ভাৰতে আৰু পাৰমাণৱিক যুদ্ধৰ ভাবুকি সহ্য নকৰে। স্বাধীনতা দিৱসৰ ভাষণ প্ৰদান কৰি প্ৰধানমন্ত্ৰী নৰেন্দ্ৰ মোদীয়ে স্পষ্ট হুংকাৰ প্ৰদান কৰে। মোদীয়ে লালকিল্লাৰ পৰা ঘোষণা কৰে যে ভাৰতে পাৰমাণৱিক যুদ্ধৰ ভাবুকি আহিলেও আৰু সহ্য নকৰে।
উল্লেখ্য যে বিগত কিছুদিন ধৰি পাকিস্তানৰ সেনা প্ৰধান আছিম মুনীৰকে ধৰি কেইবাজনো পাকিস্তানী নেতাই পাৰমাণৱিক যুদ্ধৰ ভাবুকি প্ৰদান কৰিছে। স্বাধীনতা দিৱসৰ দিনা চুবুৰীয়া দেশক তাৰ উপযুক্ত উত্তৰ দিলে মোদীয়ে।
দেশৰ উদ্দেশ্যি দিয়া ভাষণৰ আৰম্ভণিতে মোদীয়ে অপাৰেচন সিন্দুৰৰ প্ৰশংসা কৰে। তেওঁ হুংকাৰ দি কয়, “শত্ৰুক তেওঁলোকে কল্পনা কৰাতকৈও অধিক শাস্তি দিছো। সেনাই যি কাম কৰি দেখুৱাইছে সেয়া পাকিস্তানে বহুদিনলৈ মনত ৰাখিব। সন্ত্ৰাসবাদী আৰু তেওঁলোকক সমৰ্থন কৰাসকলক পৃথকভাৱে নাচাও। ভাৰতে আৰু পাৰমাণৱিক যুদ্ধৰ ভাবুকি সহ্য নকৰে।”
পুৱা ৭:৩০ বজাত লালকিল্লাত পতাকা উত্তোলন কৰে প্ৰধানমন্ত্ৰী নৰেন্দ্ৰ মোদীয়ে। অপাৰেচন সিন্দুৰৰ সফলতা উদযাপনৰ বাবে ভাৰতীয় বায়ুসেনাৰ এক বিশেষ ফ্লাইপাষ্ট দেখা যায়। আকাশৰ ওপৰেৰে উৰি গ’ল দুখন এম আই-১৭ বিমান। এখন বিমানত ৰাষ্ট্ৰীয় পতাকা আছিল, আনখনত অপাৰেচন সিন্দুৰৰ ল’গ’ আছিল।
তাৰ পিছতে স্বাধীনতা দিৱসৰ ভাষণ আৰম্ভ কৰে প্ৰধানমন্ত্ৰীয়ে। প্ৰধানমন্ত্ৰী নৰেন্দ্ৰ মোদীয়ে দ্বাদশ বাৰৰ বাবে লালকিল্লাত স্বাধীনতা দিৱসৰ ভাষণ প্ৰদান কৰে। প্ৰধানমন্ত্ৰীয়ে সংবিধান প্ৰণয়নকাৰীসকলক শ্ৰদ্ধাঞ্জলি জ্ঞাপন কৰে। ভাষণৰ আৰম্ভণিতে শ্যামা প্ৰসাদ মুখাৰ্জীৰ নাম উল্লেখ কৰে মোদীয়ে।
ভাষণত প্ৰধানমন্ত্ৰীয়ে কয় যে অপাৰেচন সিন্দুৰৰ পিছত ভাৰত চৰকাৰে সিন্ধু চুক্তি বাতিল কৰাৰ সিদ্ধান্ত সলনি কৰা নহ’ব। প্ৰধানমন্ত্ৰী নৰেন্দ্ৰ মোদীয়ে স্বাধীনতা দিৱসৰ দিনাই লালকিল্লাৰ পৰা দিয়া ভাষণত সেই কথা স্পষ্ট কৰি দিয়ে। পাকিস্তানলৈ প্ৰধানমন্ত্ৰীৰ কঠোৰ বাৰ্তা, “তেজ আৰু পানী একেলগে বৈ যাব নোৱাৰে। আমি কোনো ধৰণে একপক্ষীয় সিন্ধু চুক্তি সহ্য নকৰো।”
লালকিল্লাৰ পৰা প্ৰধানমন্ত্ৰীৰ কয়, “আমি কোনো কাৰণতে সিন্ধু চুক্তিৰ দৰে অন্যায় আৰু একপক্ষীয় চুক্তি মানি নলওঁ। মোৰ দেশৰ ভূমিত বৈ যোৱা নদীখন, ভাৰতৰ মাটিৰ মাজেৰে বৈ যোৱা নদীখন কেৱল আমাৰ দেশৰ জীৱিকা নিৰ্বাহকসকলৰহে।”
পাকিস্তানলৈ প্ৰধানমন্ত্ৰীৰ স্পষ্ট বাৰ্তা হ’ল, “আমি সিন্ধু চুক্তিৰ বৰ্তমানৰ চৰ্তসমূহ মানি নলওঁ। কৃষকৰ সুবিধাৰ্থে, দেশৰ স্বাৰ্থত আমি এই চুক্তি কোনো ধৰণে মানি নলওঁ।”
