তামিলনাডুৰ নৱনিযুক্ত মুখ্যমন্ত্ৰী চি জোচেফ বিজয়ে সোমবাৰে দ্ৰাবিড় মুন্নেত্ৰা কাঝাগাম চমুকৈ ডিএমকেৰ মুৰব্বী তথা প্ৰাক্তন মুখ্যমন্ত্ৰী এম কে ষ্টালিনক তেওঁৰ বাসগৃহত সাক্ষাৎ কৰে। অভিনেতাৰ পৰা ৰাজনীতিবিদ হোৱা বিজয়ে শেহতীয়া বিধানসভা নিৰ্বাচনত এক অভূতপূৰ্ব বিজয় সাৱ্যস্ত কৰাৰ পিছত শপত গ্ৰহণ কৰি কালি প্ৰথমবাৰৰ বাবে ষ্টালিনক সাক্ষাৎ কৰিবলৈ যায়। ষ্টালিনৰ সৈতে তেওঁৰ পুত্ৰ উদয়নিধি ষ্টালিনো এই সৌজন্যমূলক সাক্ষাৎকালত উপস্থিত আছিল। চেন্নাইৰ আলৱাৰপেটত থকা ষ্টালিনৰ বাসগৃহত উপস্থিত হোৱাৰ লগে লগে ডিএমকেৰ মুৰব্বীগৰাকীয়ে বিজয়ক উষ্ম আদৰণি জনায়। এই দৃশ্যত দেখা গৈছিল যে ক’লা চুট পৰিহিত বিজয়ক ষ্টালিনে সাৱটি ধৰি অভিনন্দন জনাইছে আৰু দুয়োগৰাকী নেতাই পৰস্পৰক হাত জোৰ কৰি অভিবাদন জনাইছে।
মুখ্যমন্ত্ৰী হিচাপে দায়িত্ব গ্ৰহণ কৰাৰ পিছত ষ্টালিনৰ সৈতে বিজয়ৰ এয়া আছিল প্ৰথমটো আনুষ্ঠানিক বৈঠক। এই সাক্ষাৎকালত দুয়োগৰাকী নেতাই পৰস্পৰক চিল্কৰ চাদৰ আৰু ফুলৰ থোপাৰে সন্মান প্ৰদৰ্শন কৰে। পিছলৈ এম কে ষ্টালিনে ছ’চিয়েল মিডিয়া প্লেটফৰ্ম এক্সৰ জৰিয়তে জনায় যে তেওঁ নতুন মুখ্যমন্ত্ৰীগৰাকীক নিৰ্বাচনী জয়ৰ বাবে অভিনন্দন জনোৱাৰ লগতে ৰাজনৈতিক অভিজ্ঞতাৰ পৰা কিছু পৰামৰ্শও আগবঢ়ায়। ষ্টালিনে উল্লেখ কৰে যে বিজয়ৰ এই সাক্ষাৎ এক উন্নত ৰাজনৈতিক সৌজন্যতাৰ নিদৰ্শন আৰু তেওঁ নতুন চৰকাৰখনৰ বাবে শুভকামনা জনাইছে। উল্লেখযোগ্য যে এই বৈঠকৰ কিছু সময় পূৰ্বে ছ’চিয়েল মিডিয়াত বিজয় আৰু উদয়নিধিৰ পুৰণি ফটো ভাইৰেল হৈছিল যদিও নিৰ্বাচনী যুঁজৰ পিছত এতিয়া তেওঁলোকক এক বন্ধুত্বপূৰ্ণ পৰিৱেশত দেখা গৈছে।
অহা ১৩ মে’ত তামিলনাডু বিধানসভাত হ’বলগীয়া গুৰুত্বপূৰ্ণ আস্থা ভোটৰ ঠিক পূৰ্বে এই বৈঠক অনুষ্ঠিত হৈছে। বৰ্তমান সদনত বিজয়ৰ দল টিভিকেৰ ১০৭খন আসন আছে আৰু কংগ্ৰেছ, ভিকিচি, আইইউএমএল তথা বাওঁ দলসমূহৰ সমৰ্থনত তেওঁৰ পক্ষত মুঠ ১২০ জন বিধায়ক আছে। এইটোও লক্ষ্যণীয় যে বিজয়ৰ চৰকাৰক সমৰ্থন কৰা এই মিত্ৰশক্তিৰ দলসমূহ এতিয়াও ৰাষ্ট্ৰীয় পৰ্যায়ত ডিএমকে মিত্ৰজোঁটৰ অংশ হৈ আছে। অৱশ্যে শপত গ্ৰহণৰ পিছতেই বিজয়ে পূৰ্বৰ ডিএমকে চৰকাৰক সমালোচনা কৰি ৰাজ্যখনৰ ১০ লাখ কোটি টকাৰ ঋণৰ বোজাৰ বাবে দোষাৰোপ কৰিছিল আৰু ৰাজ্যখনত একাধিক ক্ষমতাৰ কেন্দ্ৰ থকা বুলি কটাক্ষ কৰিছিল। এনে পৰিস্থিতিৰ মাজতো ষ্টালিন আৰু বিজয়ৰ মাজত হোৱা এই সৌহাৰ্দ্যপূৰ্ণ সাক্ষাতে ৰাজ্যখনৰ ৰাজনীতিত চৰ্চাৰ কেন্দ্ৰবিন্দু হৈ পৰিছে।
