বোকাখাত সমষ্টিৰ বিধায়ক মন্ত্ৰী অতুল বৰাই ল’কডাউনৰ সময়ত বিপদগ্ৰস্ত লোকৰ বাবে খাদ্য সামগ্ৰী বিতৰণৰ ব্যৱস্থা কৰি বিগত দুটা মাহ সমষ্টিৰ বিভিন্ন স্থানত খাদ্য সামগ্ৰী বিতৰণ কৰি ফুৰিছে ৷
জানিব পৰা মতে, সমষ্টিৰ ৬০ হেজাৰ লোকক খাদ্য সামগ্ৰীৰ টোপোলা বিতৰণ লক্ষ্য নিৰ্ধাৰণ কৰি লৈছে মন্ত্ৰী অতুল বৰাই। নিৰ্বাচনৰ প্ৰাকক্ষণত এইয়া নিৰ্বাচনী কৌশলহ বুলি লাহে লাহে ৰাইজে ভাবিবলৈ আৰম্ভ কৰিছে ৷
আজি বোকাখাত নগৰৰ চাৰিটা ৱাৰ্ডৰ উপৰিও বহিখোৱা আৰু ১ নং বেলগুৰি গাঁৱৰ লোকৰ মাজতো অতুল বৰাই খাদ্য সামগ্ৰীৰ টোপোলা দিয়া কথা আছিল ৷ যাৰ বাবে বোকা পানীৰে পৰিপূৰ্ণ বাট অতিক্ৰমি সমবেত হৈছিল গাওঁবাসী ৷
গাওঁবাসীয়ে মন্ত্ৰী গৰাকীক লগ কৰি ৰাইজৰ দুখ-দুৰ্দশা কথা অৱগত কৰি সমাধান পাব বুলি আশাও কৰিছিল কিন্তু বহু প্ৰতীক্ষাৰ পাচতো মন্ত্ৰী অতুল বৰা উপস্থিত নহ’ল ৷
ইয়াৰ বিপৰীতে মন্ত্ৰীজনাৰ লগত থকা পালি প্ৰহৰী সকলে পথৰ ওপৰতে খাদ্যৰ টোপোলা পেলাই থৈ যায় ৷
অতুল বৰাৰ এই কাৰ্যত ক্ষোভিত হৈ পৰে গাঁওবাসী ৷ গেলা আলু, পিয়াজ, গোটমৰা আটা আদিৰে দিয়া অতুল বৰাৰ খাদ্য সামগ্ৰী বাঢ়নি পানীত উটুৱাই দি প্ৰতিবাদ জনায় গাওঁবাসীয়ে ৷
ইফালে, বহিখোৱা গাওঁতো সাহায্য বিতৰণৰ বাবে মন্ত্ৰী আহিব বুলি সমবেত হয় গাওঁবাসী ৷
মন্ত্ৰীক ৰাইজৰ অভাৱ অভিযোগ অৱগত কৰিবৰ বাবে হাতে হাতে প্লে কাৰ্ডো লৈ আহে একাংশ লোকে ৷
”আমাক ১ কিলো আলু নালাগে,আমাক লাগে এখন দলং পকী ৰাস্তা ৷ বিধায়ক পুঁজিৰ টকাবোৰেৰে সমষ্টিৰ কি কি উন্নয়ণ কৰিলে তাৰ ৰিপৰ্ট কাৰ্ড ৰাজহুৱা কৰক ৷ বহিখোৱাবাসী ৰাইজৰ ভূমিৰ পট্টা দিম বুলি প্ৰতিশ্ৰুতি দিয়া কথাবোৰ পাহৰি গ’ল কিয়,” আদি প্লে কাৰ্ড লৈ সমবেত হ’য় গাঁৱবাসী ৷
এই পৰিস্থিতিৰ উমান পাই বহিখোৱা গাঁৱলৈও অহাৰ পৰা বিৰত থাকে মন্ত্ৰী অতুল বৰা ৷
শেষত মন্ত্ৰী অতুল বৰাৰ প্ৰতিনিধিহৈ অসম গন পৰিষদ দলৰ তিনিগৰাকী কৰ্মকৰ্তা গৈ বহিখোৱা গাঁৱত উপস্থিত হৈ অতুল বৰাই দিয়া খাদ্য সামগ্ৰী লবৰ বাবে গাওঁবাসীক অনুৰোধ জনায় ৷
সমবেত ৰাইজে কিন্তু অতুল বৰাই নিৰ্বাচনৰ পূৰ্বে দি যোৱা প্ৰতিশ্ৰুতিৰ আৰু ৰাইজৰ দাবীৰ উত্তৰ দিবৰ বাবে মন্ত্ৰী আহিব লাগিব বুলি দাবী জনাই মন্ত্ৰী অতুল বৰাৰ খাদ্য সামগ্ৰীৰ টোপোলা প্ৰত্যাখন কৰে ৷
