প্ৰধানমন্ত্ৰী নৰেন্দ্ৰ মোদীৰ প্ৰতি অধিক আক্ৰমণাত্মক হৈছে কংগ্ৰেছ নেতা ৰাহুল গান্ধী।
লাডাখৰ ভাৰত-চীন সীমান্তকলৈ নিৰন্তৰ চৰকাৰ আৰু মোদীৰ বিৰুদ্ধো সোচ্চাৰ হৈ থকা কংগ্ৰেছ নেতাগৰাকীয়ে এইবাৰ প্ৰধানমন্ত্ৰী নৰেন্দ্ৰ মোদীক কটাক্ষ কৰি কয় যে মোদীৰ ব্যৰ্থতাই আগন্তুক দিনত হাৰ্ভাড বিজনেছ স্কুলত গৱেষণাৰ বাবে ঠাই পাব।
বিৰোধী সাংসদ ৰাহুল গান্ধীৰ মতে, প্ৰধানমন্ত্ৰী মোদীৰ কোভিড পৰিস্থিতিৰ মোকাবিলা, নোটবন্দী আৰু জি এছ টি আদি ব্যৰ্থতাই এদিন হাৰ্ভাডৰ গৱেষণা বিষয়ৰূপে স্থান পাব।
প্ৰধানমন্ত্ৰী নৰেন্দ্ৰ মোদীয়ে মাৰ্চত ঘোষণা কৰিছিল যে ‘মহাভাৰতৰ যুদ্ধ জয়ী হ’বলৈ ১৮ দিনৰ সময় লাগিছিল আৰু ক’ৰ’না ভাইৰাছৰ বিৰোধী যুঁজখনত জয়ী হ’বলৈ ভাৰতক মাত্ৰ ২১ দিনহে লাগিব।’
কিন্তু প্ৰধানমন্ত্ৰীৰ এই ঘোষণাক অসাৰ প্ৰতিপন্ন কৰি বিগত চাৰি মাহে ক’ৰ’না ভাইৰাছে অপ্ৰতিৰোধ্য গতিৰে সংক্ৰমণ ঘটি দেশত আতংকৰ সৃষ্টি কৰিছে।
ইমানেই নহয় ভাৰত এতিয়া বিশ্বৰ সৰ্বাধিক ক’ৰ’নাক্ৰান্তৰ তৃতীয়খন দেশত পৰিণত হৈছে। ৬.৯৭ লাখৰো অধিক লোক ক’ৰ’নাত আক্ৰান্ত হৈছে দেশত।
ইয়াৰ পিছতে টুইটাৰ যোগে ৰাহুল গান্ধীয়ে প্ৰধানমন্ত্ৰী নৰেন্দ্ৰ মোদীক আক্ৰমণ কৰে।
টুইটাৰৰ ভিডিঅ’টোত ৰাহুল গান্ধীয়ে কয় যে, “কোভিড১৯, নোটবন্দী আৰু জি এছ টিৰ ব্যৰ্থতাই আগন্তুক দিনত হাৰ্ভাড বিজনেছ স্কুলত গৱেষণাৰ বাবে স্থান লাভ কৰিব।”
ৰাহুল গান্ধীৰ এই ভিডিঅ’ পোষ্টটোৰ পিছতে দেশৰ ৰাজনৈতিক মহলত তোলপাৰ লাগিছে।
বিজেপিৰ ৰাষ্ট্ৰীয় অধ্যক্ষকে আদি কৰি বহু বিজেপি নেতাই ৰাহুল গান্ধীক আক্ৰমণ কৰা দেখা গৈছে।