বিজেপিৰ নিৰ্বাচনী প্ৰস্তুতিত সাৰ-পানী যোগাবলৈ ২৩ জানুৱাৰিত অসমলৈ প্ৰধান মন্ত্ৰী নৰেন্দ্ৰ মোদী!
অসম বিধানসভা নিৰ্বাচনৰ দিন চমু চাপি অহাৰ লগে লগে শাসনভাৰ পুনৰ এবাৰ দখল কৰাৰ ৰণনীতি প্ৰস্তুত কৰি তুলিছে ভাৰতীয় জনতা পাৰ্টিয়ে।
এই উদ্দেশ্যে প্ৰধান মন্ত্ৰী নৰেন্দ্ৰ মোদীয়ে অহা ২৩ জানুৱাৰিত অসমলৈ আহিব পাৰে বুলি মন্তব্য কৰিছে কেবিনেট মন্ত্ৰী হিমন্ত বিশ্ব শৰ্মাই।
সোমবাৰে নিশা সংবাদ মাধ্যমৰ আগত মন্তব্য কৰি শৰ্মাই কয় যে তেওঁৰ ভ্ৰমণ এতিয়াও নিশ্চিত হোৱা নাই যদিও এপ্ৰিলত হ’বলগীয়া বিধানসভা নিৰ্বাচনৰ পূ্ৰ্বে তেওঁ অসম ভ্ৰমণ কৰিব আৰু দলীয় কৰ্মী আৰু নেতাসকলৰ মনোবল বৃদ্ধি কৰিব।
ইয়াৰ উপৰি মন্ত্ৰী শৰ্মাই লগতে কয় যে অলপতে অসম ভ্ৰমণ কৰি যোৱা গৃহ মন্ত্ৰী অমিত শ্বাহে অহা ২৪ জানুৱাৰিত পুনৰ অসমলৈ আহিব আৰু সেই দিনটোত কোকৰাঝাৰ আৰু নলবাৰীত এক বিশাল ৰাজহুৱা সভা অনুষ্ঠিত কৰিব পাৰে।
ইফালে সোমবাৰে দুদিনীয়া ভ্ৰমণ কাৰ্যসূচীলৈ অসমত উপস্থিত হৈছে বিজেপিৰ ৰাষ্ট্ৰীয় অধ্যক্ষ জেপি নাড্ডা।
সোমবাৰে পোনে পোনে তেওঁ শিলচৰত উপস্থিত হৈ এখন বিশাল জনসভা সম্বোধন কৰিছিল। ইয়াৰ পিছত নিশা আমিনগাঁৱৰ গড়কাপ্তানি বিভাগৰ পৰিদৰ্শন বঙলাত বিজেপিৰ শীৰ্ষ নেতৃত্বৰ সৈতে আগন্তুক বিধানসভা নিৰ্বাচন সন্দৰ্ভত গুৰুত্বপূৰ্ণ আলোচনাত মিলিত হয়।