প্ৰখ্যাত অৰ্থনীতিবিদ তথা নোবেল বিজয়ী অমৰ্ত্য সেনলৈ উচ্ছেদৰ জাননী জাৰি কৰিছে বিশ্ব ভাৰতীয়ে। অৰ্থনীতিবিদ গৰাকীৰ বিৰুদ্ধে জাৰি কৰা এই জাননীৰ বিৰোধিতাৰে আজি বংগত এক প্ৰতিবাদী সমদল বাহিৰ কৰে কেইবাগৰাকীও বুদ্ধিজীৱী আৰু স্থানীয় ৰাইজে।
প্ৰতিবাদী কাৰ্যসূচীত ৰবীন্দ্ৰনাথ ঠাকুৰৰ গীত পৰিৱেশন, গুৰুদেৱৰ প্ৰতিবাদী কবিতা আবৃত্তি আৰু তেওঁৰ দ্বাৰা ৰচিত নাটকৰ খণ্ড অভিনয়েৰে অমৰ্ত্য সেনলৈ সমৰ্থন আগবঢ়োৱা হয়।
নৱজাত ‘সমাজিক মৰ্যাদা সুৰক্ষা সমিতি’ৰ এই সমাৱেশত কেন্দ্ৰীয় বিশ্ববিদ্যালয়ৰ এই পদক্ষেপৰ প্ৰতিবাদত শান্তিনিকেতন আৰু কলকাতাৰ বুদ্ধিজীৱী আৰু স্থানীয় ৰাইজে অংশগ্ৰহণ কৰে।
বিশ্ব-ভাৰতী চৌহদৰ ‘শিক্ষা ভৱন’ৰ সমীপত পুৱা সমবেত হৈ প্ৰখ্যাত অৰ্থনীতিবিদগৰাকীলৈ সমৰ্থনৰ চিন স্বৰূপে সেনৰ বাসগৃহ ‘প্ৰতিচি’ৰ বাহিৰত মানৱ শৃংখল গঠন কৰি ৰবীন্দ্ৰ সংগীত পৰিৱেশনেৰে সমদল আগুৱাই নিয়া হয়।
বিশ্ব-ভাৰতীৰ প্ৰাক্তন শিক্ষক তথা সাহিত্যিক স্বপন কুমাৰ ঘোষৰ নেতৃত্বত এই সমাৱেশত কলকাতাৰ সুপৰিচিত চিকিৎসক তথা সমাজকৰ্মী অৰিন্দম বিশ্বাসেও অংশগ্ৰহণ কৰে।
প্ৰতিবাদী কাৰ্যসূচীৰ সময়ত বিশ্বাসে কয়, “অধ্যাপক অমৰ্ত্য সেনক নিৰন্তৰ অপমান তথা ছলনাৰ লগতে বিশ্ব ভাৰতী কৰ্তৃপক্ষই তেওঁক নীৰৱ কৰিবলৈ শাৰীৰিক আক্ৰমণৰ ভাবুকি দিয়াৰ বিৰুদ্ধে আমি প্ৰতিবাদ সাব্যস্ত কৰিছো।”
সেনৰ বিৰুদ্ধে এনে কাৰ্যক লৈ শংকিত হৈ পৰা বুলি উল্লেখ কৰি তেওঁ লগতে এনেধৰণৰ কৌশলৰ বিৰোধিতাৰে আজি ঘৃণাত ৰাজপথলৈ ওলাই আহিছো বুলিও মন্তব্য কৰে।
অমৰ্ত্য সেনৰ কণ্ঠ নীৰৱ কৰি ৰখাৰ উদ্দেশ্যেই এই ষড়যন্ত্ৰ ৰচা হৈছে বুলি অভিযোগ কৰি তেওঁ লগতে আজিৰ এই প্ৰতিবাদ সামাজিক প্ৰতিবাদৰ কণ্ঠস্বৰ প্ৰকাশ বুলিও উল্লেখ কৰে।
উল্লেখ্য যে, বিশ্ব ভাৰতীয়ে যোৱা ১৯ এপ্ৰিলত অৰ্থনীতিবিদগৰাকীক উচ্ছেদৰ জাননী জাৰি কৰি কেম্পাছৰ ০.১৩ একৰ মাটি “অবৈধভাৱে দখল” কৰাৰ অভিযোগ উত্থাপন কৰিছিল। লগতে তেওঁক ৬ মে’ৰ ভিতৰত ‘প্ৰতিচি’ৰ ১.৩৮ একৰ মাটিৰ অংশস্বৰূপ মাটি খালী কৰিবলৈ নিৰ্দেশ দিয়া হৈছিল।
কলিকতা উচ্চ ন্যায়ালয়ে অৱশ্যে এই নিৰ্দেশৰ বিৰুদ্ধে অন্তৱৰ্তীকালীন স্থগিতাদেশ দিছিল আৰু ১৫ মে’ত বীৰভূম জিলাত উক্ত গোচৰৰ শুনানিৰ দিন নিৰ্ধাৰণ কৰিছিল৷
ইফালে অমৰ্ত্য সেনে আদালতত আত্মপক্ষ সমৰ্থনত ১৯৪৩ চনৰ অক্টোবৰ মাহত তেতিয়াৰ বিশ্ব ভাৰতীৰ সাধাৰণ সম্পাদক ৰথিন্দ্ৰনাথ ঠাকুৰে সেনৰ পিতৃ আশুতোষ সেনক ৯৯ বছৰৰ বাবে লিজত দিয়া মাটিত ‘প্ৰতিচি’ নিৰ্মাণ কৰা হৈছিল বুলি জানিবলৈ দিয়ে।
