তেতিয়াৰ নিৰ্বাচনী ৰণকৌশলী হিচাপে প্ৰশান্ত কিশোৰে তামিলনাডুৰ পৰা পশ্চিমবংগলৈ ইখনৰ পিছত সিখন ৰাজ্যৰ নিৰ্বাচন সন্দৰ্ভত সঠিক ভৱিষ্যদ্বাণী কৰিছিল। আনকি তেওঁৰ দাবীবোৰ সঠিক প্ৰমাণিত হৈছিল।
এইবাৰ তেওঁ নিৰ্বাচনী যুঁজত নামিছে। জন সুৰজ দলৰ প্ৰতিষ্ঠাপক প্ৰশান্ত কিশোৰে দাবী কৰিছে যে জনতা দল (ইউনাইটেড) আৰু মিত্ৰজোঁটৰ অংশীদাৰ দল বিহাৰ নিৰ্বাচনত পৰাজিত হ’ব। নীতিশ কুমাৰ নহয়, ৰাজ্যখনে নতুন মুখ্যমন্ত্ৰী পাবলৈ গৈ আছে।
শেহতীয়াকৈ এনডিটিভিৰ সৈতে হোৱা এক সাক্ষাৎকাৰত তেওঁ দাবী কৰে যে, ‘নৱেম্বৰৰ পিছত (যেতিয়া বিধানসভা নিৰ্বাচন অনুষ্ঠিত হোৱাৰ কথা আছে) নীতিশ কুমাৰ নিশ্চিতভাৱে মুখ্যমন্ত্ৰী নহয় । মই কৈছো, লিখি থওক। বিহাৰে নতুন মুখ্যমন্ত্রী পাব৷’ বিহাৰৰ ৬০ শতাংশতকৈ অধিক জনসাধাৰণে পৰিৱর্তন বিচাৰে বুলিও তেওঁ দৃঢ়তাৰে দাবী কৰে৷
কিয় তেওঁ এই দাবী কৰিছে? সাংবাদিকৰ প্ৰশ্নৰ উত্তৰত প্ৰশান্ত কিশোৰে ব্যাখ্যা দিলে, ‘বিহাৰৰ সকলোৱে জানে যে নীতিশ কুমাৰৰ মানসিক আৰু শাৰীৰিক অৱস্থা এনেকুৱা নহয় যে তেওঁ যিকোনো কাম কৰিব পাৰে। মঞ্চত কাষত বহি থকা প্ৰধানমন্ত্ৰীৰ নাম পাহৰি যোৱা, জাতীয় সংগীত বজাই থাকোঁতে সেইটো জাতীয় সংগীত নে ‘কাৱালী’ নজনা… যিজন ব্যক্তিয়ে সংবাদ মাধ্যমত এবছৰ ধৰি বক্তব্য ৰখা নাই। যিজন ব্যক্তিৰ নিজৰ যত্ন ল’ব পৰা অৱস্থা নাই… তেওঁ কেনেকৈ বিহাৰৰ কথা ভাৱিব?’
কিন্তু নীতিশ মুখ্যমন্ত্রী নহ’লেও ক্ষমতাত থাকিবনে জেডিইউ বা ইয়াৰ মিত্র দল? সেই প্ৰশ্নৰ উত্তৰত প্ৰশান্তই আৰু ডাঙৰ দাবী কৰিলেছে। তেওঁ কয়, ‘জেডিইউয়ে নিজৰ শক্তিত (বিহাৰৰ মুঠ ২৪৩খন বিধানসভাৰ আসনৰ ভিতৰত) ২৫খনতকৈও কম আসন পাবলৈ গৈ আছে। যদি এনে নহয়, তেন্তে মই ৰাজনীতি এৰি যাম। নিৰ্বাচনৰ পিছত জেডিইউৰ অস্তিত্বৰ ওপৰতে প্ৰশ্ন উত্থাপন হ’ব।’
বিহাৰৰ জনসাধাৰণে নীতিশ আৰু তেওঁৰ মিত্ৰদল বা ‘ইণ্ডিয়া’ মিত্ৰজোঁটৰ সলনি তৃতীয় শক্তি বাছি ল’ব নেকি? জন সুৰজ ক্ষমতালৈ আহিব পাৰিবনে? সেই বিষয়টো প্ৰশান্তই নিপুণভাৱে এৰাই গৈছে। তেওঁৰ ভাষাত, ‘মই মুখ্যমন্ত্ৰী পদৰ দৌৰত নাই। মই ইয়ালৈ মুখ্যমন্ত্ৰী হ’বলৈ অহা নাই। জন সুৰজ মোৰ পূৰ্বপুৰুষৰ দল নহয়। মইও ৰাজ্যিক সভাপতি বা ৰাষ্ট্ৰীয় সভাপতিও হোৱা নাই। মই বিহাৰৰ ব্যৱস্থা সলনি কৰিবলৈ আহিছো আৰু সেইটো ইতিমধ্যে আৰম্ভ হৈছে…’।
উল্লেখ্য যে চলিত বৰ্ষৰ নৱেম্বৰ-ডিচেম্বৰ মাহত বিহাৰ বিধানসভাৰ নিৰ্বাচন অনুষ্ঠিত হ’ব। ২০২৪ চনত প্ৰশান্ত কিশোৰে গঠন কৰা জন সুৰজ পাৰ্টিয়েও এই নিৰ্বাচনত প্ৰতিদ্বন্দ্বিতা কৰিবলৈ ওলাইছে। জানিব পৰা মতে কিশোৰৰ দলে প্ৰতিখন আসনত প্ৰাৰ্থী প্ৰক্ষেপ কৰিব। ইয়াৰে ৫০ শতাংশ মহিলা প্ৰাৰ্থী হ’ব বুলি দাবী কৰা হৈছে।
