নগাঁও জিলাৰ চামগুৰি ৰাজহুৱা প্ৰেক্ষাগৃহত আজি বিজেপিৰ কলিয়াবৰ জিলা সমিতিৰ উদ্যোগত আৰু বিজেপিৰ মণ্ডল সমিতি সমূহৰ সহযোগত দিনযোৰা কাৰ্যসূচীৰে ভাৰতৰ প্ৰাক্তন প্ৰধান মন্ত্ৰী প্ৰয়াত অটল বিহাৰী বাজপেয়ীৰ সোঁৱৰণত এক শ্ৰদ্ধাঞ্জলি অনুষ্ঠান অনুষ্ঠিত হয়।
আজি পুৱা ৮ বজাত অনুষ্ঠিত শ্ৰদ্ধাঞ্জলি অনুষ্ঠানত বাজিয়া মণ্ডল বিজেপিৰ সভাপতি বিৰেন শইকীয়াই ‘ভাৰত ৰত্ন’ জননেতা প্ৰয়াত বাজপেয়ীৰ প্ৰতিচ্ছবিৰ সন্মুখত বন্তি প্ৰজ্বলন কৰে। অনুষ্ঠানত পুষ্পাঞ্জলী আৰু মাল্যাৰ্পন কৰে কলিয়াবৰ জিলা বিজেপিৰ সভাপতি অনিল শইকীয়াই।
ইয়াৰ পিছতে পুৱা ৯ বজাত বিজেপিৰ দলীয় কৰ্মীসকলে চামগুৰিৰ বিভিন্ন স্থানত গছপুলি ৰোপণ কৰাৰ লগতে সৰ্বধৰ্ম প্ৰাৰ্থনা অনুষ্ঠানত গীতা, কোৰান আৰু বাইবেল পাঠ কৰে।
ইয়াৰ পিছতে ভকত বৈষ্ণৱসকলে প্ৰসঙ্গীয়া নাম পৰিৱেশ কৰে আৰু বিয়লি ৩ বজাৰ পৰা বাজপেয়ীৰ জীৱন আধাৰিত ৰচনা প্ৰতিযোগিতা আৰু চিত্ৰাংকন প্ৰতিযোগিতা অনুষ্ঠিত হয়। বিয়লি ৪ বজাত নাম-কীৰ্ত্তন আৰু তাৰ পিছতে ভক্তিমূলক গীতৰ অনুষ্ঠান অনুষ্ঠিত হয়। উক্ত অনুষ্ঠানত শিল্পী ৰূপম কাকতিকে ধৰি কেইবাগৰাকী শিল্পীয়ে গীত পৰিৱেশন কৰে।