শুকুৰবাৰে গোলাঘাট জিলাৰ মেৰাপানী অঞ্চলত অসম আৰক্ষীয়ে এক অতৰ্কিত অভিযান চলায়। এক বিশেষ আৰু গোপন সূত্ৰৰ পম খেদি মেৰাপানী আৰু গোলাঘাট আৰক্ষীৰ এটা যৌথ দলে ২ নং চৰাইমাৰী গাঁৱৰ নিৱাসী পলাশ জ্যোতি বৰুৱাৰ বাসগৃহত এই তালাচী চলাইছিল। এই অভিযানৰ সময়ত আৰক্ষীয়ে ঘৰটোৰ পৰা কেইবাটাও পিষ্টল, সজীৱ গুলী আৰু অন্যান্য বহুতো আপত্তিজনক সামগ্ৰী উদ্ধাৰ কৰিবলৈ সক্ষম হয়।
গোলাঘাটৰ অতিৰিক্ত আৰক্ষী অধীক্ষকৰ (মুখ্যালয়) নেতৃত্বত চলিছিল এই বিশেষ অভিযানটো। জানিব পৰা মতে, ৪০ বছৰীয়া পলাশ জ্যোতি বৰুৱা আলফাৰ এজন প্ৰাক্তন সদস্য আছিল। তেওঁ ২০০৯ চনতেই মূল সূঁতিলৈ উভতি আহি আত্মসমৰ্পণ কৰিছিল। আৰক্ষীয়ে তেওঁৰ বাসগৃহত চলোৱা এই অভিযানত মাৰণাস্ত্ৰৰ লগতে এখন চুৰীও উদ্ধাৰ কৰে। ইয়াৰ উপৰিও ঘৰটোৰ পৰা কেইবাখনো বেংকৰ চেক বুক আৰু আপত্তিজনক বুলি সন্দেহ কৰা বহুতো গুৰুত্বপূৰ্ণ নথি-পত্ৰ আৰক্ষীৰ হাতত পৰে।
অস্ত্ৰ-শস্ত্ৰ আৰু নথি-পত্ৰৰ লগতে আৰক্ষীৰ দলটোৱে দুখন বাহনো জব্দ কৰিছে। ইয়াৰ ভিতৰত এখন হৈছে এ এছ ০৩ চি ৬২৩০ নম্বৰৰ এখন য়ামাহা মটৰচাইকেল আৰু আনখন হৈছে এ এছ ০২ এ এইচ ৪৬১১ নম্বৰৰ এখন থাৰ বাহন। অৱশ্যে আৰক্ষীৰ এই অভিযানৰ সময়ত পলাশ জ্যোতি বৰুৱা ঘৰত উপস্থিত নাছিল আৰু তেওঁ বৰ্তমান পলাতক অৱস্থাত আছে। আৰক্ষীয়ে তেওঁক বিচাৰি তীব্ৰ অভিযান আৰম্ভ কৰিছে। একে সময়তে, এই অস্ত্ৰ-শস্ত্ৰ আৰু গুলীবোৰ কিয় আৰু কৰ পৰা অনা হৈছিল, সেই বিষয়েও আৰক্ষীয়ে তদন্ত অব্যাহত ৰাখিছে।
