কৃষি আইন বাতিলৰ বাবে প্ৰতিবাদ অব্যাহত ৰখা কৃষক সকলে আজি দিল্লীৰ ৰাজপথত ট্ৰেক্টৰ ৰেলীৰে প্ৰতিবাদ সাব্যস্ত কৰে।
দিল্লী আৰক্ষীয়ে কৃষক সকলক গণতান্ত্ৰিকভাৱে টেক্টৰ ৰেলী অনুষ্ঠিত কৰিবলৈ অনুমতি দিয়াৰ পাছত আজি দিল্লীত কৃষক সকলৰ প্ৰতিবাদে চৰম অগণতান্ত্ৰিক ৰূপ লয়।
প্ৰতিবাদী কৃষক সকলে আৰক্ষীৰ বেৰিকেড ভাঙি ঐতিহাসিক লালকিল্লাত প্ৰৱেশ কৰে আৰু তাত তেওঁলোকৰ পতাকা উত্তোলন কৰে।
এগৰাকী প্ৰতিবাদী কৃষকৰ ট্ৰেক্টৰ ৰেলীৰ সময়ত ট্ৰেক্টৰ দুৰ্ঘটনাগ্ৰস্ত হোৱাৰ ফলত ঘটনাস্থলীত মৃত্যু হয় কিন্তু প্ৰতিবাদী কৃষক সকলে তেওঁক গুলিবিদ্ধ হৈ মৃত্যু হোৱা বুলি দাবী কৰিছে।
দিল্লী আৰক্ষীয়ে নিৰ্ধাৰণ কৰি দিয়া সময়ৰ পূৰ্বে হাজাৰ হাজাৰ প্ৰতিবাদী কৃষকে ট্ৰেক্টৰ ৰেলীৰে দিল্লীৰ ৰাজপথত প্ৰৱেশ কৰে।
বহু প্ৰতিবাদী কৃষকে আৰক্ষীয়ে প্ৰতিবাদ সাব্যস্ত কৰাৰ বাবে নিৰ্ধাৰণ কৰি দিয়া পথ পৰিহাৰ কৰি অন্যান্য পথেৰেও ট্ৰেক্টৰ ৰেলী উলিওৱা দেখা যায়।
দিল্লী আৰক্ষীয়ে প্ৰতিবাদকাৰী কৃষক সকলক নিয়ন্ত্ৰণ কৰাৰ বাবে বহু ঠাইত কন্দুৱে গেছ প্ৰয়োগ কৰে।
প্ৰতিবাদী কৃষকে সদায় ৰাষ্ট্ৰীয় পতাকা উৰি থকা দেশৰ সন্মানীয় স্থানত তেওঁলোকৰ পতাকা উৰোৱাক বিভিন্ন মহলে তীব্ৰ সমালোচনা কৰে।
