দিউক অৱ ইয়ৰ্ক ৰাজকুমাৰ এন্দ্ৰুৱে যৌন কেলেংকাৰিজনিত অভিযোগৰ দুৰ্নামৰ বাবে ৰাজ কৰ্তব্য (royal duties)ৰ পৰা অব্যাহতি লৈছে।
এমেৰিকান আদালতত দোষী সাব্যস্ত হোৱা শেহতীয়াকৈ আত্মহত্যা কৰা মাৰ্কিন যৌনবেপাৰী জেফ্ৰি এপষ্টেইনৰ সৈতে এন্দ্ৰুৰ চিনাকিয়ে ইউ কেত ৰাজ পৰিয়ালত “গুৰুতৰ সমস্যা” সৃষ্টি কৰিছে।
আৰু সেই কথা স্বীকাৰ কৰি ৰাজকুমাৰ এন্দ্ৰুৱে ইউ কেৰ সম্ৰাজ্ঞী, মাক কুইন এলিজাবেথ-iiৰ পৰা অব্যাহতি বিচাৰিছিল আৰু ৰাণীয়ে তাত অনুমোদন জনাইছে।
ঘটনাটোৰ সময় খুব তাৎপৰ্য্যপূৰ্ণ। ইউ কেত অহা ডিচেম্বৰত সাধাৰণ নিৰ্বাচন আছে। ব্ৰেক্সিট বিতৰ্কই উত্তাল কৰি ৰখা ইউ কেৰ নিৰ্বাচনী বতৰৰ সংবাদ শিৰোনাম তৎক্ষণাত ৰাজপৰিয়ালে দখল কৰিছে।
১৯২৩ চনৰ পিছত এয়ে প্ৰথমবাৰৰ বাবে ইউ কেত আগতীয়া সাধাৰণ নিৰ্বাচন হ’বলৈ গৈছে।
ভূতৰ ওপৰত দানহৰ দৰে এমেৰিকান এপষ্টেইন স্কেন্দেলৰ “বলি” এগৰাকী ভাৰ্জিনিয়া জিআফ্ৰে (ভাৰ্জিনিয়া ৰবাৰ্টছ বুলিও জনাজাত) নামৰ মহিলাগৰাকীয়ে এন্দ্ৰুৰ নাম লৈছে।
ভাৰ্জিনিয়াই কৈছে, এপষ্টেইনৰ নিউ ইয়ৰ্ক চিটি আৰু লণ্ডনৰ ঘৰত ২০০১ চনত ১৭ বছৰীয়া ভাৰ্জিনিয়াৰ সৈতে ৰাজকুমাৰ এন্দ্ৰুৱে ছেক্স কৰিছিল।
কথাটো ৰাজকুমাৰ এন্দ্ৰুৱে অস্বীকাৰ কৰিছে আৰু এইক্ষেত্ৰত তদন্তকাৰী সংস্থাৰ সৈতে সহযোগিতা আগবঢ়াব বুলি কৈছে।
এপষ্টেইন স্কেন্দেলৰ তদন্ত কৰি আছে এফ বি আয়ে। বহুতে এতিয়া কৈছে এমেৰিকান তদন্তকাৰী সংস্থাটোৱে ৰাজকুমাৰ এন্দ্ৰুকো তদন্তত সাঙুৰিব লাগে।
A statement by His Royal Highness The Duke of York KG. pic.twitter.com/LfMFwMyhcb
— The Royal Family (@RoyalFamily) November 20, 2019
এন্দ্ৰুৱে ১৯৮৬ চনত বিয়া পাতিছিল চাৰা ফাৰ্গুছনক। তেওঁলোকৰ দুজনী ছোৱালী ৰাজকুমাৰী বিয়াত্ৰিছ আৰু ৰাজকুমাৰী ইউজিনি। ১৯৯৬ চনত তেওঁৰ বিবাহ বিচ্ছেদ ঘটিছিল।
৫৯ বছৰীয়া এন্দ্ৰু কুইন এলিজাবেথ আৰু প্ৰিন্স ফিলিপৰ তৃতীয় সন্তান আৰু দ্বিতীয় পুত্ৰ।
