সংবাদ মাধ্যমলৈ দিয়া এটা প্ৰেছ বিবৃতিত আসাম ষ্টেট পাৱাৰ ৱ’কাৰ্চ ইউনিয়নৰ সভাপতি ব্ৰজেন বৰি ,কাৰ্যকৰি সভাপতি লীলা চাংমাই আৰু সাধাৰণ সম্পাদক অমিত কৰে বৰ্তমান কেন্দ্ৰীয় চৰকাৰে ৰাজহুৱা খণ্ডৰ বিদ্যুৎ বিতৰণ কোম্পানীসমূহ ব্যক্তিগতকৰণৰ যি ষড়যন্ত্ৰ কৰিছে তাৰ তীব্ৰ বিৰোধিতা কৰিছে।
অন্যহাতে নতুন শ্ৰমিক আইন গ্ৰহণ কৰি শ্ৰমিক প্ৰতাৰণা কৰা আৰু কৰ্তপক্ষসমূহক শ্ৰমিকক যিকানো সময়তে বিতাড়ণ কৰা সুযোগ সৃষ্টি কৰাৰো তীব্ৰ সমালোচনা কৰে নেতাত্ৰয়ে।
তদুপৰি অসম শক্তি বিতৰন কোম্পানী, অসম শক্তি উৎপাদন আৰু তিনিওটা কোম্পানীৰ উদ্ধৰ্তন কৰ্তৃপক্ষক কোম্পানীসমূহ ক্ৰমাৎ অন্ধকাৰৰ দিশলৈ গতি কৰাত ইউনিয়ণে কৰ্তৃপক্ষৰ অদক্ষ পৰিচালনাকেই দোষাৰোপ কৰে।
কাৰ্বিলাংপি জলবিদ্যুত প্ৰকল্পৰ ভূমিস্খলৰ ফলত প্ৰকল্পটোলৈ যি ভাবুকিৰ সৃষ্টি হৈছে তাৰ বাবে কৰ্তৃপক্ষই সময় মতে ব্যৱস্থা গ্ৰহণ নকৰা বুলি ইউনিয়ণে অভিযোগ কৰে। কৰ্তৃপক্ষই না দক্ষতাৰে কোম্পানী কেইটা পৰিচালনা কৰিব পাৰিছে না কৰ্মচাৰীসকলৰ মৌলিক সমস্যাসমুহ সমাধানত গুৰুত্ব দিছে বুলিও অভিযোগ উত্থাপন কৰিছে নেতাত্ৰয়ে।
ওপৰ খাপৰ বিষয়াসকলৰ পদোন্নতি সঘনাই হৈ আছে যদিও তলখাপৰ কৰ্মচাৰীসকলৰ পদোন্নতিবোৰ নানান অজুহাতত বছৰ পিচত বছৰ ধৰি গাপ দি থোৱা হৈছে অভিযোগ কৰিছে বিবৃতিৰ যোগে।
বিচিএমআৰ-কে ধৰি ক্লাৰিকেল কৰ্মচাৰীৰসকলৰ পদোন্নতি দিবলৈ আৰু ওৱান টায়াৰ কৰিবলৈ সন্মতি প্ৰকাশ কৰা পিচতো কাৰ্যকৰী নকৰাকৈ পেলাই থোৱা হৈছে।
অসম শক্তি বিতৰণ কোম্পানীৰ ব্যক্তিগতকৰণৰ যিকোনো প্ৰচেষ্টা প্ৰতিহত কৰিবলৈ, নামৰূপ পৰিবৰ্ত প্ৰকল্প, কাৰ্বিলাংপী বিদ্যুৎ প্ৰকল্পৰ ওপতৰত সময়োচিত পদক্ষেপ লোৱাৰ দাবীত আৰু কৰ্মচাৰী সকলৰ পদোন্নতিকে ধৰি দীৰ্ঘদিনীয়া সমস্যসমূহ সমাধানৰ দাবীত পাৱাৰ ৱ’কাৰ্চ ইউনিয়নে অতিশীঘ্ৰে এলানি আন্দোলনৰ কাৰ্যসূচী গ্ৰহণ কৰিব বুলি প্ৰচাৰ সম্পাদক উৎপল শইকীয়া আৰু প্ৰচাৰৰ বিশেষ দ্বায়িত্বত থকা সহঃ সাধাৰণ সম্পাদক প্ৰনৱ খাটনিয়াৰে জানিবলৈ দিয়ে।
