৮টা প্ৰকল্প মুকলিৰ লগতে আন কেইবাটাৰো আধাৰশিলা স্থাপনেৰে মণিপুৰত শুকুৰবাৰে বিজেপিৰ ’১৯ৰ লোকসভাৰ নিৰ্বাচনী প্ৰচাৰ আৰম্ভ কৰে প্ৰধান মন্ত্ৰী নৰেন্দ্ৰ মোদীয়ে।
ভাৰত-ম্যানমাৰ সীমান্তৰ ম’ৰেত সংহত তালাচী চকী, মেৰাওৰিত এটা বান্ধৰ লগতে নিৰ্বাচনী সভাখনত মোদীয়ে মুকলি কৰা আন প্ৰকল্পকেইটা হৈছে ইম্ফল ইস্তত ভাৰতীয় খাদ্য নিগমৰ এটা গুদাম, উখৰুল জিলাত এটা জলভাণ্ডাৰ, চুৰাচান্দপুৰ জিলাত এটা নৱীকৃত জল যোগান প্ৰকল্প, কাংপকপি জিলাত এটা ইক’ টুৰিজম ভৱন আৰু উখৰুলৰ জৱাহৰ নৱোদয় বিদ্যালয়ৰ এটা পানী যোগান আঁচনি।
একেখন সভাতে মোদীয়ে আধাৰশিলা স্থাপন কৰা ৪টা প্ৰকল্প হ’ল ইম্ফলৰ ধানামাঞ্জুৰি বিশ্ববিদ্যালয়ৰ আন্তঃগাঁথনি উন্নয়ন, ইম্ফল ৱে’স্ত জিলাৰ এখন ফুটবলৰ ফিল্দৰ এস্ত্ৰ’ তাৰ্ফ, ৪০০ কে’ভি ক্ষমতাসম্পন্ন শিলচৰ-ইম্ফল বিদ্যুৎ পৰিবাহী লাইন, খুমান লুপাক ক্ৰীড়া প্ৰকল্পত দুটা ফ্লাদ লাইট ব্যৱস্থা।
প্ৰকল্প মুকলি আৰু আধাৰশিলা স্থাপনৰ পিছতে ইম্ফলৰ জনসভাত প্ৰায় ৩৫ মিনিটৰ ভাষণ প্ৰদান কৰে মোদীয়ে।
ইফালে ইম্ফলৰ ৰাজীৱ ভৱনত এক সংবাদমেলযোগে প্ৰাক্তন মুখ্য মন্ত্ৰী তথা বিৰোধী কংগ্ৰেছৰ দলপতি অ’ক্ৰাম ইববি সিঙে মোদী আৰু বিজেপিৰ পৰা পূৰ্বৰ প্ৰতিশ্ৰুতিসমূহ সন্দৰ্ভত স্পষ্টীকৰণ বিচাৰে।
অন্যান্য প্ৰতিশ্ৰুতিৰ লগতে ৰাজ্যখনৰ কৰ্মচাৰীসকলক ৭ম দৰমহা আয়োগ অনুসৰি দৰমহা প্ৰদানৰ ঘোষণা সন্দৰ্ভতো প্ৰশ্ন তুলিছে কংগ্ৰেছে।
ইফালে মণিপুৰৰ সশস্ত্ৰ উগ্ৰপন্থী সংগঠনসমূহে মোদীৰ ভ্ৰমণ বয়কট কৰাৰ ফলত ৰাজধানী চহৰ ইম্ফলৰ বাট-পথ শূন্য হৈ পৰা পৰিলক্ষিত হয়।
