অসম আৰক্ষীৰ ঘোচখোৰ বদনামক নাইকিয়া কৰিবলৈ যিমানে চেষ্টা নকৰক কিয় সেয়া যেন অসম্ভৱ ৷ কাৰণ উপৰুৱা ধনৰ প্ৰতি থকা লোভ এতিয়াও একাংশ আৰক্ষীয়ে সামৰিব পৰা নাই ৷
তাৰ শেহতীয়া প্ৰমাণ বঙাইগাঁৱত দেওবাৰে পুলিচ ৰিপোৰ্ট প্ৰদানৰ বাবে ধন দাবী কৰি এজন আৰক্ষী কনিষ্টবল গ্ৰেপ্তাৰ হৈ জেললৈ যাবলগীয়া হোৱা ঘটাই পুনৰ উন্মোচিত কৰিছে ৷ উল্লেখ্য যে বঙাইগাঁও সদৰ থানাত কৰ্মৰত আৰক্ষী কনিষ্টবল মজিবৰ ৰহমানে এজন ব্যক্তিক পুলিচ ৰিপোৰ্ট প্ৰদানৰ বাবদ ধনদাবীৰ অভিযোগ উত্থাপিত হৈছিল ৷
জানিব পৰা মতে বঙাইগাঁও সদৰ থানাৰ অন্তৰ্গত ৪ নম্বৰ চৌৰাগুৰিৰ সুখীৰাম ভৌমিক নামৰ ব্যক্তিজনে কেইদিনমান পূৰ্বে বঙাইগাঁও সদৰ থানাত বিগত ২০২০ চনত বজ্ৰপাত পৰি মৃত্যু হোৱা আত্মীয় এজনৰ ঘটনা সন্দৰ্ভত ৰুজু হোৱা গোচৰৰ পুলিচ ৰিপোৰ্ট এটা বিচাৰি আহিছিল ৷
কিন্তু এই পুলিচ ৰিপোৰ্ট প্ৰদানৰ বাবদ আৰক্ষী কনিষ্টবল মজিবৰ ৰহমানে ব্যক্তিজনক দহ হাজাৰ টকা দাবী কৰা বুলি অভিযোগ কৰি আৰক্ষী কনিষ্টবলজনৰ বিৰুদ্ধে জিলা আৰক্ষী অধীক্ষকৰ ওচৰত লিখিত অভিযোগ দিয়ে ৷ এই ধন দাবীৰ অভিযোগৰ ভিত্তিত পিচত আৰক্ষীয়ে কনিষ্টবল গৰাকীক সোধাপোছা কৰাত ধন দাবীৰ অভিযোগটোৰ সত্যসত্যতা থকাটো ওলাই পৰে ৷
কনিষ্টবলজনে আৰক্ষীৰ আগত ধন দাবীৰ কথা স্বীকাৰ কৰাত কনিষ্টবলজনৰ বিৰুদ্ধে বঙাইগাঁও সদৰ থানাত এক গোচৰ ৰুজু কৰা হয় ৷ বঙাইগাঁও সদৰ থানাত ৰুজু হোৱা ৩০৫/২২ (305/22 u/s 163/384/511 IPC) নম্বৰৰ গোচৰৰ ভিত্তিত আৰক্ষীয়ে পিচত কনিষ্টবল মজিবৰ ৰহমানক দেওবাৰে গ্ৰেপ্তাৰ কৰে ৷
গ্ৰেপ্তাৰ কৰা কনিষ্টবলজনক পিচত আদালতত হাজিৰ কৰাত আদালতে কনিষ্টবল মজিবৰ ৰহমানক ন্যায়িক জিম্মালৈ প্ৰেৰণ কৰে ৷ জেললৈ প্ৰেৰণ কৰা আৰক্ষী কনিষ্টবলজনৰ ঘৰ বঙাইগাঁও জিলাৰ অভয়াপুৰী নগৰৰ ৪ ৱাৰ্ডৰ টেংনামাৰীত বুলি আৰক্ষীয়ে জানিবলৈ দিছে ৷
উল্লেখ্য যে এইগৰাকী আৰক্ষী কনিষ্টবলৰ বিৰুদ্ধে পূৰ্বৰে পৰা এইদৰে পুলিচ ৰিপোৰ্ট প্ৰদানৰ বাবদ ধন দাবী কৰি অহাৰ অভিযোগ উত্থাপিত হৈ আহিছিল ৷
