নিউজিলেণ্ডত সংঘটিত হৈছে এক সন্ত্ৰাসবাদীৰ আক্ৰমণ। শুকুৰবাৰে দুপৰীয়া অকলেণ্ডৰ এটা শ্বপিং মলত হঠাতে এজন ব্যক্তিয়ে আক্ৰমণ চলায়।
আক্ৰামণকাৰীয়ে ছুৰীৰ আঘাতত ৬জন লোক আহত হয়। ইয়াৰ ভিতৰত ৩জনৰ অৱস্থা গুৰুতৰ। আনহাতে, আৰক্ষীৰ গুলীত আক্ৰমণকাৰী সন্ত্ৰাসবাদীজন নিহত হৈছে।
নিউজিলেণ্ডৰ প্ৰধানমন্ত্ৰী জেছিণ্ডা অৰ্ডেনে জানিবলৈ দিছে যে আক্ৰমণকাৰী লোকজন শ্ৰীলংকাৰ বাসিন্দা তথা আইছিছৰ সমৰ্থক।
বাতৰি অনুসৰি, এগৰাকী প্ৰত্যক্ষদৰ্শীয়ে জানিবলৈ দিয়ে যে তেওঁ হঠাতে শ্বপিং মলৰ ভিতৰত এজন ব্যক্তি ৰক্তাক্ত হৈ পৰি থকা দেখা পায়। তেওঁৰ কাষতে একে ৰক্তাক্ত অৱস্থাত এগৰাকী মহিলা। মলটোৰ ভিতৰতে সেই সন্ত্ৰবাদীজনে উন্মত্ত হৈ ঘুৰি ফুৰিছে।
তাৰ পাছতে আৰক্ষীৰ গুলীত লোকজন বাগৰি পৰে। প্ৰত্যক্ষদৰ্শীয়ে জানিবলৈ দিয়া মতে লোকজনে এক উন্মাদ হত্যাকাৰীৰ দৰে আচৰণ কৰিছিল।
সন্ত্ৰাসবাদীজনৰ বিষয়ে অৱগত কৰি দেশখনৰ প্ৰধানমন্ত্ৰী জেইণ্ডা অৰ্ডেনে কয়,’’অৱশ্যেই আইছিছ আদৰ্শৰ সমৰ্থক আছিল লোকজন।‘’ তেওঁ লগতে এই আক্ৰমম যে কোনো দলগত আক্ৰমণ নহয় সেইকথা স্পষ্ট কৰি দিছে।
জেছিণ্ডাই কয়,’’ঘটনাটো জঘণ্য। এয়া ঠিক নহয়। কিন্তু এইটো এজনৰ ব্যক্তিগত আক্ৰমণ। তেওঁ অকলেই এই আক্ৰমণ সংঘটিত কৰিছে।‘’
জানিব পৰা মতে, ব্যক্তিজন নিয়মিত নিৰীক্ষণৰ মাজত আছিল। ব্যক্তিজনে এনে কোনো কাণ্ড সংঘটিত কৰিব পাৰে বুলি ধাৰণা কৰা হৈছিল। সেয়ে, আজি যেতিয়া ব্যক্তিজন ঘৰৰ পৰা ওলাই আহিছিল তেতিয়াই আৰক্ষীয়ে তেওঁৰ ওপৰত নজৰ ৰাখিছিল। তাৰ পাছত শ্বপিং মলত প্ৰৱেশ কৰি আক্ৰমণ চলোৱাৰ মিনিটৰ ভিতৰতে আৰক্ষীয়ে তেওঁক গুলীয়াই নিহত কৰে।