বিশিষ্ট অৰ্থনীতিবিদ, প্ৰধানমন্ত্ৰীৰ বিত্তীয় উপদেষ্টা পৰিষদৰ অধ্যক্ষ বিবেক দেৱৰয়ৰ পৰলোকপ্ৰাপ্তি

বিশিষ্ট অৰ্থনীতিবিদ বিবেক দেৱৰয়ৰ পৰলোকপ্ৰাপ্তি ঘটিছে। তেওঁ প্ৰধানমন্ত্ৰী নৰেন্দ্ৰ মোডীৰ বিত্তীয় উপদেষ্টা পৰিষদৰ অধ্যক্ষ আছিল। মৃত্যুৰ সময়ত তেওঁৰ বয়স আছিল ৬৯ বছৰ।

এইগৰাকী বিশিষ্ট অৰ্থনীতিবিদে মোডীৰ শাসনকালত ভাৰত চৰকাৰৰ বহু গুৰুত্বপূৰ্ণ পদত অধিষ্ঠিত হৈ আহিছে। মৃত্যুৰ আগলৈকে প্ৰধানমন্ত্ৰীৰ উপদেষ্টা পৰিষদৰ দায়িত্ব তেওঁৰ কান্ধত আছিল।

বিবেক দেৱৰয়ৰ মৃত্যুত শোক প্ৰকাশ কৰিছে প্ৰধানমন্ত্ৰী নৰেন্দ্ৰ মোদীয়ে। এক্স হেণ্ডেলত তেওঁ লিখিছে, “ড০ বিবেক দেৱৰয় আছিল এজন বিদ্বান ব্যক্তি। অৰ্থনীতি, ইতিহাস, সংস্কৃতি, ৰাজনীতি, আধ্যাত্মিকতা আদি বহু ক্ষেত্ৰত তেওঁৰ দখল আছিল। বৌদ্ধিক মহলত তেওঁৰ ছাপ স্পষ্ট আছিল। চৰকাৰী খণ্ডৰ বাহিৰেও তেওঁ প্ৰাগঐতিহাসিক কালৰ বহু বিষয়কলৈও কাম কৰিছিল। তেওঁ নিজৰ কাম যুৱক-যুৱতীসকলৰ মাজলৈ সহজেই আগবঢ়াই দিছে।”

মোদীয়ে লগতে কয়, “মোৰ সৈতে ড০ দেৱৰয়ৰ পৰিচয় আছিল দীৰ্ঘদিনীয়া। তেওঁৰ অন্তৰ্দৃষ্টি আৰু বিভিন্ন বিষয়ত দিয়া ভাষণবোৰ মই সদায় মনত ৰাখিম। তেখেতৰ মৃত্যুত মৰ্মাহত হৈছো। পৰিয়াললৈ সমবেদনা জ্ঞাপন কৰিলোঁ। ওম শান্তি।”

লগতে পঢ়কঃ দীপাৱলীৰ নিশা মহানগৰীৰ খানাপাৰাত ভয়ংকৰ দুৰ্ঘটনা, থিতাতে নিহত দুই যুৱক-যুৱতী

দেশৰ আগশাৰীৰ অৰ্থনীতিবিদসকলৰ ভিতৰত বিবেক দেৱৰয় আছিল অন্যতম ব্যক্তিত্ব। তেওঁ নৰেন্দ্ৰ মোডীৰ ঘনিষ্ঠ মহলৰ ভিতৰত আছিল। ২০১৭ চনৰ ছেপ্টেম্বৰ মাহত তেওঁ প্ৰধানমন্ত্ৰীৰ উপদেষ্টা পৰিষদৰ অধ্যক্ষ হয়। ইয়াৰ পূৰ্বে ২০১৫ চনত তেওঁ নিটি আয়োগৰ সদস্য হৈছিল। ২০১৯ চনলৈকে তেওঁ কমিটীত আছিল।

ইয়াৰ উপৰিও ২০১৮ চনৰ পৰা ২০২২ চনলৈ তেওঁ ইণ্ডিয়ান ষ্টেটিকটিকেল ইনষ্টিটিউটৰ চেঞ্চেলৰ পদত আছিল।পুনেৰ গোখলে ইনষ্টিটিউট অফ পলিটিক্স এণ্ড ইকোনমিক্সৰ চেঞ্চেলৰ হিচাপেও কাৰ্যনিৰ্বাহ কৰিছিল। একে সময়তে ২০৪৭ চনৰ ভিতৰত ভাৰতৰ উন্নয়নৰ বাবে প্ৰধানমন্ত্ৰী নৰেন্দ্ৰ মোদীয়ে গঠন কৰা কমিটীৰ সদস্যও আছিল দেবৰয়।

অৰ্থনীতিৰ বাহিৰেও তেওঁ অনুবাদক হিচাপেও পৰিচিত আছিল। ৰামায়ণ, মহাভাৰত ইংৰাজীলৈ অনুবাদ কৰিছিল বিবেক দেৱৰয়ে। অৰ্থনীতিৰ ওপৰতো তেওঁ বহুতো গ্ৰন্থ ৰচনা কৰিছিল। ২০১৬ চনত তেওঁক পদ্মশ্ৰী বঁটাৰে সন্মানিত কৰা হৈছিল।