শীঘ্ৰেই ঘোষণা হ’ব উত্তৰ কাছাৰ পাৰ্বত্য স্বায়ত্ত শাসিত পৰিষদৰ নিৰ্বাচনৰ দিন
‘নতুন বছৰৰ ১৫ ফেব্ৰুৱাৰিৰ আগে আগে উত্তৰ কাছাৰ পাৰ্বত্য স্বায়ত্ত শাসিত পৰিষদৰ সাধাৰণ নিৰ্বাচনৰ কাম কাজ শেষ কৰা হ’ব। সেয়ে অতি শীঘ্ৰেই নিৰ্বাচনৰ দিন ঘোষণা কৰা হ’ব।’ এই মন্তব্য পাৰ্বত্য এলেকা উন্নয়ন বিভাগৰ মন্ত্ৰী চুম ৰংহাঙে।
আজি হাফলঙত মাৰ সম্প্ৰদায়ৰ কৃষি ভিত্তিক উৎসৱ ছিক পুই ৰুইৰ ৰূপালী জয়ন্তী অনুষ্ঠানত মুখ্য অতিথি হিচাপে অংশ গ্ৰহণ কৰিবলৈ আহি সাংবাদিকৰ আগত উক্ত মন্তব্য প্ৰদান কৰে।
উল্লেখযোগ্য যে পাৰ্বত্য জিলাৰ মাৰ অধ্যুষিত আটাইতকৈ ডাঙৰ গাঁও মৌলহৈত ছিক পুই ৰুইৰ ৰূপালী জয়ন্তী অনুষ্ঠানত মন্ত্ৰী ৰংহাঙৰ উপৰিও উত্তৰ কাছাৰ পাৰ্বত্য স্বায়ত্ত শাসিত পৰিষদৰ চি ই এণ দেবলাল গাৰ্লচা, ডিমা হাচাও জিলাৰ জিলা উপায়ুক্ত অমিতাভ ৰাজখোৱা, পৰিষদৰ ই এম কুলেন্দ্ৰ দাউলাগুপু, দেবজিৎ বাঠাৰি আদিও উপস্থিত থাকে।
মাৰ সম্প্ৰদায়ৰ কৃষি ভিত্তিক উৎসৱ ছিক পুই ৰুই উপলক্ষে আজি হোৱা ৰূপালী জয়ন্তী অনুষ্ঠানটোত বিভিন্ন জাতি-জনগোষ্ঠীৰ নৃত্যানুষ্ঠান অনুষ্ঠিত হয়। অঞ্চলটোত এক উৎসৱমুখৰ পৰিৱেশ সৃষ্টি হয়।
অনুষ্ঠানত উপস্থিত থকা পাৰ্বত্য পৰিষদৰ চি ই এম দেবলাল গাৰ্লচাই কয় যে, ‘১৯৯৩ চনতে পাৰ্বত্য পৰিষদৰ তেতিয়াৰ চি ই এম প্ৰয়াত পবিত্ৰ কুমাৰ কেম্প্ৰাইয়ে মাৰ সম্প্ৰদায়ৰ কৃষি ভিত্তিক উৎসৱ ‘ছিক পুই ৰুইক আনুষ্ঠানিকভাৱে অনুমোদন দিছিল।’ লগতে গাৰ্লচায়ে ছিক পুই ৰুই উপলক্ষে মাৰ সম্প্ৰদায়ক শুভেচ্ছা আৰু অভিনন্দন জ্ঞাপন কৰে।