কৰ’না সংক্ৰমন ৰোধৰ বাবে প্ৰধানমন্ত্ৰী নৰেন্দ্ৰ মোডীয়ে ২৪ মাৰ্চৰ পৰা ঘোষনা কৰিছিল ২১ দিনীয়া লকডাউন ৷
এই লকডাউনৰ সময়চোৱাত জৰুৰীকালীনসেৱা সমূহৰ লগতে গেলামাল দোকান আৰু ফাৰ্মাচী সমূহ খোলা ৰখা হৈছে ৷
লকডাউনৰ মাজতে অত্যাৱশ্যকীয় সামগ্ৰী কিনিবলৈ জনসাধৰণ ওলাই আহিছে। কিন্তু গেলামাল দোকানত সামগ্ৰীৰ মূল্যবৃদ্ধিয়ে একপ্ৰকাৰ জনতাৰ মূৰত ৰামটাঙোন শোধাইছে ৷
লকডাউনৰ সময়ত যাতে অত্যাৱশকীয় সামগ্ৰীৰ মুল্যবৃদ্ধি নঘটে তাৰ বাবে খাদ্য আৰু অসামৰিক যোগান বিভাগৰ পৰা ব্যৱস্থা লোৱা হৈছিল ৷
একাংশ বিষয়াক মন্ত্ৰী ফনীভূষণ চৌধুৰীয়ে দায়িত্বও দিছিল যদিও এনে বিষয়াৰ দায়িত্বহীনতাৰ বাবেই বৃদ্ধি পাইছে খাদ্য সামগ্ৰীৰ মূল্য ৷ কিন্তু এই সময়ত খবৰ নাই বিভাগীয় মন্ত্ৰী গৰাকীৰ ৷
বজাৰত বৰ্তমান আলু ২৫ ৰ পৰা ৩০ টকা, ১৪০ টকীয়া কনীৰ প্লেট ২০০ ৰ পৰা ২৫০ টকা, ৩০ টকাৰ চাউল বিক্ৰী হৈছে ৪০ৰ পৰা ৪৫ টকাত ৷ ২০ টকীয়া পিঁয়াজ এতিয়া ৪০ টকা ৷ মুঠতে বৰ্তমান বজাৰত যেন জুই লাগিছে ৷
যোগান মন্ত্ৰী ফনীভূষণ চৌধুৰীয়ে কৈছিল যে লকডাউন আৰু ১৪ দিন আছে ৷ সামগ্ৰী আহি আছে, আহি থাকিব ৷ আপোনালোকে যদি ৰাষ্ট্ৰীয় ঘাইপথ অথবা ষ্টেশ্যনত যায় তেতিয়া গম পাব খাদ্য সমগ্ৰী আহি আছে ৷ ফলত লকডাউনৰ সময়ছোৱাত খাদ্যসামগ্ৰীৰ অভাৱ নহয় ৷
কিন্তু একাংশ খুচুৰা ব্যৱসায়ীয়ে জনোৱা অনুসৰি কনী এতিয়া পাবলৈয়ে টান ৷ এখন দোকান খোলা থাকে তাতো হেতা-ওপৰাকৈ লব লাগে৷ দাম সোধাৰ প্ৰশ্নই নাহে।
এতিয়া প্ৰশ্ন হয় লকডাউনৰ বাবে একাংশ ক’লা ব্যৱসায়ীয়ে চলাইছে নেকি চিণ্ডিকেটৰাজ ৷ এনে এক জটিল পৰিস্থিতিটো নীৰৱ হৈ আছে যোগান বিভাগ ৷
যি সময়ত অসমৰ স্বাস্থ্য মন্ত্ৰী হিমন্ত বিশ্ব শৰ্মাই দিন ৰাতি একাকাৰ কৰি অসমবাসীৰ ওচৰত থিয় হৈছে, সেই সময়ত যেন একাংশ বিষয়াক দায়িত্ব দি শুই আছে মন্ত্ৰী ফনীভূষণ চৌধুৰী ৷
