বৃহস্পতিবাৰে নিশা পেঙেৰীত বৃহৎ পৰিমাণৰ ড্ৰাগছসহ আৰক্ষীয়ে ৫ জন লোকক আটক কৰিছে।
উল্লেখ্য গোপন সূত্ৰৰ ভিত্তিত মাৰ্ঘেৰিটা মহকুমা আৰক্ষী বিষয়া পুনা গগৈ আৰু বৰডুমচা থানাৰ ভাৰপ্ৰাপ্ত বিষয়া লাৰ্ণিছ পেগুৰ নেতৃত্বত আৰক্ষীৰ এটা বৃহৎ দলে ড্ৰাগছখিনি জব্দ কৰে।
আৰক্ষীয়ে ক্ৰেতাৰ ভাৱত ডেৰ লাখ টকাৰ বিনিময়ত ড্ৰাগছ ক্ৰয় কৰি হাতে-লোতে ধৰাৰ ব্লু- প্ৰিণ্ট ৰচে।
ড্ৰাগছ মাফিয়াৰ দলে ক্ৰেতাৰূপী আৰক্ষীৰ দলটোক নতুন গ্ৰাহক হোৱাৰ বাবে বৃহস্পতিবাৰৰ পুৱাৰ ভাগৰ পৰাই কেইবা ঠাইলৈ দৌৰাই অৱশেষত পেঙেৰীত লেনদেনৰ বাবে ৰয়গৈ।
আৰক্ষী পক্ষৰ ক্ৰেতাজনে ড্ৰাগছ ক্ৰয়ৰ বাবে লৈ যোৱা টকাখিনি গণনা কৰি থকা সময়তেই বৰডুমচাৰ পৰা লাৰ্ণিছ পেগুৰ নেতৃত্বত অহা আৰক্ষীৰ দল আৰু মাৰ্ঘেৰিটাৰ পৰা অহা মহকুমা আৰক্ষী বিষয়াৰ দলে পেঙেৰীৰ পেট্ৰ’ল পাম্পৰ নিকটৱৰ্তী পেঙেৰী- বৰডুমচা পথত এগৰাকী যুৱতীসহ ৪ জন লোক অহা ৰূপালী ৰঙৰ এ এছ ২৩ জি ৯৭৫৬৫ নম্বৰৰ মাৰুটি এল্ট’ খন আগভেটি ধৰে।
ধৃত ড্ৰাগছ মাফিয়া তথা আশা কৰ্মী কঁঠালগুৰি নিৱাসী ব্ৰজেন বৰুৱাৰ পত্নী ৰেখা বৰুৱা (৪০)সহ তেওঁৰ পুত্ৰ লক্ষ্যজিৎ বৰুৱা (১৯), বৰডুমচাৰ ২ নং মহঙৰ জগত দেউৰীৰ পুত্ৰ ভূপেন দেউৰী (৪৪), ইনথেমৰ প্ৰফুল্ল গিদিঙৰ পুত্ৰ মহেশ চিংফৌ (২৭) আৰু কঁঠালগুৰিৰ এজন নাৱালকৰ জিম্মাৰ পৰা দুটা টোপোলাত থকা প্ৰায় ২৭ গ্ৰাম ওজনৰ ‘হিৰ’ইন’ জব্দ কৰে।
ইয়াৰে লক্ষ্যজিৎ বৰুৱা পেঙেৰী চাৰি আলিত ৰৈ থকাৰ পাছত ঘটনাক্ৰমে আৰক্ষীৰ জালত পৰে।
জানিব পৰা মতে ড্ৰাগছখিনিৰ বজাৰ মূল্য প্ৰায় ৮ লাখ টকা আৰু ইয়াৰ মূল্য ‘ব্ৰাউন ছুগাৰৰ মূল্যৰ দুগুণতকৈও অধিক।
হিৰ’ইনৰ টোপোলাটোৰ উপৰি এটা মোবাইল হেণ্ডছেট আৰু মাৰুতি এল্ট’খন জব্দ কৰি আৰক্ষীৰ দল ধৃত ৰেখাৰ কঁঠালগুৰিস্থিত বাসগৃহলৈ ৰাওনা হয়।
লেডী ড্ৰাগছ মাফিয়া ৰেখাক মাৰাথান জেৰা কৰিলে অধিক ড্ৰাগছ উদ্ধাৰ হোৱাৰ সম্ভাৱনা আছে।
উল্লেখ্য যে আশা কৰ্মী ৰেখা বৰুৱা দীৰ্ঘ দিনৰ পৰা ড্ৰাগছৰ বেহাৰে জড়িত থকাৰ অভিযোগ আছে। অভিযোগ অনুসৰি আশাকৰ্মী ৰেখাই আনকি ১০৮ বাহনেৰেও ড্ৰাগছ সৰবৰাহ কৰি আহিছিল।