কাশ্মীৰৰ পুলৱামাত জে’শ্ব ই মহম্মদৰ আত্মঘাতী আক্ৰমণে পাকিস্তানক যোগ্য প্ৰত্যুত্তৰ দিয়াৰ বাবে “আমাক উৎসাহিত কৰিছে”, মন্তব্য অসম বিজেপিৰ সভাপতি ৰঞ্জিত দাসৰ।
দাসে কয়, পাকিস্তানস্থিত সন্ত্ৰাসবাদী সংগঠনটোৰ আক্ৰমণে ভাৰতক “চাৰ্জিকেল ষ্ট্ৰাইক”ৰ বাবে আমন্ত্ৰণ জনালে।
“ইয়াৰ যোগ্য প্ৰত্যুত্তৰ পাকিস্তানে পাব, আমি উৎসাহিত হৈছো। পাকিস্তানে চাৰ্জিকেল ষ্ট্ৰাইকৰ বাবে ভাৰতক আমন্ত্ৰণ জনালে বুলি আমি অনুভৱ কৰিছো,” দলৰ হেঙেৰাবাৰীস্থিত ৰাজ্যিক কাৰ্য্যালয়ত বিস্ফোৰণটোৰ চহিদসকলৰ শ্ৰদ্ধাঞ্জলি অনুষ্ঠানত শুকুৰবাৰে মন্তব্য দাসৰ।
লগতে পঢ়ক– সবিশেষ|| অসম অভিমুখে চহিদ মনেশ্বৰ বসুমতাৰীৰ দেহৰ অৱশেষ
প্ৰধান মন্ত্ৰী নৰেন্দ্ৰ মোদীৰ ঘোষণাৰ উল্লেখেৰে বিজেপি সভাপতিজনে লগতে কয় যে চহিদৰ আত্মত্যাগৰ মূল্য অথলে যাবলৈ দিয়া নহ’ব।
দাসে লগতে জনায় আক্ৰমণটোত নিহত অসমৰ মনেশ্বৰ বসুমতাৰীৰ অন্তেষ্টিক্ৰিয়াত চহিদজনক শ্ৰদ্ধা জনাবলৈ উপস্থিত বিজেপিৰ ৰাষ্ট্ৰীয় পৰ্য্যায়ৰ নেতা। তামুলপুৰত অনুষ্ঠানটোত অসম চৰকাৰৰ মন্ত্ৰীও উপস্থিত থাকিব।
লোকপ্ৰিয় গোপীনাথ বৰদলৈ আন্তৰ্জাতিক বিমান বন্দৰতে প্ৰথমে চহিদ বসুমতাৰীলৈ শ্ৰদ্ধাঞ্জলি জনোৱা হ’ব বুলিও দাসে সদৰী কৰে।
বসুমতাৰীৰ পৰিয়াললৈ ইতিমধ্যে ২০ লাখ টকাৰ এককালীন সাহায্য ঘোষণা কৰিছে ৰাজ্য চৰকাৰে।
