মুখ্য নিৰ্বাচন আয়ুক্ত জ্ঞানেশ কুমাৰৰ সমস্যা যেন ক্ৰমান্বয়ে বৃদ্ধি পাবলৈ ধৰিছে। নিৰ্বাচন আয়োগৰ সিদ্ধান্ত গ্ৰহণৰ প্ৰক্ৰিয়াক লৈ চলি থকা বিতৰ্কৰ মাজতে এইবাৰ জ্ঞানেশ কুমাৰৰ বিৰুদ্ধে দেশৰ উচ্চতম ন্যায়ালয়ত এখন জনস্বাৰ্থ জড়িত আবেদন দাখিল কৰা হৈছে।
জানিব পৰা মতে, শৈলেন্দ্ৰ মণি ত্ৰিপাঠী নামৰ এগৰাকী অধিবক্তাই শীৰ্ষ ন্যায়ালয়ত এই আবেদনখন দাখিল কৰিছে। শেহতীয়াকৈ সংবাদ মাধ্যমত প্ৰকাশিত কিছুমান প্ৰতিবেদনৰ ভিত্তিত নিৰ্বাচন আয়োগৰ কেইবাটাও সিদ্ধান্তক এই আবেদনৰ জৰিয়তে প্ৰত্যাহ্বান জনোৱা হৈছে। জনস্বাৰ্থ জড়িত গোচৰটোত অভিযোগ কৰা হৈছে যে নিৰ্বাচন প্ৰক্ৰিয়াৰ সৈতে জড়িত বহুকেইটা গুৰুত্বপূৰ্ণ সিদ্ধান্ত আন দুজন নিৰ্বাচন আয়ুক্তৰ সন্মতি অবিহনে লোৱা হৈছিল। বিশেষকৈ ভোটাৰ তালিকাৰ এছ আই আৰ, প্ৰপত্ৰ ৬ৰ সালসলনি আৰু ভোটাৰৰ তথ্য সম্পৰ্কীয় বিষয়বোৰক লৈ প্ৰশ্ন উত্থাপন কৰা হৈছে।
আবেদনকাৰীয়ে দাবী কৰিছে যে আন দুজন নিৰ্বাচন আয়ুক্তৰ অনুমোদন নোহোৱাকৈ কেৱল জ্ঞানেশ কুমাৰৰ সন্মতিত কাৰ্যকৰী কৰা সকলো সিদ্ধান্ত, নিৰ্দেশনা আৰু ছফ্টৱেৰ সম্পৰ্কীয় পৰিৱৰ্তনসমূহক অসাংবিধানিক বুলি ঘোষণা কৰি বাতিল কৰিব লাগে। একে সময়তে পুৰণি প্ৰপত্ৰ ৬ পুনৰ বাহাল ৰখাৰো দাবী জনোৱা হৈছে। ইয়াৰ উপৰিও এছ আই আৰ চলি থকাৰ সময়ত কেনেকৈ প্ৰায় ১৩ কোটি ভোটাৰৰ নাম ভোটাৰ তালিকাৰ পৰা বাদ পৰিল, সেই বিষয়ে খৰচি মাৰি তদন্ত কৰিবলৈ এটা বিশেষ তদন্তকাৰী দল বা এছ আই টি গঠন কৰিবলৈ অনুৰোধ জনোৱা হৈছে।
মুখ্য নিৰ্বাচন আয়ুক্ত জ্ঞানেশ কুমাৰৰ উপৰিও জ্যেষ্ঠ উপ-নিৰ্বাচন আয়ুক্ত মনীষ গাৰ্গ আৰু তথ্য প্ৰযুক্তি বিভাগৰ সঞ্চালক প্ৰধান সীমা খান্নাৰ বিৰুদ্ধেও কৰ্তব্যত গাফিলতি কৰাৰ অভিযোগত জনপ্রতিনিধিত্ব আইনৰ অধীনত কঠোৰ ব্যৱস্থা গ্ৰহণৰ দাবী কৰা হৈছে। উল্লেখযোগ্য যে এই জনস্বাৰ্থ জড়িত আবেদনখন দাখিল কৰাৰ পূৰ্বে ইণ্ডিয়ান এক্সপ্ৰেছ নামৰ সংবাদ মাধ্যমৰ এটা প্ৰতিবেদনত দাবী কৰা হৈছিল যে যোৱা দহমাহত নিৰ্বাচন আয়ুক্ত সুখবীৰ সিং সান্ধু আৰু বিবেক যোশীয়ে এছ আই আৰ আৰু অন্যান্য সিদ্ধান্তক লৈ কমেও চৈধ্যবাৰ আপত্তি দৰ্শাইছিল। প্ৰপত্ৰ ৬ৰ পৰিৱৰ্তন আৰু ভোটাৰ তালিকাৰ তথ্য পৰিচালনাৰ ক্ষেত্ৰতো তেওঁলোকৰ আপত্তিৰ কথা প্ৰতিবেদনখনত উল্লেখ কৰা হৈছিল।
অৱশ্যে সংবাদ মাধ্যমৰ এই প্ৰতিবেদনৰ পিছত নিৰ্বাচন আয়োগে স্পষ্ট কৰি দিছে যে আভ্যন্তৰীণ আলোচনাত ভিন্ন মত বা নিৰীক্ষণ থকাটো অতি স্বাভাৱিক কথা। আয়োগৰ মতে, যোৱা এবছৰত লোৱা সকলো চূড়ান্ত সিদ্ধান্ত সৰ্বসন্মতিক্ৰমেই গ্ৰহণ কৰা হৈছে। এই সমগ্ৰ বিতৰ্কৰ মাজতে মুখ্য নিৰ্বাচন আয়ুক্ত জ্ঞানেশ কুমাৰৰ ওপৰত ৰাজনৈতিক চাপো যথেষ্ট বৃদ্ধি পাইছে। লোকসভাৰ বিৰোধী দলপতি ৰাহুল গান্ধীয়ে শেহতীয়াকৈ তেওঁৰ পদত্যাগৰ দাবী উত্থাপন কৰি আয়োগৰ ভূমিকাক লৈ প্ৰশ্ন কৰিছে, যদিও নিৰ্বাচন আয়োগে ৰাহুল গান্ধীৰ এই অভিযোগৰো প্ৰত্যুত্তৰ দিছে।
