দেশত লকডাউন চলি থকাৰ সময়তেই যোৱা নিশা প্ৰায় ১০ বজাত তিনিচুকীয়া জিলাৰ মাৰ্ঘেৰিটা মহকুমাৰ বৰডুমছাৰ আৰক্ষীয়ে সুৰা কঢ়িয়াই অনা এখন এম্বুলেঞ্চসহ তিনিজনকৈ স্বাস্থ্যকৰ্মীক পেঙেৰীৰ ব্ৰহ্মাজানত খেদি খেদি আটক কৰে।
এ এছ২৩ চি চি ২৮৬১ নম্বৰৰ এখন এম্বুলেঞ্চত বিদেশী সুৰাৰ ২২টা ফুল আৰু ৪০টা কোৱাটাৰ বটল এম্বুলেঞ্চত লুকুৱাই লৈ অৰুণাচলৰ বৰডুমচাৰ পৰা পেঙেৰী হৈ তিনিচুকীয়ালৈ গৈ আছিল স্বাস্থ্য কৰ্মী তিনিজন।
বৰডুমচা থানাৰ আৰক্ষী বিষয়া লাৰ্নিছ পেগুৰ তৎপৰতাত তথা পেঙেৰী থানাৰ সহযোগত সুৰা,গাড়ী সহ স্বাস্থ্যকৰ্মী কেইজনক আটক কৰিবলৈ সক্ষম হয়।
গাড়ীখনত থকা কাকপথাৰৰ কাছিজান গাঁৱৰ বিপিন মৰাণ(২৯), তিনিচুকীয়াৰ গেলাপুখুৰী ৰ’ড আৰু বৰদলৈ নগৰ নিবাসী ক্ৰমে কৃষ্ণ নেওগ আৰু উৎপল শৰ্মাক আৰক্ষীয়ে এই সন্দৰ্ভত গ্ৰেপ্তাৰ কৰিছে।
জব্দ কৰা এম্বুলেঞ্চসহ মদৰ বটলসমূহ বৰ্তমান পেঙেৰী আৰক্ষীয়ে জব্দ কৰিছে।
কৰ’না ভাইৰাছৰ আতংক তথা দেশত লকডাউনৰ মাজত স্বাস্থ্য কৰ্মীয়ে সুৰা সৰবৰাহ কৰা কাৰ্য্যক স্থানীয় সচেতন মহলক ক্ষুব্ধ কৰি তুলিছে।
উল্লেখ যে মাৰ্ঘেৰিটা মহকুমাৰ বিভিন্ন প্ৰান্তত বৰ্তমানেও দেশীয় সুৰা বিক্ৰী আৰু সৰবৰাহ চলি আছে বুলি অভিযোগ উঠিছে।
এইক্ষেত্ৰত আবকাৰী বিভাগক কঠোৰ অভিযান চলাবলৈ দাবী উত্থাপন হৈছে।