কৃষক মুক্তি সংগ্ৰাম সমিতিৰ বেনাৰত নামদাঙৰ স্থানীয় বাসিন্দাসকলে সোমবাৰে নামদাঙৰ খিলঞ্জীয়া লোকসকলক উচ্ছেদ কৰাৰ বিৰুদ্ধে ডিব্ৰুগড় উপায়ুক্তৰ কাৰ্যালয়ত প্ৰতিবাদ সাব্যস্ত কৰে।
কৃষক মুক্তিৰ লেঙেৰী আঞ্চলিকৰ উদ্যোগত প্ৰতিবাদৰ আয়োজন কৰা হৈছিল। হাতে হাতে প্লে কাৰ্ড লৈ প্ৰতিবাদকাৰীসকলে চৰকাৰৰ বিৰুদ্ধে শ্ল’গান দিছিল।
নামদাঙৰ পাঁচখন বন গাঁৱৰ ৫০০ ৰো অধিক লোকে উচ্ছেদ কৰাৰ প্ৰশাসনৰ সিদ্ধান্ত প্ৰত্যাহাৰ কৰিবলৈ দাবী জনায়।
“ডিব্ৰুগড় জিলা প্ৰশাসনে কোনো উচ্ছেদৰ জাননী জাৰি কৰা নাছিল। আমি অসমৰ খিলঞ্জীয়া লোক, তেন্তে চৰকাৰে আমাৰ বিৰুদ্ধে কিয় উচ্ছেদ অভিযান চলাব? এতিয়া, জিলা প্ৰশাসনে নামদাং অঞ্চলত গছপুলি ৰোপণ কৰাৰ পৰিকল্পনা কৰিছে। আমি ইয়াত বহু বছৰ ধৰি বাস কৰি আছো কিন্তু এতিয়া চৰকাৰে আমাক বলপূৰ্বক উচ্ছেদ কৰাৰ পৰিকল্পনা কৰিছে,”- নামদাঙৰ এজন বাসিন্দাই এইদৰে কয়।
ইফালে, ডিব্ৰুগড় বন বিভাগে নামদাং অঞ্চলত গছপুলি ৰোপণৰ উদ্যোগ গ্ৰহণ কৰিছে।
“খিলঞ্জীয়া লোকৰ চৰকাৰ বুলি দাবী কৰা বিজেপি চৰকাৰে এতিয়া তেওঁলোকক লেঙেৰীৰ নামদাং অঞ্চলৰ পৰা উচ্ছেদ কৰাৰ পৰিকল্পনা কৰিছে। বহু বছৰ ধৰি সেই অঞ্চলত ৫০০ ৰো অধিক লোক বাস কৰি আছে, তেনেস্থলত চৰকাৰে তেওঁলোকৰ বিৰুদ্ধে কিয় এনে পদক্ষেপ গ্ৰহণ কৰিছে,”- ডিব্ৰুগড় জিলা কৃষক মুক্তিৰ সম্পাদক হেমন্ত কোঁৱৰে অভিযোগ কৰি কয়।
কোঁৱৰে কয়, “আমি মুখ্যমন্ত্ৰী হিমন্ত বিশ্ব শৰ্মাক ডিব্ৰুগড়ৰ উপায়ুক্তৰ জৰিয়তে বিষয়টো সমাধান কৰিবলৈ আৰু নামদাঙত উচ্ছেদ অভিযান বন্ধ কৰিবলৈ এখন স্মাৰকপত্ৰ দাখিল কৰিছো।”
