নৰেন্দ্ৰ মোদীয়ে প্ৰধানমন্ত্ৰী পদৰ মৰ্যাদা বিনষ্ট কৰিছে। কংগ্ৰেছৰ সাধাৰণ সম্পাদক প্ৰিয়ংকা গান্ধীয়ে বিহাৰত অনুষ্ঠিত গণ সমাৱেশৰ পৰা প্ৰধানমন্ত্ৰীক কঠোৰ ভাষাৰে আক্ৰমণ কৰে। তেওঁৰ ভাষাত, “ভোট লাভ কৰিবলৈ যি ভাষা ব্যৱহাৰ কৰা হৈছে, সেয়া কোনো প্ৰধানমন্ত্ৰীৰ মুখত শোভা নাপায়।”
শনিবাৰে প্ৰধানমন্ত্ৰী নৰেন্দ্ৰ মোদীয়ে বিহাৰৰ নিৰ্বাচনী প্ৰচাৰৰ সময়ত ৰাজ্যৰ বিৰোধী দলসমূহক শক্তিশালী ভাষাত আক্ৰমণ কৰি কয় – বিহাৰৰ নৱপ্ৰজন্মক বিপথে পৰিচালিত কৰিব বিচাৰিছে আৰজেডি আৰু মহাগঠবন্ধনে! মোদীয়ে দাবী কৰে যে বিৰোধীৰ লক্ষ্য তেওঁলোকক শিক্ষিত যুৱক কৰি তোলা নহয়, গুণ্ডা কৰাহে।
আনহাতে, এন ডি এ চৰকাৰে যুৱক-যুৱতীসকলক কম্পিউটাৰ আৰু খেলাধূলাৰ সুযোগ দিছে। আমি যুৱক-যুৱতীসকলক লেপটপ দিওঁ। আৰু তেওঁলোক ক্ষমতালৈ আহিলে যুৱসকলৰ হাতত ‘কট্টা’ অৰ্থাৎ বন্দুক তুলি দিব।
প্ৰধানমন্ত্ৰীয়ে কয়, “আমি যুৱসমাজক কম্পিউটাৰ আৰু ক্ৰীড়াৰ সামগ্ৰী দিছো। আৰু তেওঁলোকে? তেওঁলোকে পিষ্টল দিব বিচাৰে!”
মোডীৰ সমাৱেশৰ কেইঘন্টামানৰ ভিতৰতে কংগ্ৰেছ নেত্ৰী প্ৰিয়ংকা গান্ধী ভাদ্ৰাই তেওঁৰ অভিযোগৰ প্ৰতি সঁহাৰি জনায়। তেওঁ কয়, ‘কট্টা’ৰ দৰে শব্দ ব্যৱহাৰ কৰাটো প্ৰধানমন্ত্ৰীৰ পদ মৰ্যাদাৰ লগত খাপ নাখায়। মোদীয়ে নিজৰ পদৰ মৰ্যাদা বজাই ৰখা নাই।’ এয়া প্ৰথম নহয়, ইয়াৰ পূৰ্বেও কেইবাবাৰো প্ৰধানমন্ত্ৰী পদৰ মৰ্যাদা বিনষ্ট কৰা মন্তব্যৰ অভিযোগ উঠিছে মোডীৰ বিৰুদ্ধে। অৱশ্যে বিহাৰৰ নিৰ্বাচনত তেওঁ অহৰহ ‘কট্টা’ শব্দটো ব্যৱহাৰ কৰি আহিছে।
শনিবাৰে ৰেলীত প্ৰিয়ংকাই আদানী-আম্বানী বিষয়ক লৈ বিজেপি আৰু মোডীকো তীব্ৰ কটাক্ষ কৰে। কংগ্ৰেছ নেত্ৰীগৰাকীয়ে কয়, “এন ডি এ চৰকাৰে যুৱক-যুৱতীসকলক কৰ্মসংস্থাপন প্ৰদান কৰাত ব্যৰ্থ হৈছে। এতিয়া তেওঁলোক চৰকাৰী কোম্পানীসমূহ দুটা কৰ্পৰেট বন্ধুৰ হাতত গতাই দিয়াত সক্ৰিয় হৈ পৰিছে।” এই সন্দৰ্ভত ৱায়ানাদৰ কংগ্ৰেছৰ সাংসদগৰাকীয়ে নাম নোলোৱাকৈয়ে শনিবাৰে উদ্যোগপতি গৌতম আদানী আৰু মুকেশ আম্বানীক লক্ষ্য কৰি লোৱা বুলি অনুমান কৰা হৈছে।
