অসম সচিবালয় সেৱা সন্থাৰ নিৰ্বাচন! সভাপতিৰ পদত প্ৰদীপ গগৈ; পাৰ্থ হাজৰিকা পুনৰ সা: সম্পাদক

সচিবালয় সেৱা সন্থাৰ নিৰ্বাচনত সভাপতিৰ পদলৈ নিৰ্বাচিত হৈছে প্ৰদীপ গগৈ। পূৰ্বৰ সাধাৰণ সম্পাদক পাৰ্থ হাজৰিকা পুনৰ উক্ত পদলৈ নিৰ্বাচিত হয়।

অন্যান্য পদবোৰৰ ভিতৰত উপ-সভাপতি হিচাপে চন্দন কাকতী, কোষাধ্যক্ষ পদত চাহাবুদ্দিন আহমেদ, যুটীয়া সম্পাদকৰ পদত ক্ৰমে চন্দন শইকীয়া আৰু অঞ্জন বুজৰবৰুৱা নিৰ্বাচিত হৈছে। ৬ জানুৱাৰিত নিৰ্বাচনৰ ভোট গণনা হয়।

কাৰ্য্যনিৰ্বাহক পদলৈ বিনা প্ৰতিদ্বন্দ্বিতাৰে ইতিপূৰ্বে নিৰ্বাচিত হৈছিল ককিল কৃষ্ণ মহন্ত, মণ্টিম মণি বড়া, স্বপ্নালী মহন, নিপন ডেকা, পল্লৱী বৈশ্য, প্ৰণৱজ্যোতি ভূঞা, ঘনাংক ভূঞা।

সচিবালয়ত কৰ্মৰত অসম চৰকাৰৰ বিষয়া-কৰ্মচাৰীৰ অধিকাৰ আৰু কল্যাণৰ ক্ষেত্ৰত সচিবালয় সেৱা সন্থাই গুৰুত্বপূৰ্ণ ভূমিকা লৈ আহিছে।

২০১৮ চনৰ জুলাই মাহত শিক্ষা মন্ত্ৰী সিদ্ধাৰ্থ ভট্টাচাৰ্য্যই সচিবালয়ৰ এজন কৰ্মচাৰীক দুৰ্ব্যৱহাৰ আৰু নিলম্বন কৰাৰ পিছত সচিবালয় সেৱা সন্থাই এই অন্যায়ৰ প্ৰতিবাদ কৰি কৰ্মচাৰীজনৰ নিলম্বন প্ৰত্যাহাৰ কৰিবলৈ বাধ্য কৰিছিল।

সচিবালয় সেৱা সন্থাৰ হেঁচাত মুখ্য মন্ত্ৰীয়ে বিষয়টোত হস্তক্ষেপ কৰিবলৈ বাধ্য হৈছিল আৰু নিলম্বিত প্ৰাথমিক শিক্ষা বিভাগৰ জ্যেষ্ঠ প্ৰশাসনিক সহায়ক চন্দন কাকতীৰ নিলম্বন প্ৰত্যাহাৰ কৰিছিল।