দেশজুৰি অব্যাহত থকা কোভিড-১৯ পৰিস্থিতি তথা ল’কডাউনক উপেক্ষা কৰি দৰমহাহীনতাৰ মাজতেই পার্বত্য জিলাৰ পাঁচ শতাধিক জনস্বাস্থ্য কাৰিকৰী কর্মী নিজ দায়িত্ব পালন কৰি জিলাবাসীক খোৱা পানী যোগান ধৰি আহিছে।
কিন্তু তথাপি পার্বত্য স্বায়ত্ত শাসিত পৰিষদ তথা ৰাজ্য চৰকাৰে কর্মচাৰী সকলৰ দৰমহাৰ প্ৰদানৰ ক্ষেত্ৰত কোনো ব্যবস্থা লোৱা নাই।
সেয়ে অহা বুধবাৰ অর্থাৎ ৩ জুনৰ পৰা অনির্দিষ্টকালৰ বাবে ধর্মঘটত বহাৰ সিদ্ধান্ত লৈছে অ’ল আচাম পাব্লিক হেল্থ ইঞ্জিনিয়াৰিং এমপ্লয়িজ এচোছিয়েশ্যনৰ হাফলং শাখাৰ সদস্য সকলে।
আজি এই কথা জানিবলৈ দিয়ে এচোছিয়েশ্যনৰ হাফলঙৰ সাধাৰণ সম্পাদক বিপুল লংমাইলাই এ।
তেওঁ কয় চৰকাৰৰ ওচৰত বাৰে বাৰে আবেদন নিবেদন কৰি আমাৰ ভাগৰ লাগিছে। কাৰণ ইয়াৰ আগতেও পাৰ্বত্য স্বায়ত্ত শাসিত পৰিষদৰ পৰা চৰকাৰলৈ একাধিক স্মাৰক পত্ৰ দিছো যদিও কোনো কাম হোৱা নাই।
কাৰণ জিলাৰ হাফলং, মাইবাঙ আৰু উমৰাংছু ডিভিজনৰ মোট ৫৩৮ গৰাকী তৃতীয় আৰু চতুৰ্থ বৰ্গৰ কৰ্মী দৰমহা নাপাই অতি দুখেৰে পৰিয়াল পোহপাল দিবলগীয়া হৈছে।
অৱশ্যে শনিবাৰে দেশৰ প্ৰধানমন্ত্ৰীৰ উদ্দ্যেশ্য অন্তিমখন স্মাৰক পত্ৰ প্ৰেৰণ কৰা হয় য’ত দৰমহা লাভ নকৰাৰ কথা উল্লেখ কৰিছে।
আন এগৰাকী চতুৰ্থ বৰ্গৰ কৰ্মচাৰীৰ ভাষ্য হ’ল যে যোৱা প্ৰায় বাৰো মাহ দৰমহা নাপাই অতি কঠিন পৰিস্থিতিৰ মাজত জিয়াই থাকিব লগা হৈছে। কিন্তু আজিৰ দিনত দোকানীয়ে বস্তু নিদিয়ে। ইপিনে কোভিড১৯কলৈ দেশত ল’কডাউন চলি আছে।
দেশৰ প্ৰধানমন্ত্ৰী নৰেন্দ্ৰ মোদীয়ে ব্যৱস্থা নল’লে আত্মহত্যা বাহিৰে বিকল্প নাথাকিব বুলিও উল্লেখ কৰিছে কৰ্মচাৰীসকলে।
