ভাৰতৰ ৰাষ্ট্ৰপতি দ্ৰৌপদী মুৰ্মুয়ে কেৰালা ভ্ৰমণৰ সময়ত এক বৃহৎ দুৰ্ঘটনাৰ পৰা কথমপি ৰক্ষা পৰে। বুধবাৰে পুৱা তেওঁৰ হেলিকপ্টাৰ অৱতৰণ কৰি থকাৰ সময়তে হেলিপেডখনৰ এটা অংশ ভাঙি পৰে। সেই সময়ত হেলিকপ্টাৰখন নিয়ন্ত্ৰণৰ বাহিৰলৈ গৈছিল যদিও পাইলটৰ দক্ষতা আৰু উপস্থিত নিৰাপত্তাৰক্ষীৰ তৎপৰতাৰ বাবে এক বৃহৎ বিপদৰ ৰক্ষা পৰে। কেৰালাৰ পাঠানামথিটা জিলাৰ প্ৰমাদম ষ্টেডিয়ামত সংঘটিত হৈছে এই ঘটনা।
সূত্ৰ অনুসৰি, ৰাষ্ট্ৰপতিৰ হেলিকপ্টাৰ অৱতৰণ কৰাৰ কিছু সময়ৰ পিছতে নতুন হেলিপেডটোৰ এটা অংশ ভাঙি পৰে। অতিৰিক্ত ওজনৰ বাবে হেলিকপ্টাৰখনৰ পিছফালৰ অংশ তললৈ বহি গৈছিল। পৰিস্থিতিৰ সৈতে মোকাবিলা কৰিবলৈ অগ্নিনিৰ্বাপক বাহিনী আৰু আৰক্ষীৰ লোকে দ্ৰুতগতিত নামি পৰে।
ভিডিঅ’ ফুটেজত দেখা গৈছে যে বিষয়াসকলে নিৰাপত্তাৰ বাবে ভাঙি পৰা ঠাইটোৰ পৰা হেলিকপ্টাৰখন ঠেলি নিছে। কেইমিনিটমানৰ চেষ্টাৰ অন্তত হেলিকপ্টাৰখন নিৰাপদ স্থানলৈ লৈ যোৱা হয়। দুৰ্ঘটনা সংঘটিত হোৱাৰ সময়ত পাইলটৰ বাহিৰে হেলিকপ্টাৰখনৰ ভিতৰত আছিল ৰাষ্ট্ৰপতি দ্ৰৌপদী মুৰ্মু। সৌভাগ্যক্ৰমে এই ঘটনাত কোনো লোক আহত হোৱা নাই বা ডাঙৰ ক্ষতি হোৱা নাই।
জানিব পৰা মতে, ৰাষ্ট্ৰপতি মুৰ্মু বৰ্তমান চাৰিদিনীয়া কেৰালা ভ্ৰমণত আছে। মঙলবাৰে সন্ধিয়া তেওঁ তিৰুৱনন্তপুৰমত উপস্থিত হয়। বিমানবন্দৰত তেওঁক আদৰণি জনায় কেৰেলাৰ মুখ্যমন্ত্ৰী পিনাৰায় বিজয়ন, ৰাজ্যপাল ৰাজেন্দ্ৰ বিশ্বনাথ আৰ্লেকাৰৰ লগতে কেইবাগৰাকীও ৰাজ্যিক মন্ত্ৰীয়ে।
বুধবাৰে পুৱা তেওঁ সবৰীমালা মন্দিৰলৈ ৰাওনা হয়। সেই সময়ত প্ৰামাদম ষ্টেডিয়ামত সংঘটিত হৈছিল এই দুৰ্ঘটনা। ইয়াৰ পিছত যেতিয়া পৰিস্থিতি স্বাভাৱিক হ’ল, তেতিয়া তেওঁ ৰাস্তাৰে গন্তব্যস্থানলৈ ৰাওনা হ’ল।
ট্ৰাভানকোৰ দেৱস্বম ব’ৰ্ডৰ বিষয়াসকলে কয় যে ৰাষ্ট্ৰপতিৰ ভ্ৰমণৰ সকলো ব্যৱস্থা আগতীয়াকৈ কৰা হৈছে। পৰিকল্পনা অনুযায়ী স্বামী আয়্যাপ্পান পথ আৰু পৰম্পৰাগত ট্ৰেকিং পথেৰে পাঁচখন গাড়ী আৰু এম্বুলেন্সৰ কনভয়ত তেওঁ সান্নিধানম পাব লাগিছিল। মন্দিৰ পৰিদৰ্শন কৰি ৰাষ্ট্ৰপতিগৰাকী তিৰুৱনন্তপুৰমলৈ উভতি অহাৰ কথা।
ঘটনাৰ পিছতে প্ৰশাসনে এই সন্দৰ্ভত সম্পূৰ্ণ প্ৰতিবেদন বিচাৰিছে। কেনেদৰে হেলিপেড ভাঙি গ’ল সেই সন্দৰ্ভতো তদন্ত আৰম্ভ কৰা হৈছে। স্থানীয় বিষয়াসকলে জনোৱা মতে, তৎপৰতাৰ বাবেই এক বৃহৎ দুৰ্ঘটনা ৰোধ কৰিব পৰা গ’ল।
বৰ্তমান ৰাষ্ট্ৰপতি নিৰাপদ আৰু এতিয়াৰ বাবে তেওঁৰ ভ্ৰমণৰ সময়সূচীত কোনো পৰিৱৰ্তন হোৱা নাই। যদিও এই কাণ্ডই সমগ্ৰ ৰাজ্যতে উদ্বেগ বিয়পাইছে, তথাপিও পৰিস্থিতি চম্ভালিবলৈ নিৰাপত্তাৰক্ষীৰ তৎপৰতা আৰু ভূমিকাক প্ৰশংসা কৰা হৈছে।
