নিৰ্বাচনৰ দিন চমু চাপি অহাৰ লগে লগে ৰাজনৈতিক দলসমূহৰ ব্যস্ততা বৃদ্ধি পোৱাৰ সময়তে হোজাই জিলাৰ ৰাজনৈতিক দলসমূহৰ মাজত দেখা দিছে নতুন সমস্যাই। প্ৰাৰ্থী নিৰ্বাচনৰ ক্ষেত্ৰত জিলাখনৰ প্ৰতিটো দল বিমোৰত পৰিছে যাৰ বাবে কোনো এটা দলে প্ৰাৰ্থী ঘোষণা কৰিব পৰা নাই। নতুন পঞ্চায়ত আইন অনুসৰি প্ৰাৰ্থীৰ শিক্ষাগত অৰ্হতা, সন্তানক লৈ বিমোৰত পৰিছে জিলাখনৰ প্ৰতিটো দল।
উল্লেখ্য যে ৰাজনৈতিক দল সমূহে নিৰ্বাচনলৈ প্ৰস্তুতি গ্ৰহণ কৰাৰ সময়ত জিলা প্ৰশাসনেও প্ৰস্তুতি আৰম্ভ কৰা পৰিলক্ষিত হৈছে। অহা ৯ ডিচেম্বৰত অনুষ্ঠিত হ’বলগীয়া দ্বিতীয় পৰ্যায়ৰ নিৰ্বাচনত হোজাই জিলাৰ তিনিটা বিধানসভা সমষ্টিত ৭১৬টা ভোট কেন্দ্ৰত ৫,২৫,৭৭১ গৰাকী ভোটাৰে ভোটদান কৰিব।
হোজাই জিলাত তিনিটা বিধানসভা সমষ্টি ক্ৰমে যমুনামুখ, হোজাই আৰু লামডিং সমষ্টি মিলি গঠিত হোজাই জিলা পৰিষদত ১২ টা জিলা পৰিষদ সমষ্টি আছে। জিলাখনত মুঠ ৬৭টা গাঁও পঞ্চায়ত সদস্য, ৬৭টা গাঁও পঞ্চায়ত সদস্যৰ লগতে ৬৭০টা ৱাৰ্ড সদস্য পদ আছে।
ইয়াৰ উপৰি জিলাখনত ২,৭৭,৭৩৭ গৰাকী পুৰুষ আৰু ২,৪৮,০৩৪ গৰাকী মহিলাই ভোটাধিকাৰ সাব্যস্ত কৰিব।
পঞ্চায়ত নিৰ্বাচনৰ দিন চমু চাপি অহাৰ লগে লগে ৰাজনৈতিক দল সমূহে নিৰ্বাচনী তৎপৰতা দেখুওৱাৰ বিপৰীতে সাধাৰণ ভোটাৰৰ মাজত কোনো উৎসাহ-উদ্দীপনা দেখা পোৱা পৰিলক্ষিত হোৱা নাই।