বিজেপিৰ বৰ ঘৰত কঁপনি তোলা হাথৰাছ বলাৎকাৰ কাণ্ডৰ নিৰ্যাতিতাৰ পৰিয়ালৰ খবৰ লবলৈ গৈ বৃহস্পতিবাৰে আৰক্ষীৰ হাতত লাঞ্চিত হোৱা কংগ্ৰেছৰ নেতা ৰাহুল গান্ধীয়ে আজি পুনৰ গৈছে হাথৰাছলৈ।
প্ৰথম অৱস্থাত ৰাহুলক আৰক্ষীয়ে বাধা দিছিল যদিও প্ৰশাসনৰ পৰা ৰাহুলৰ লগতে মাত্ৰ পাঁচজন লোকক নিৰ্যাতিতাৰ পৰিয়ালক সাক্ষাৎ কৰাৰ অনুমতি দিয়া হৈছে বুলি জানিব পৰা গৈছে।
ইয়াৰ পিছতে আৰক্ষীৰ বেহুৰ মাজেৰেই ৰাহুল-প্ৰিয়ংকাই যাত্ৰা আৰম্ভ কৰিছে হাথৰাছলৈ।
উল্লেখ্য দেশজুৰি প্ৰতিক্ৰিয়াৰ সৃষ্টি কৰা উত্তৰ প্ৰদেশৰ হাথৰাছত বলাৎকাৰ কাণ্ডৰ বলি হৈ কৰুণ মৃত্যুক সাৱটি লোৱা কিশোৰীৰ পৰিয়ালৰ খবৰ ল’বলৈ যোৱাৰ সময়তে বৃহস্পতিবাৰে আৰক্ষীৰ নিৰ্যাতনৰ বলি হ’বলগীয়া হৈছিল ৰাহুল গান্ধী।
সিদিনা দিল্লীৰ পৰা উত্তৰ প্ৰদেশৰ হাথৰাছ অভিমুখে ভগ্নী প্ৰিয়ংকা গান্ধীৰ সৈতে ৰাহুল গান্ধীয়ে যাত্ৰা কৰিছিল।
উত্তৰ প্ৰদেশত প্ৰৱেশ কৰিবলৈ লোৱাৰ সময়তে ৰাজ্য খনৰ আৰক্ষীয়ে ৰাহুল আৰু প্ৰিয়ংকাৰ কনভয় ৰখাই দিয়ে।
আৰক্ষীৰ বাধাৰ মাজতে ৰাহুল আৰু প্ৰিয়ংকাই খোজকাঢ়িয়েই গন্তব্যস্থল অভিমুখে যাবলৈ ধৰে।
এই কথাতে ক্ষুদ্ধ হৈ পৰে আৰক্ষী। আৰক্ষীয়ে ৰাহুল-প্ৰিয়ংকাৰ ওপৰত লাঠীচালনা কৰাৰ লগতে ৰাহুল গান্ধীক চোলাত ধৰি মাটিত বগৰাই দিয়ে।
ৰাহুলে কি কাৰণত আৰক্ষীয়ে তেওঁৰ সৈতে এনে ব্যৱহাৰ কৰিছে বুলি প্ৰশ্ন কৰাৰ সময়তে আইন ভংগ কৰাৰ বাবেই আৰক্ষীয়ে ৰাহুল আৰু প্ৰিয়ংকাক আটক কৰাৰ কথা প্ৰকাশ কৰে।
ইপিনে ৰাহুল গান্ধীক এনেদৰে আৰক্ষীয়ে টানি-আজুৰি মাটিত বগৰাই দিয়াৰ ঘটনাটোৱে সমগ্ৰ দেশ জুৰি তীব্ৰ প্ৰতিক্ৰিয়াৰ সৃষ্টি কৰিছে।ইয়াৰ মাজতে আজি পুনৰ একে স্থানলৈ ৰাহুলৰ যাত্ৰা।
