কংগ্ৰেছ নেত্ৰী প্ৰিয়ংকা গান্ধীয়ে শুকুৰবাৰে (২০ ফেব্ৰুৱাৰী) অসমৰ মুখ্যমন্ত্ৰী হিমন্ত বিশ্ব শৰ্মাক সমালোচনা কৰি কয় যে কংগ্ৰেছৰ মুখ্যমন্ত্ৰী হোৱাৰ সম্ভাৱনা সন্দৰ্ভত “১০ বছৰ পুৰণি” বিষয় উত্থাপন কৰাৰ পৰিৱৰ্তে তেওঁ চাকৰি, উন্নয়ন আৰু অহা ৫ বছৰৰ পৰিকল্পনাৰ কথা কোৱা উচিত।
সাংবাদিকক সম্বোধন কৰি প্ৰিয়ংকা গান্ধীয়ে ২০১৪ চনত অসমৰ কংগ্ৰেছৰ মুখ্যমন্ত্ৰী হিচাপে শপত লোৱাৰ উপক্ৰম হোৱা বুলি শৰ্মাই কৰা দাবীক খাৰিজ কৰি এই মন্তব্য কৰে।
তেওঁ কয়, ‘’ৰাজনীতিত বহু সিদ্ধান্ত লোৱা হয়। কোনোবাটো সপক্ষে যায়, কোনোবাটো বিপক্ষে যায়। আমি ইয়াক সহ্য কৰিব লাগিব। যদি তেওঁ এতিয়াও ১০ বছৰ পুৰণি এটা বিষয়ক লৈ কান্দি আছে তেন্তে মই আৰু কি ক’ম।’’
চলিত সপ্তাহৰ আৰম্ভণিতে মুখ্যমন্ত্ৰী শৰ্মাই অভিযোগ কৰিছিল যে ২০১৪ চনত ৫৮ গৰাকী বিধায়কে তেওঁক সমৰ্থন কৰাৰ পিছত তেতিয়াৰ কংগ্ৰেছ সভানেত্ৰী ছোনিয়া গান্ধীয়ে তেওঁক শপতগ্ৰহণৰ তাৰিখ নিৰ্ধাৰণ কৰিবলৈ কয়। তেওঁ দাবী কৰে যে সেই সময়ত আমেৰিকাত থকা ৰাহুল গান্ধীয়ে দলৰ নেতাসকলৰ সৈতে ফোনত কথা পতাৰ পিছত পৰিস্থিতি সলনি হয়।
উল্লেখ্য যে ২০১১ চনৰ বিধানসভা নিৰ্বাচনৰ পিছত অসম কংগ্ৰেছত আভ্যন্তৰীণ বিবাদৰ সৃষ্টি হয়, তদানীত্বন মুখ্যমন্ত্ৰী তৰুণ গগৈৰ পৰিৱৰ্তে শৰ্মাক মুখ্যমন্ত্ৰী হিচাপে সমৰ্থন কৰে বিধায়কৰ এটা অংশই। পৰৱৰ্তী সময়ত ২০১৫ চনত কংগ্ৰেছ ত্যাগ কৰি শৰ্মাই ভাৰতীয় জনতা পাৰ্টিত যোগদান কৰে আৰু ২০১৬ চনত অসমৰ প্ৰথম বিধানসভা নিৰ্বাচনত দলটোৰ জয়ৰ ক্ষেত্ৰত গুৰুত্বপূৰ্ণ ভূমিকা পালন কৰে।
প্ৰিয়ংকাই কয় যে এইবোৰৰ পৰিৱৰ্তে মুখ্যমন্ত্ৰীয়ে প্ৰশাসনিক বিষয়ত গুৰুত্ব দিব লাগে। “তেওঁ অসমৰ উন্নয়নৰ কথা কওক। তেওঁ কি কৰিছে আৰু আগন্তুকপাঁচ বছৰত তেওঁ কি কাম কৰাৰ পৰিকল্পনা কৰিছে ৰাইজক কওক। যুৱক-যুৱতীসকলে জানিব বিচাৰে।”
তেওঁ লগতে দুৰ্নীতিৰ অভিযোগ উত্থাপন কৰি ৰাজ্য চৰকাৰে ধন-সম্পত্তি “এটা পৰিয়াল”ত কেন্দ্ৰীভূত কৰি অসমৰ সম্পদ বৃহৎ উদ্যোগপতিৰ হাতত গতাই দিয়াৰ অভিযোগ উত্থাপন কৰে। “ৰাইজে দেখিছে যে অসমৰ সম্পদ কেনেকৈ হস্তান্তৰ হৈছে। এইবোৰ অসমৰ জনসাধাৰণৰ। যি মাটি হস্তান্তৰ কৰা হৈছে সেয়া ৰাজহুৱা সম্পত্তি।”
বিশেষকৈ যুৱ ভোটাৰ আৰু মহিলাসকলক আহ্বান জনাই প্ৰিয়ংকাই তেওঁলোকক নিজৰ ৰাজ্যখন শক্তিশালী কৰাৰ বাবে তেওঁ অভিহিত কৰা “ইতিবাচক ৰাজনীতি” ক সমৰ্থন জনাবলৈ কয়। “আপোনালোকে দেখিছে যে কিমান দুৰ্নীতি হৈছে। এই দুৰ্নীতি অসমৰ জনসাধাৰণৰ প্ৰতি বিশ্বাসঘাতকতা। তেওঁলোকে উপলব্ধি কৰিছে যে পৰিৱৰ্তনৰ সময় আহি পৰিছে।”
