তামুলপুৰত লকডাউন ভংগকাৰীক আৰক্ষীৰ শাস্তি: যুৱকক দিয়ালে সাত পাক ভেকুলী জাপ
ৰাজ্যত COVID-19ৰ সংক্ৰমিত ব্যক্তিৰ সংখ্যা ভয়াবহ ভাৱে বৃদ্ধি পোৱাৰ পাছত আৰক্ষী প্ৰশাসন অধিক কঠোৰ হোৱা দেখা গৈছে।
শনিবাৰে সন্ধিয়া তামুলপুৰ মহকুমাত তামুলপুৰ আৰক্ষীয়ে COVID-19 প্ৰতিৰোধ কৰাৰ ক্ষেত্ৰত মাইক যোগে লকডাউন মানি চলিবলৈ অনুৰোধ জনায়।
আইন ভংগকাৰীৰ বিৰুদ্ধে আৰক্ষীয়ে কঠোৰ হোৱাৰ কথা ঘোষণা কৰাৰ উপৰিও আইন ভংগকাৰীৰ বিৰুদ্ধে আইনী ব্যৱস্থা গ্ৰহণ কৰিব বুলিও মাইক যোগে ঘোষণা কৰি সকীয়াই দিয়ে।
ইপিনে শনিবাৰে নাগ্ৰীজুলি চাহ বাগিচাত মদ খাবলৈ আহি আইন ভংগ কৰা যুৱকক আৰক্ষীয়ে শাস্তি প্ৰদান কৰে।
তেওঁলোকক ভেকুলী জাপ দিবলৈ দি ভৱিষ্যতে মদ নাখাও বুলি ক’বলৈ দিয়ে আৰক্ষীয়ে। তদুপৰি, নাগ্ৰীজুলি আৰক্ষীয়ে এটা মদৰ ঘটিও উচ্ছেদ কৰে।
যোৱা ২৪ মাৰ্চৰ পৰা আৰম্ভ হোৱা ২১ দিনীয়া ৰাষ্ট্ৰজোৰা লকডাউনৰ সময়ছোৱাত বিভিন্ন স্থানত লোকসকলে দলে বলে বাহিৰলৈ ওলাই অহাৰ ঘটনা সংঘটিত হৈছে।
আনহাতে, ৰাজ্যখনৰ কেইবাটাও স্থানত আৰক্ষীৰ সৈতে লকডাউন ভংগকাৰীৰ সংঘাত সৃষ্টি হোৱাও পৰিলক্ষিত হৈছিল।
ইয়াৰ পাছতে এন আইন ভংগকাৰীৰ বিৰুদ্ধে ৰাজ্যৰ আৰক্ষী প্ৰশাসন কঠোৰ হৈ পৰিছে।