নিৰ্বাচনৰ পূৰ্বে ইস্তাহাৰ প্ৰকাশ কৰাটো প্ৰত্যেক দলৰে এটা অঘোষিত নিয়ম তথা সেই ইস্তাহাৰত পূৰ্বে কৰা কামসমূহ আৰু ভৱিষ্যতৰ পৰিকল্পনাৰ বিষয়ে উল্লেখ থাকে। কিন্তু এই ক্ষেত্ৰত ইস্তাহাৰ প্ৰকাশৰ নামত চৰম মিথ্যাচাৰৰ আশ্ৰয় লৈছে ৰাজ্যত শাসনাধীন বিজেপিয়ে।
যোৱা ২১ নৱেম্বৰৰ দিনা ৰাজ্যিক বিজেপিয়ে প্ৰকাশ কৰি উলিওৱা নিৰ্বাচনী ইস্তাহাৰত ‘বৰ্তমানৰ ৰাজ্য চৰকাৰখনে দিব্যাংগসকলৰ বাবে প্ৰতিমাহে ১০০০ টকাকৈ দিয়াৰ ব্যৱস্থা কৰিছে‘ বুলি স্পষ্ট ৰূপত উল্লেখ আছে। কিন্তু প্ৰকৃত সত্য কথাটো হ’ল বৰ্তমানলৈকে কাৰ্য্যকৰী হোৱা নাই এই আঁচনি। কিয়নো বৰ্তমানলৈকে এজনো দিব্যাংগই এই আঁচনিৰ অধীনত কোনো ধন লাভ কৰা নাই বুলি নৰ্থ-ইষ্ট নাওৰ সৈতে হোৱা কথা-বতৰাত সদৰী কৰিছে প্ৰতিবন্ধী সুৰক্ষা মঞ্চ, অসমৰ সাধাৰণ সম্পাদক নৃপেন মালাকাৰে।
উল্লেখযোগ্য যে, যোৱা বছৰৰ ২ ফেব্ৰুৱাৰিৰ দিনাই কলাক্ষেত্ৰত আয়োজিত এক অনুষ্ঠানত উপৰাষ্ট্ৰপতি ভেংকেয়া নাইডুৰ উপস্থিতিত এই কথা ঘোষণা কৰিছিল স্বয়ং মুখ্য মন্ত্ৰী সৰ্বানন্দ সোণোৱালে। আনহাতে, নিজৰ ন্যায্য প্ৰাপ্তিৰ দাবীত গণতান্ত্ৰিক পদ্ধতিৰে আন্দোলন কৰিও সোণোৱাল চৰকাৰৰ আৰক্ষীৰ প্ৰহাৰৰ সন্মুখীন হ’ব লগীয়া হৈছিল দিব্যাংগসকল।
পৰিৱৰ্তনৰ আশাৰে বিজেপি চৰকাৰ শাসনলৈ অহাৰ পাছতো কংগ্ৰেছ চৰকাৰৰ দৰেই বিজেপি চৰকাৰৰ পৰাও প্ৰতাৰণাৰ সন্মুখীন হ’ব লগীয়া হোৱাত ক্ষুদ্ধ হৈ পৰিছে প্ৰতিবন্ধীসকল।
এই সন্দৰ্ভত নৰ্থ-ইষ্ট নাওৰ সৈতে হোৱা কথা-বতৰাত নৃপেন মালাকাৰে কয় “সমগ্ৰ অসমত বিচাৰক, কোনো এগৰাকী দিব্যাংগই বৰ্তমানলৈকে ১০০০ টকাটো লাভ কৰা নাই।”
তেওঁ লগতে কয়, “কংগ্ৰেছ চৰকাৰক আমি আটাইতকৈ বেয়া পাওঁ, কিন্তু পৰিবৰ্তনৰ কথা কৈ শাসনৰ গাদী দখল কৰা বিজেপি চৰকাৰে দিব্যাংগসকলৰ লেখত ল’ব লগীয়া কাম কি কৰিছে যে আমি তেওঁলোকক সমৰ্থন জনাম?”
আনহাতে, বিকলাংগ সকলৰ সমন্বয় সমিতিৰ সাধাৰণ সম্পাদক ‘ৰাতুল বৰ্মনেও বিজেপি চৰকাৰৰ এনে ধৰণৰ মিথ্যাচাৰক তীব্ৰভাষাৰে গৰিহণা দিয়ে।
বৰ্মনে সংবাদ মাধ্যমৰ আগত কয়, “চৰকাৰে নিৰ্বাচনী ইস্তাহাৰত মিথ্যাচাৰৰ আশ্ৰয় লৈছে। আমি অহা ২০ ডিচেম্বৰলৈকে অপেক্ষা কৰিম, যদি দিব্যাংগসকলে ১০০০ টকাকৈ লাভ নকৰে তেনেহ’লে জংগী আন্দোলন গঢ়ি তোলা হ’ব।”
কণা হাঁহক পতান দিয়াৰ অভিযোগ
প্ৰতিবন্ধী সুৰক্ষা সংস্থাই জানিবলৈ দিয়া মতে, যোৱা বৰ্ষৰ ৩০ জুলাইতে অতিৰিক্ত মুখ্য সচিব আৰু প্ৰতিবন্ধী সংগঠনৰ লগত লগত হোৱা আলোচনা মৰ্মে দিব্যাংগসকলক ৪৪১৯টা পদত শীঘ্ৰে নিযুক্তি প্ৰদান কৰিব বুলি প্ৰতিশ্ৰুতি দিছিল। কিন্তু সেই প্ৰতিশ্ৰুতি এটা বছৰ ওকলি যোৱাৰ পাছতো কেৱল প্ৰতিশ্ৰুতি হৈয়ে ৰ’ল।
ইয়াৰ বিপৰীতে ২৯ নৱেম্বৰত পুনৰ প্ৰতিবন্ধীসকলৰ সৈতে আলোচনা কৰি সমাজ কল্যাণ বিভাগে আন এক প্ৰতিশ্ৰুতিৰ টোপ দিয়ে।
এই প্ৰতিশ্ৰুতি মতে প্ৰথম পৰ্য্যায়ত চৰকাৰৰ ২৩টা বিভাগত ৬৪০টা পদ আৰু দ্বিতীয় পৰ্য্যায়ত বাকী থকা ২৭টা বিভাগৰ ১০০০টা পদত দিব্যাংগসকলৰ বাবে অচিৰেই বিজ্ঞাপন প্ৰকাশ কৰিব।
কিন্তু চৰকাৰে পূৰ্বে ৫৭টা বিভাগত ৪৪১৯টা পদত নিযুক্তি দিয়া হ’ব বুলি যি প্ৰতিশ্ৰুতি দিছিল সেই প্ৰতিশ্ৰুতিৰ এবছৰেও একো নহ’ল।
এই লৈ প্ৰতিবন্ধসকলে প্ৰতিবাদ কৰাত পুনৰ এই বছৰৰ ২৪ জুলাইত আলোচনাৰ কৰি ২ অক্টোবৰৰ ভিতৰত বিজ্ঞাপন ছপা কৰি ২২ অক্টোবৰৰ ভিতৰত ৪৪১৯টা পদত দিব্যাংগসকলক নিযুক্তি দিয়াৰ লিখিত প্ৰতিশ্ৰুতি দিয়ে। কিন্তু আজিলৈকে সেয়াও একো বাস্তৱ ফল দেখা নাপালে প্ৰতিবন্ধীসকলে।
প্ৰতিশ্ৰুতি পালন নকৰাত ক্ষুদ্ধ হৈ ৫ অক্টোবৰৰ দিনা প্ৰতিবন্ধী সুৰক্ষা মঞ্চই গণতান্ত্ৰিকভাৱে প্ৰতিবাদ কৰোঁতেই আৰক্ষীৰ বৰ্বৰ আক্ৰমণৰ সন্মুখীন হ’ব লগীয়া হয় দিব্যাংগসকল।
এতিয়া পুনৰ ২৯ নৱেম্বৰৰ আলোচনাৰ সময়ত সমাজ কল্যাণ বিভাগৰ মন্ত্ৰী প্ৰমীলাৰাণী ব্ৰহ্মই প্ৰথম পৰ্য্যায়ত কেৱল ৬৪০টা পদত নিযুক্তিৰ বাবে বিজ্ঞাপন প্ৰকাশ কৰিম বুলি পুনৰ লিখিত প্ৰতিশ্ৰুতি দিলেও আশ্বস্ত হ’ব পৰা নাই প্ৰতিবন্ধী সুৰক্ষা সংস্থা।
“এই প্ৰতিশ্ৰুতি ৰক্ষা কৰিলেও পূৰ্বৰ ৪৪১৯টা পদত নিযুক্তিৰ প্ৰতিশ্ৰুতিৰ ঠাইত এয়া হ’ব কণা হাঁহক পতান তথা এপাচি শাকত এটা জালুকৰ দৰে।” প্ৰতিবন্ধী সুৰক্ষা সংস্থা, অসমৰ সাধাৰণ সম্পাদকগৰাকীয়ে নৰ্থ-ইষ্ট নাওৰ আগত কয়, “এনে ধৰণৰ লিখিত প্ৰতিশ্ৰুতি আমি পূৰ্বেও বহুবাৰ পালো। পূৰ্বে এনে ধৰণে আশ্বাস দি অহা হৈছিল যদিও আমাৰ একো দাবীয়ে পূৰণ কৰিব পৰা নাই চৰকাৰখনে।”
সাধাৰণ সম্পাদকজনে আমাক জানিবলৈ দিয়ামতে, অহা ৩ ডিচেম্বৰৰ দিনা ৰাজ্য চৰকাৰৰ উদ্যোগত আয়োজিত হ’ব লগীয়া ‘প্ৰতিবন্ধী দিৱস’ বৰ্জন কৰি প্ৰতিবন্ধী সুৰক্ষা সংস্থাৰ ফালৰ পৰা ‘প্ৰতাৰণা দিৱস’ উদযাপন কৰাৰ সিদ্ধান্ত লৈছে।
