তৃতীয় পৰ্য্যায়ৰ ভোটগ্ৰহণৰ সময়ত উপযুক্ত নথি অবিহনেই ভোট দিবলৈ কিছু সংখ্যক লোকক অনুমতি দিয়া এজন নিৰ্বাচনী বিষয়াক গৌৰীপুৰ আৰক্ষীয়ে ২৩ গ্ৰেপ্তাৰ কৰিছে।
৭৪৩ নং বাণী বিদ্যা মন্দিৰ প্ৰাথমিক বিদ্যালয়ৰ ভোটকেন্দ্ৰটোত নিৰ্বাচনী বিষয়া হিচাপে দায়িত্ব পালন কৰা লোকজনৰ নাম গৌৰ প্ৰসাদ বৰ্মন। ভোটকেন্দ্ৰটো গৌৰীপুৰ আৰক্ষী থানাৰ অধীনৰ মধুশৌলমাৰি পাৰ্ট-১-অত পৰে।
তেওঁৰ এই জঘন্য কাণ্ডৰ বিৰুদ্ধে ছেক্টৰ বিষয়া মৃণ্ময় দাসে ৰিপ’ৰ্ট দাখিল কৰাৰ পিছতে তেওঁক আৰক্ষীয়ে গ্ৰেপ্তাৰ কৰে।
অভিযুক্ত বিষয়াজনে ভোটাৰসকলক কেৱল বুথ লেবেল অফিচাৰে দিয়া শ্লিপ চায়েই আন কোনো প্ৰয়োজনীয় আৰু নিৰ্বাচন আয়োগে নিৰ্ধাৰণ কৰি দিয়া বৈধ নথি নোচোৱাকৈয়ে ভোটদানৰ অনুমতি দিয়া বুলি অভিযোগ উঠিছে।
তেওঁক গ্ৰেপ্তাৰ কৰাৰ পিছতে তেওঁৰ ঠাইত তৎকালীনভাৱে সন্তোষ চন্দ্ৰ দাস নামৰ আন এজনক স্থলাভিষিক্ত কৰা হয়।
ভোটগ্ৰহণ কেন্দ্ৰটো ধুবুৰী লোকসভা সমষ্টিৰ অন্তৰ্গত। সমষ্টিটোত তৃতীয় পৰ্য্যায়ত, অৰ্থাৎ ২৩ এপ্ৰিলত ভোটগ্ৰহণ প্ৰক্ৰিয়াৰ সময়তে এই কাণ্ড সংঘটিত হৈছিল।
তৃতীয় পৰ্য্যায়ৰ ভোটগ্ৰহণ ৰাজ্যখনৰ মুঠ ৪টা সমষ্টিত হৈছিল। ধুবুৰীৰ উপৰি কোকৰাঝাৰ, বৰপেটা আৰু গুৱাহাটীত হৈছিল তৃতীয় পৰ্য্যায়ত ভোটগ্ৰহণ। চাৰিওটা সমষ্টিৰ ভিতৰত ধুবুৰীতে ভোটদানৰ হাৰ সৰ্বাধিক ৮৬.৯৪ শতাংশ। তৃতীয় পৰ্য্যায়ৰ ভোটগ্ৰহণৰ লগে লগে অসমৰ লগতে সমগ্ৰ উত্তৰ-পূবতে সপ্তদশ লোকসভা নিৰ্বাচনৰ ভোটগ্ৰহণ প্ৰক্ৰিয়াৰ অন্ত পৰে।
