পৰৱৰ্তী বিধানসভা নিৰ্বাচনলৈকে ঘৰ এৰি আশ্ৰমত সন্ন্যাস গ্ৰহণ জন সুৰজ পাৰ্টিৰ প্ৰতিষ্ঠাপক প্ৰশান্ত কিশোৰৰ
বিহাৰৰ ৰাজনীতিৰ অন্যতম চৰ্চিত নাম প্ৰশান্ত কিশোৰ পুনৰ শিৰোনামলৈ আহিছে। জন সুৰজ পাৰ্টিৰ প্ৰতিষ্ঠাপক গৰাকীয়ে পাটনাৰ নিজ বাসগৃহ এৰি পাটনাৰ উপকণ্ঠ অঞ্চলৰ ‘বিহাৰ নৱনিৰ্মান আশ্ৰম’লৈ গুচি গৈছে।
অহা চাৰে- চাৰি বছৰ অৰ্থাৎ পৰৱৰ্তী বিধানসভা নিৰ্বাচনলৈকে তাতেই থাকিব বুলি ঘোষণা কৰিছে। দাৰভাঙাত সাংবাদিকৰ সৈতে হোৱা এক সাক্ষাৎকাৰত কিশোৰে কয় যে ‘’মই যোৱা নিশা পাটনাৰ ঘৰৰ পৰা ওলাই আহিলোঁ। আই আই টি পাটনাৰ সমীপত অৱস্থিত বিহাৰ নৱনিৰ্মান আশ্ৰম এতিয়াৰে পৰা মোৰ বাসগৃহ হ’ব। জন সুৰজ পাৰ্টিয়ে শক্তিশালী ভেটি গঢ়ি তোলালৈকে মই ইয়াতেই থাকিম।”
নিৰ্বাচনত দলটোৱে লাভ কৰে মাত্ৰ ৩.৪৪ শতাংশ ভোট। ইমান বৃহৎ প্ৰচাৰ, ছ’চিয়েল মিডিয়াত বিপুল ফ’ল’ৱাৰ আৰু দীঘলীয়া পদযাত্ৰাৰ পিছতো ফলাফল ইমানেই হতাশাজনক যে বহু আসনত দলৰ প্ৰাৰ্থীয়ে নোটাতকৈও কম ভোট লাভ কৰে।
এসময়ত প্ৰশান্ত কিশোৰ ভাৰতৰ অন্যতম সফল ৰাজনৈতিক কৌশলবিদ হিচাপে পৰিচিত আছিল। ২০১৪ চনৰ নৰেন্দ্ৰ মোডীৰ প্ৰচাৰ, নীতিশ কুমাৰৰ জয়, তৃণমূল কংগ্ৰেছৰ সফলতা আৰু বহুতো ডাঙৰ অভিযানৰ আঁৰত তেওঁ আছিল।
কিন্তু যেতিয়া তেওঁ নিজে নিৰ্বাচনী ৰাজনীতিত প্ৰৱেশ কৰিলে, তেতিয়া বিহাৰৰ জটিল জাতিগত সমীকৰণ, ভোটাৰৰ মনস্তত্ত্ব আৰু সংগঠনৰ অভাৱে তেওঁক ডাঙৰ আঘাত দিলে। বহু বিশ্লেষকে কয় যে ইনষ্টাগ্ৰামত লাখ লাখ ফ’ল’ৱাৰ থকাৰ পিছতো তেওঁৰ দলটোৱে এতিয়াও তৃণমূল পৰ্যায়ৰ ৰাজনীতিত শিপাব পৰা নাই। অৱশ্যে হাৰ মানিবলৈ অনিচ্ছুক প্ৰশান্ত কিশোৰ।
তেওঁ আশ্ৰমত থকাৰ সিদ্ধান্তক দলটোক শক্তিশালী কৰাৰ প্ৰতিশ্ৰুতি হিচাপে দাঙি ধৰিছে। তেওঁ কয় যে আশ্ৰম জীৱনটো সৰলতা আৰু ভক্তিৰ প্ৰতীক, আৰু ইয়াৰ পৰাই তেওঁ দলৰ কাম-কাজ আগবঢ়াই নিব। ৰাজনৈতিক মহলত একাংশই এই পদক্ষেপক ‘গান্ধীবাদী’ শৈলী বুলি অভিহিত কৰিছে, আন কোনোৱে আগন্তুক নিৰ্বাচনৰ বাবে ই এক দীৰ্ঘম্যাদী পৰিকল্পনা বুলি কৈছে।