আদিবাসী ছাত্ৰ সন্থা তিনিচুকীয়া জিলা সমিতি আৰু মাৰ্ঘেৰিটা আঞ্চলিক সমিতিৰ উদ্যোগত আৰু তিনিচুকীয়া জিলা আৰক্ষীৰ সহযোগত আজি মাৰ্ঘেৰিটা দিহিং চাহ বাগিচাৰ খেল পথাৰত ৩ মহীয়া আৰক্ষী প্ৰশিক্ষণ শিবিৰ আৰম্ভ হয়।
মাৰ্ঘেৰিটা আৰক্ষী থানাৰ ভাৰপ্ৰাপ্ত আৰক্ষী বিষয়া সোমেশ্বৰ কোঁৱৰে শুভ উদ্ধোধন কৰা এই কাৰ্যসূচীত অতিথি হিচাপে বক্তব্য ৰাখে সাংবাদিক মানস প্ৰতিম গগৈয়ে।
তিনিচুকীয়া জিলা সমিতিৰ সম্পাদক ৰামানুজ লাক্ৰাই আঁত ধৰা সভা খনত আছাৰ তিনিচুকীয়া জিলা সমিতি , মাৰ্ঘেৰিটা আঞ্চলিক সমিতি সমূহ বিষয়ববীয়াৰ লগতে স্থানীয় সমাজকৰ্মী ক্ৰমে প্ৰদীপ তাঁতি, প্ৰাক্তন আছা নেতা মাইকেল দিপ সহ বহু কেইজন গণ্যমান্য ব্যক্তি উপস্থিত থাকে।
আজিৰ আৰক্ষী প্ৰশিক্ষণ শিবিৰৰ প্ৰায় ৩ শতাধিক প্ৰশিক্ষাৰ্থীয়ে অংশগ্ৰহণ কৰিছে।
মাৰ্ঘেৰিটা আৰক্ষী থানাৰ ভাৰপ্ৰাপ্ত আৰক্ষী বিষয়া সোমেশ্বৰ কোঁৱৰে এই শিবিৰ শুভ উদ্ধোধন কৰি ভাষণ প্ৰসংগত কয় যে স্বচ্ছতাৰ ভিত্তিত অসম আৰক্ষী সেৱা আগবঢ়োৱাত নিবনুৱা যুৱক যুৱতীক আকৰ্ষিত কৰি আৰক্ষীত যোগদান কৰোৱাৰ উদ্দেশ্যৰে এনে শিবিৰ অনুষ্ঠিত কৰা হৈছে।
ইতিমধ্যেই মুখ্যমন্ত্ৰী হিমন্ত বিশ্ব শৰ্মাইও আৰক্ষীত নিবনুৱা যুৱক যুৱতী সকলক স্বচ্ছ আৰু নিকা পদ্ধতিৰে যোগদান কৰাবৰ বাবে অসম আৰক্ষীক নিৰ্দেশ প্ৰদান কৰিছে বুলি ভাষণ প্ৰসংগত আৰক্ষী বিষয়া কোঁৱৰে উল্লেখ কৰে।
সভাৰ শেষত দিহিং চাহ বাগিচা খেল পথাৰত অসম আৰক্ষীৰ তিনিজন আৰক্ষী প্ৰশিক্ষকে আজিৰে পৰা প্ৰশিক্ষাৰ্থী সকলক প্ৰশিক্ষণ দিয়াৰ ব্যৱস্থা কৰিছে।
