“সময়ৰ লগে লগে ৰাজনৈতিক কাৰ্যবাহী সলনি হ’ব। কিন্তু এক প্ৰতিষ্ঠান হিচাপে আপোনালোক স্থায়ী।”— শুকুৰবাৰে নতুন দিল্লীৰ বিজ্ঞান ভৱনত ১৯ সংখ্যক ডিপি কোহলী স্মাৰক বক্তৃতাত কেন্দ্ৰীয় অনুসন্ধান ব্যুৰো (চিবিআই)ক লক্ষ্য কৰি এই মন্তব্য কৰিছে ভাৰতৰ মুখ্য ন্যায়াধীশ এন ভি ৰমনাই।
প্ৰাৰম্ভিক পৰ্যায়ত চিবিআইৰ ওপৰত জনসাধাৰণৰ অপৰিসীম বিশ্বাস আছিল যদিও শেহতীয়াকৈ ইয়াৰ বিশ্বাসযোগ্যতা প্ৰশ্নৰ সন্মুখীন হৈছে বুলি মন্তব্য কৰে ৰমনাই।
“চিবিআইলৈ তদন্ত স্থানান্তৰৰ বাবে ন্যায়পালিকাত অনুৰোধৰে ভৰি পৰিছিল। কিন্তু, সময় অতিবাহিত হোৱাৰ লগে লগে আন প্ৰতিষ্ঠানসমূহৰ দৰে চিবিআইও আস্থাহীন হৈ আহিছে।ইয়াৰ কাৰ্য্য আৰু নিষ্ক্ৰিয়তাই প্ৰায়ে বিশ্বাসযোগ্যতা সম্পৰ্কে প্ৰশ্ন উত্থাপন কৰিছে।”- ৰমনাই কয়।
মুখ্য ন্যায়াধীশ গৰাকীয়ে লগতে কয় যে আৰক্ষী বিষয়াসকলে অপৰিসীম অসুবিধাৰ সন্মুখীন হয়। ৰাজনৈতিক নেতাসকলৰ দ্বাৰা আৰক্ষীৰ অপব্যৱহাৰ কোনো নতুন বৈশিষ্ট্য নহয়। ব্ৰিটিছ সাম্ৰাজ্যৰ আধিপত্য, বলপূৰ্বক প্ৰয়োগ নীতি এতিয়াও ভাৰতীয় আৰক্ষীৰ স্থায়ী বৈশিষ্ট্য হৈ আছে বুলিও তেওঁ খেদ প্ৰকাশ কৰে।
তেওঁ কয়, “আৰক্ষী আৰু অনুসন্ধানকাৰী সংস্থাকে ধৰি সকলো প্ৰতিষ্ঠানে গণতান্ত্ৰিক মূল্যবোধক বজাই ৰখা আৰু শক্তিশালী কৰাটো অত্যাৱশ্যকীয়। সেয়ে তেওঁলোকে নিৰপেক্ষভাৱে কাম কৰা উচিত আৰু অপৰাধ প্ৰতিৰোধৰ ওপৰত গুৰুত্ব দিয়া উচিত।”
যিকোনো বিচ্যুতিয়ে প্ৰতিষ্ঠানসমূহক আঘাত কৰিব আৰু আমাৰ গণতন্ত্ৰক দুৰ্বল কৰিব বুলি মন্তব্য কৰি মুখ্য ন্যায়াধীশ গৰাকীয়ে আৰক্ষী আৰু তদন্তকাৰী সংস্থা সমূহে কোনো আধিপত্যবাদী প্ৰৱণতাক প্ৰৱেশ কৰিবলৈ দিয়া উচিত নহয় বুলি পৰামৰ্শ আগবঢ়ায়।
তেওঁলোকে সংবিধানৰ অধীনত নিৰ্ধাৰিত গণতান্ত্ৰিক পৰিকাঠামোৰ ভিতৰত কাম কৰি স্বতন্ত্ৰ সংস্থা হিচাপে সেৱা আগবঢ়াব লাগিব বুলি মন্তব্য কৰে ৰমনাই।
মুখ্য ন্যায়াধীশ ৰমনাই লগতে চিবিআই, এছএফআইঅ’, ইডি আৰু এনে ধৰণৰ অন্যান্য সংস্থাক সংযুক্তভাৱে এটা সংস্থাৰ অধীনস্থ কৰাৰ প্ৰয়োজনীয়তাৰ বিষয়েও দোহাৰে।