বিশ্বভাৰতীৰ ভাষা ভৱনৰ কনফাৰেন্স হলত কালি (৫ মে’, ২০২৫) দিনৰ ১১.৩০ বজাত ভাষা-ভৱন আৰু অসমীয়া বিভাগৰ উদ্যোগত আয়োজিত এখনি গাম্ভীৰ্য্যপূৰ্ণ সভাত বিশ্বভাৰতীৰ শ্ৰীমন্ত শংকৰদেৱ আসনৰ নৱনিযুক্ত পৰামৰ্শদাতা অধ্যাপক ৰঞ্জিৎ কুমাৰ দেৱ গোস্বামীক বিপুলভাৱে আদৰণি জনোৱা হয়৷
অধ্যাপক ৰঞ্জিৎ কুমাৰ দেৱ গোস্বামীক বিশ্বভাৰতীলৈ আনুষ্ঠানিকভাৱে আদৰণি জনাবৰ উদ্দেশ্য আয়োজিত এই সভাৰ আৰম্ভণিতে বিশ্বভাৰতীৰ ভাৰপ্ৰাপ্ত উপাচাৰ্য্য অধ্যাপক নাৰায়ণ চন্দ্ৰ মণ্ডল আৰু শ্ৰীমন্ত শংকৰদেৱ আসনৰ পৰামৰ্শদাতা অধ্যাপক ৰঞ্জিৎ কুমাৰ দেৱ গোস্বামীক ভাষা ভৱনৰ অধ্যক্ষ অধ্যাপক মৃণালকান্তি মণ্ডল, অসমীয়া বিভাগৰ ভাৰপ্ৰাপ্ত মুৰব্বী ডঃ সংগীতা শইকীয়া প্ৰমুখ্যে অন্যান্যসকলে শান্তিনিকেতনৰ পৰম্পৰাৰে আদৰণি আৰু সম্বৰ্ধনা জনায়৷
সভাত বিশ্বভাৰতীৰ ভাৰপ্ৰাপ্ত উপাচাৰ্য্য অধ্যাপক নাৰায়ণ চন্দ্ৰ মণ্ডলে অধ্যাপক দেৱ গোস্বামীক আদৰণি জনাই ভাষণ প্ৰদান কৰাৰ পাছতে ‘শ্ৰীমন্ত শংকৰদেৱ আৰু মধ্য যুগ’ শীৰ্ষক বক্তৃতা প্ৰদান কৰে বিশ্বভাৰতীৰ শ্ৰীমন্ত শংকৰদেৱ আসনৰ নৱনিযুক্ত অধ্যাপক ৰঞ্জিৎ কুমাৰ দেৱ গোস্বামী দেৱ গোস্বামীয়ে৷ দেৱ গোস্বামীয়ে তেওঁৰ সুদীৰ্ঘ ভাষণৰ উপৰি সমৱেত অধ্যাপক, গৱেষক, ছাত্ৰ-ছাত্ৰীৰ বিভিন্ন প্ৰশ্নৰো উত্তৰ দান কৰে৷ দেৱ গোস্বামীৰ বক্তৃতাৰ পাছতে বক্তব্য আগবঢ়ায় ভাষা ভৱনৰ অধ্যক্ষ অধ্যাপক মৃণালকান্তি মণ্ডলে৷
ইয়াৰ আগেয়ে সভাৰ আৰম্ভণিতে এটি বৰগীত পৰিৱেশন কৰে বিশ্বভাৰতীৰ সংগীত ভৱনৰ গৱেষক ছাত্ৰী প্ৰিয়ংকা মণ্ডলে৷ অসমীয়া বিভাগৰ ভাৰপ্ৰাপ্ত মুৰব্বী তথা শ্ৰীমন্ত শংকৰদেৱ আসনৰ সমন্বয়ক ডঃ সংগীতা শইকীয়াই আদৰণী ভাষণ প্ৰদান কৰা সভাৰ শেষত শলাগৰ শৰাই আগবঢ়ায় ভাষা ভৱনৰ উপাধ্যক্ষ অধ্যাপক তপু বিশ্বাসে৷ সভাৰ সামৰণি পৰে বিশ্বভাৰতীৰ সমৱেত আশ্ৰম সংগীতেৰে৷
