ধৰ্ষণকাৰীৰ হাতৰ পৰা এইবাৰ সাৰি যাব নোৱাৰিলে মানৱ সেৱাত নিয়োজিত খোদ মহিলা চিকিৎসকো।
কোভিড কোৱাৰেণ্টাইন চেণ্টাৰতে ধৰ্ষণৰ বলি হ’বলগীয়া হ’ল এগৰাকী মহিলা চিকিৎসক।
ঘটনাটো ঘটিছে তামিলনাডুত। তামিলনাডুৰ এখন হোটেলত স্থাপন কৰা কোভিড কোৱাৰেণ্টাইন চেণ্টাৰত আগষ্ট মাহতে ধৰ্ষণৰ বলি হৈছিল এগৰাকী মহিলা চিকিৎসক।
নিৰ্যাতিতা মহিলা চিকিৎসকগৰাকীয়ে আৰক্ষীক দিয়া অভিযোগ অনুসৰি মাজনিশা কোনো নথকাৰ সুযোগ গ্ৰহণ কৰি তেওঁক হোটেল খনৰ এটা কোঠালৈ লৈ গৈছিল সেই সময়ত তাত কৰ্মৰত দুজন চিকিৎসকে।
ইয়াৰ পিছতে চিকিৎসক দুজনে তেওঁক ধৰ্ষণ কৰিছিল। এই ঘটনাৰ পিছতে মহিলা চিকিৎসকগৰাকীয়ে দীঘলীয়া ছুটী লৈ আছিল।
অক্টোৱৰ মাহত নিৰ্যাতিতা মহিলা চিকিৎসকগৰাকীয়ে পুনৰ কামত যোগদান কৰে আৰু ধৰ্ষণৰ ঘটনাটো তেতিয়াহে পোহৰলৈ আহে।
মহিলা চিকিৎসকগৰাকীয়ে চেন্নাইৰ আৰক্ষী আয়ুক্তৰ ওচৰত অভিযোগ দাখিল কৰাৰ পিছতে আৰক্ষীয়ে চেন্নাইৰ চিকিৎসালয়ত কাম কৰা দুজন চিকিৎসক ক্ৰমে এছ ভেট্ৰিচলেভান(৩৫) আৰু এন মোহনৰাজ(২৮)ক গ্ৰেপ্তাৰ কৰি কাৰাগাৰলৈ প্ৰেৰণ কৰিছে।
নিৰ্যাতিতা মহিলা চিকিৎসকগৰাকীৰ অভিযোগৰ ভিত্তিত চেন্নাইৰ ফ্লাৱাৰ বাজাৰ আৰক্ষী থানাত এটা গোচৰ ৰুজু কৰা হৈছে। আৰক্ষীয়ে প্ৰয়োজনীয় তথ্য আদি গোটাই লোৱাৰ লগতে হোটেলৰ চিচিটিভিৰ ফুটেজো সংগ্ৰহ কৰিছে।
