এক দশকতকৈও অধিক সময়ৰ পিছত সম্পৰ্কৰ সমাপ্তি ঘটিবলৈ আগবাঢ়িছে বিশ্বৰ ক্ৰীড়া-সংগীত জগতৰ যুগলবন্দী জনপ্ৰিয় দম্পতীৰ। স্পেনিছ ফুটবলাৰ জেৰাৰ্ড পিক আৰু জনপ্ৰিয় পপ তাৰকা শাকিৰাৰ বিচ্ছেদৰ খবৰে অনুৰাগীসকলক হতাশ কৰিছে। অৱশ্যে, পিক-শাকিৰাই তেওঁলোকৰ নিজৰ আৰু তেওঁলোকৰ সন্তানৰ ভৱিষ্যতৰ বিষয়ে চিন্তা কৰিয়েই ইজনে সিজনৰ পৰা পৃথক হোৱাৰ সিদ্ধান্তত অটল আছে। জনপ্ৰিয় দম্পতীয়ে তেওঁলোকৰ ১১ বছৰীয়া লিভ-ইন সম্পৰ্কত ইতি টানিছে।
কলম্বিয়ান পপ তাৰকা শাকিৰা ২০১০ চনৰ পৰা বাৰ্চিলোনাৰ ডিফেণ্ডাৰ জেৰাৰ্ড পিকৰ সৈতে লিভ-ইন সম্পৰ্কত আছে। তেওঁলোকৰ দুটা সন্তানো আছে। তেওঁলোক দুয়ো নিজ নিজ ক্ষেত্ৰত সুপ্ৰতিষ্ঠিত হোৱাৰ লগতে অতি জনপ্ৰিয়।
২০১০ চনৰ দক্ষিণ আফ্ৰিকা ক্ৰিকেট বিশ্বকাপত শাকিৰাই গোৱা ‘ৱাকা ৱাকা’ গানটোৱে বিশ্বজুৰি ব্যাপক জনপ্ৰিয়তা অৰ্জন কৰিছিল। এতিয়াও ফুটবল জগতত গানটোৱে খেলুৱৈসকলক উদ্বুদ্ধ কৰি তোলে। ফুটবলৰ পৃথিৱীত পিকৰ শক্তিশালী প্ৰতিৰক্ষাৰ বিষয়ে সকলোৱে জানে। অৱশ্যে, জেৰাৰ্ড পিকে তেওঁলোকৰ প্ৰেমৰ সম্পৰ্কটোহে ‘ডিফেণ্ড’ কৰিব নোৱাৰিলে!
বাতৰি অনুসৰি, শেহতীয়াকৈ তেওঁলোকে পৃথকে বাস কৰি আছিল। মে মাহত শাকিৰাই তেওঁৰ দুই সন্তানৰ সৈতে অকলে ভ্ৰমণলৈ গৈছিল। স্পেইনত তেওঁৰ বিৰুদ্ধে কৰ ফাঁকি দিয়াৰ অভিযোগো আছিল। অনুমান কৰা হৈছিল যে শাকিৰা এই গোচৰটোত চাপৰ সন্মুখীন হ’ব পাৰে। অৱশ্যে তাৰ পূৰ্বে পপ গায়িকাগৰাকীয়ে তেওঁৰ সংগী পিকৰ সৈতে বিবাহ বিচ্ছেদ ঘটালে।
বাতৰি ওলাইছে যে এগৰাকী মহিলাই দুয়োৰে সম্পৰ্কৰ মাজত বিচ্ছেদৰ প্ৰাচীৰ গঢ়ি তুলিছে। কিন্তু ইয়াৰ সত্যতা এতিয়াও স্পষ্ট হোৱা নাই। বিশেষকৈ তেওঁলোকেও মুখ খোলা নাই।
তেওঁলোক দুয়োজনে আনুষ্ঠানিকভাৱে এক বিবৃতিত কয়, “আমি বিচ্ছেদৰ কথা ঘোষণা কৰিছো। আমাৰ বাবে সন্তানৰ ভৱিষ্যত সকলোৰে আগত আৰু তেওঁলোকৰ মুখলৈ চায়েই এই সিদ্ধান্ত লেছে। আমি আমাৰ গোপনীয়তা অটুট ৰাখিব বিচাৰো। আশা কৰো আপোনালোকসকলোৱে আমাৰ সৈতে আছে।”