নিপন নাথ নামৰ আৰক্ষী উপ পৰিদৰ্শকগৰাকীৰ “আত্মহত্যা” সন্দৰ্ভত ধেমাজি চিচিবৰগাওঁ চকীৰ ভাৰপ্ৰাপ্ত বিষয়াগৰাকীৰ বিৰুদ্ধে গোচৰ ৰুজু হৈছে।
মৃত নাথৰ পৰিয়ালে ঘটনাটোক “প্ৰৰোচনামূলক” বুলি অভিহিত কৰি ভাৰপ্ৰাপ্ত বিষয়া পদ্মেশ্বৰ বৰকটকীৰ বিৰুদ্ধে চিলাপথাৰ আৰক্ষী থানাত গোচৰ তৰিছে।
জিলা আৰক্ষী অধীক্ষক ভি ভি ৰাকেশ ৰেড্ডিয়ে অভিযুক্ত আৰক্ষী বিষয়াজনক ৰিজাৰ্ভত আবদ্ধ কৰিছে আৰু ঘটনাটোৰ তদন্তৰ নিৰ্দেশ দিছে।
সহকাৰী আৰক্ষী অধীক্ষকে কৰি থকা ঘটনাটোৰ তদন্ত কেইসপ্তাহমানৰ ভিতৰত সম্পূৰ্ণ হ’ব বুলি ৰেড্ডিয়ে জনাইছে।
“মই বিতৰ্কিত ভাৰপ্ৰাপ্ত বিষয়াজনক চিচিবৰগাওঁ আৰক্ষী চকীৰ পৰা আঁতৰাইছো আৰু মুক্ত আৰু নিৰপেক্ষ তদন্তৰ স্বাৰ্থত তেওঁক পুলিচ ৰিজাৰ্ভত আবদ্ধ কৰা হৈছে।…তদন্তত দোষী সাব্যস্ত হ’লে তেওঁৰ বিৰুদ্ধে বিভাগীয় ব্যৱস্থা লোৱা হ’ব,” এছ পি ৰেড্ডিয়ে মঙলবাৰে ধেমাজিত প্ৰকাশ কৰে।
আৰক্ষী বিষয়া বৰকটকীৰ বিৰুদ্ধে ইয়াৰ পূৰ্বেও চিচিবৰগাঁৱৰ স্থানীয় একাংশ লোকে “ক্ষমতাৰ অপব্যৱহাৰ”ৰ অভিযোগ উত্থাপন কৰিছিল।
এই সন্দৰ্ভত আৰক্ষী অধীক্ষক ৰেড্ডিক তেওঁলোকে লিখিত আপত্তি দাখিল কৰিছিল।
মৃত নিপন নাথে যোৱা ৩০ আগষ্টৰ পুৱা বিভাগীয় আৱাসত নিজৰ চাৰ্ভিচ পিষ্টলেৰে গুলীয়াই “আত্মহত্যা” কৰিছিল।
কিন্তু নাথৰ পৰিয়ালে ঘটনাটোত ৰহস্যৰ গোন্ধ পাইছিল আৰু তেওঁৰ মৃতদেহ চমজি ল’বলৈ অস্বীকাৰ কৰিছিল।
বৰকটকীৰ স্থানত চিলাপথাৰ আৰক্ষী থানাৰ উপ পৰিদৰ্শক মানৱেন্দ্ৰ শইকীয়াক চিচিবৰগাওঁ চকীৰ নতুন ভাৰপ্ৰাপ্ত বিষয়াৰূপে নিযুক্তি দিয়া হৈছে।
২০১৭ চনত অসম আৰক্ষীত যোগ দিয়া নাথৰ আচল ঘৰ নলবাৰী জিলাৰ ৰঙিয়াত।