কুমাৰীকাটা সংযোগী পথত মটঙা নৈৰ ওপৰত পকী দলং নিৰ্মাণৰ দাবীত আজি অঞ্চলটোৰ ৰাইজে নদীৰ পানীত নামি অভিনৱ পদ্ধতিৰে প্ৰতিবাদ সাব্যস্ত কৰে।
স্বাধীনোত্তৰ কালত নাগ্ৰীজুলি-কাউলী-কুমাৰীকাটা সংযোগী পথত মটঙা নদীৰ ওপৰত আজিলৈ এখন পকী দলং নিৰ্মাণ নোহোৱাত অঞ্চলটোৰ হেজাৰ হেজাৰ লোক বছৰৰ পিছত বছৰ ধৰি যাতায়তৰ ক্ষেত্ৰত যাতনা ভুগি আহিছে।
বাৰিষা কালত মটঙা আৰু বাল্টি নদীত পানীৰে ভৰি পৰাৰ বাবে অঞ্চলটোৰ পৰা বিদ্যালয়-মহাবিদ্যালয়লৈ অহা যোৱা কৰা ছাত্র-ছাত্ৰী, চিকিৎসালয়লৈ ৰোগী অনা-নিয়াৰ ক্ষেত্ৰত যমৰ যাতনা ভুগি আহিছে।
কৃষি প্ৰধান অঞ্চলটোৰ ৰাইজে দলং নোহোৱা বাবে কৃষিজাত সামগ্ৰী সমূহ নাগ্ৰীজুলি-কুমাৰীকাটা গুৱাবাৰী বজাৰলৈ বিক্ৰী কৰিব নিব নোৱাৰাৰ ফলত উচিত মূল্য পোৱাৰ পৰা বঞ্চিত হৈ আহিছে বুলি অভিযোগ উত্থাপন কৰি আহিছে।
বিগত বছৰ অঞ্চলটোৰ ৰাইজে নিজৰ গাঁঠিৰ ধন ভাঙি পাঁচ লক্ষাধিক টকা ব্যয় সাপেক্ষে এখন বাঁহৰ দলং সাজিছিল উলিয়াইছিল আৰু সেই দলঙখনেৰে যাতায়ত অব্যাহত ৰাখিছিল। কিন্তু এবছৰ উকলি যোৱাৰ পিছত দলংখন জৰাজীৰ্ণ হৈ পৰে আৰু বৰ্তমান মটঙা নৈৰ বাঢ়নী পানীয়ে দলংখনলৈ তীব্ৰ ভাবুকিৰ সৃষ্টি কৰিছে।
আজি কাউলী অঞ্চলৰ অৰ্ধ শতাধিক ৰাইজে মটঙা নদীৰ পাৰত উপস্থিত হৈ নদীৰ একাঠু পানীৰ মাজলৈ গৈ দলং নিৰ্মাণৰ দাবীত শ্লোগান দি প্ৰতিবাদ সাব্যস্ত কৰে।
প্ৰতিবাদকাৰী সকলে আমাক দলং লাগে, দলং দিয়ক, দলং নহলে ভোট দিয়া নহ’ব, অসম চৰকাৰ হাই হাই আদি শ্লোগান দি কাউলীৰ মটঙা নৈৰ বুকু উত্তাল কৰি তোলে আৰু মটঙা আৰু বাল্টি নৈৰ ওপৰত শীঘ্ৰে দলং নিৰ্মাণৰ দাবী জনায়।
চৰকাৰে দলং নিৰ্মাণ নকৰিলে আগন্তুক নিৰ্বাচনত অঞ্চলটোৰ ৰাইজে উচিত প্ৰত্যুত্তৰ দিব বুলিও লগতে কয়।
