।
এইবোৰ সংকটৰ পৰা উদ্ধাৰ পাবলৈ ৰাষ্ট্ৰীয় ঘাইপথ প্ৰাধিকৰণক নিৰ্মাণ সংস্থাৰ পৰিৱৰ্তে সম্পদ ব্যৱস্থাপনা কোম্পানি (asset management company)-লৈ সলনি কৰাৰ পৰামৰ্শ দিয়া হৈছে, যিটোৰ পৰিণতি হিচাপে ই পথ নিৰ্মাণ বন্ধ কৰিব।
পৰামৰ্শবোৰত ইতিপূৰ্বে সম্পূৰ্ণ হোৱা পথবোৰক উপাৰ্জনৰ কামত জোৰদাৰভাৱে লগাবলৈও ইচ্ছা দাঙি ধৰা হৈছে, য’ত এইবোৰত পথকৰ বা টল (toll) বহুওৱাৰ বাবে ব্যক্তিগত কোম্পানিক নিলাম কৰাৰ দিহা দিয়া হৈছে।
এই ব্যক্তিগত কোম্পানিবোৰক ৰাষ্ট্ৰীয় ঘাইপথ প্ৰাধিকৰণলৈ আগ বঢ়োৱা অগ্ৰিম ৰাজহৰ বিনিময়ত ১০ বা ২০ বছৰৰ বাবে পথছোৱাত কৰ সংগ্ৰহৰ অনুমতি দিয়া হ’ব আৰু উক্ত সময়ছোৱাত কোম্পানিবোৰে পথছোৱা মেৰামতি কৰিব। পত্ৰখনত এইদৰে কোৱা হৈছে।
পৰামৰ্শত কোৱা হৈছে, বৰ্তমানৰ ৰাষ্ট্ৰীয় ঘাইপথ নিৰ্মাণৰ hybrid annuity আৰু EPC (Engineering, Procurement & Construction) আৰ্হি বহনক্ষম হৈ থকা নাই আৰু সেয়ে সংস্কাৰৰ প্ৰয়োজন।
এই পত্ৰখনে কেন্দ্ৰীয় চৰকাৰৰ বিত্তীয় অৱস্থাটো উদঙাই দিয়াৰ লগতে অসমৰ বাবে কঢ়িয়াই অনা প্ৰধান শংকাটো হ’ল অসমৰ অন্তৰ্গত অতি শোচনীয় ৰাষ্ট্ৰীয় ঘাইপথকেইটাৰ অৱস্থাৰ পৰিৱৰ্তনত সম্ভাৱনা ক্ষীণ হৈ পৰাটো।
ৰাজ্যখনৰ ভিতৰত পৰা কেইবাটাও ৰাষ্ট্ৰীয় পথ ব্যৱহাৰৰ অনুপযুক্ত হৈ পৰা সত্ত্বেও দৈনন্দিন চৰম যন্ত্ৰণা সহি যাত্ৰীয়ে এইবোৰ ব্যৱহাৰ কৰি থাকিব লগীয়া হৈছে।
শিলচৰ-সৌৰাষ্ট্ৰ ইষ্ট ৱেষ্ট কৰিডৰ ২৭ নং ৰাষ্ট্ৰীয় ঘাইপথৰ অন্তৰ্গত অসমৰ জাতিঙ্গা-হাৰাঙ্গাজাও অংশটো এতিয়াও আধৰুৱা আৰু বিধ্বস্ত ৰূপত আছে। গতিকে প্ৰধান মন্ত্ৰীৰ কাৰ্য্যালয়ৰ এই পত্ৰখনক উপেক্ষা কৰিব নোৱাৰিলে সমগ্ৰ দেশৰ লগতে অসমৰ ৰাইজেও ইয়াৰ পৰিণাম ভুগিব লগীয়া হ’ব।
লগতে পঢ়ক পথ নে পুখুৰী? এপাল ম’হে ঘুলি ল’লে অসমৰ ৰাষ্ট্ৰীয় ঘাইপথৰ গাঁতত
তাৰোপৰি ব্যক্তিগত কোম্পানিক ইচ্ছানুসৰি কৰ সংগ্ৰহৰ অনুমতি দি জনগণৰ ওপৰত মাধমাৰ শোধোৱাৰ পথ মুকলি হোৱাটোও নিশ্চিত। অসমত ৰহাৰ ট’ল গেইট পুনৰ সক্ৰিয় কৰিবলৈ অসম চৰকাৰে হেঁচা পাই থকাৰ কথা চৰকাৰৰ মন্ত্ৰী-বিধায়কৰ শেহতীয়া কেইবাটাও ভাষ্যত প্ৰকাশ পাই আহিছে।
মোদী চৰকাৰে এই বছৰ ঘোষণা কৰিছিল যে চৰকাৰখনে আন্তঃগাঁথনিত সৰ্বাধিক গুৰুত্ব দিব আৰু ইয়াৰ বাবে ৫ বছৰৰ কাৰ্য্যকালত প্ৰায় ১০০ লাখ কোটি টকা খৰচ কৰিব।
কিন্তু এতিয়া মন্দামুখী চৰকাৰৰ প্ৰধান মন্ত্ৰীৰ কাৰ্য্যালয়ৰ এই পত্ৰই ৰাষ্ট্ৰীয় ঘাইপথ প্ৰাধিকৰণক ঢাল-তৰোৱালবিহীন “নিধিৰাম চৰ্দাৰ”ত পৰিণত কৰাৰহে শংকা সৃষ্টি কৰিছে।
