’কা’ বিৰোধী প্ৰতিবাদৰ সময়ত তিনিচুকীয়া জিলাৰ মাৰ্ঘেৰিটা থানাৰ অন্তৰ্গত ভিনাৰ মিলস্থিত আৰ এছ এছৰ এটা কাৰ্যালয় ভাঙি লণ্ডভণ্ড কৰাৰ অভিযোগত ডিগবৈৰ পৰা যোৱা ১৪ ডিচেম্বৰত আটক কৰা যুদ্ধ বিৰত গোটৰ আলফা নেতা জিতেন দত্তক আজি মাৰ্ঘেৰিটা আৰক্ষীয়ে মাৰ্ঘেৰিটাৰ মহকুমা ন্যায়িক দণ্ডাধীশৰ আদলতত হাজিৰ কৰে ৷
নিশা গুৱাহাটীৰ বিশেষ শাখাই প্ৰথমে মাৰ্ঘেৰিটা আৰক্ষী থানাত উপস্থিত কৰোৱাৰ পাছত জিতেন দত্তক প্ৰায় ৪ ঘণ্টা সময় জেৰা চলায়।
ইয়াৰ পাছতে মাৰ্ঘেৰিটাৰ ন্যায়াধীশ আদালতত হাজিৰ কৰোৱাৰ প্ৰাক মুহূৰ্তত দত্তক স্বাস্থ্যৰ বিষয়ে সোধাত তেওঁ ঠিকেই আছে বুলি জানিবলৈ দিয়ে।
সাংবাদিকৰ এক প্ৰশ্ন উত্তৰত তেওঁ ক’য়, “ভালেই আছো মই। ৰাইজক শান্তিপূৰ্ণভাৱে আন্দোলন চলাই যোৱাৰ আহ্বান জনাইছোঁ।“
ইপিনে আজি মাৰ্ঘেৰিটা আৰক্ষীয়ে মাৰ্ঘেৰিটা অসামৰিক চিকিৎসালয়ত দত্তৰ স্বাস্থ্য পৰীক্ষা কৰোৱায়৷
উল্লেখ্য যে, বিগত পাঁচ দিনে আৰক্ষীৰ জিম্মাত থকা জিতেন দত্তৰ বিৰুদ্ধে ভাৰতীয় দণ্ডবিধি আইনৰ ১২০(বি),১২১, ১৪৭, ১৪৮, ১৪৯, ৩৫৩, ৩৫৪, ৪২৭, ৪২৭, ৪৩৫ আই পি চি ধাৰাৰ অধীনত মাৰ্ঘেৰিটা থানাত ৩৭৪/১৯ নম্বৰৰ এক গোচৰ পঞ্জীয়ণ কৰি আজি তিনিচুকীয়া জেল হাজোতলৈ প্ৰেৰণ কৰিছে।
আনহাতে, আলফা নেতা জিতেন দত্ত, কৃষক নেতা অখিল গগৈ সহ যিসকল লোকক ’কা’ৰ বিৰুদ্ধে প্ৰতিবাদ কৰাৰ নামত চৰকাৰে গ্ৰেপ্তাৰ কৰিছে প্ৰতিজনকে বিনাচৰ্তে মুক্তিৰ দাবী উত্থাপিত হৈছে।
ইপিনে, আজি মাৰ্ঘেৰিটা আঞ্চলিক ছাত্ৰ সন্থা, বিভিন্ন জাতীয় জনগোষ্ঠীয় দল-সংগঠন আৰু সমূহ মাৰ্ঘেৰিটাবাসী ৰাইজৰ আহ্বানত নাগৰিক সমাজক লৈ মাৰ্ঘেৰিটা ৰঙ্গমঞ্চত এখন প্ৰতিবাদী সভা অনুষ্ঠিত হয়।