২০১৯ৰ পুলৱামাৰ সন্ত্ৰাসবাদীৰ আক্ৰমণত ছহিদ হোৱা মেজৰ বিভূতিশংকৰ ধোন্দিয়ালৰ পত্নীয়ে ভাৰতীয় সেনা বাহিনীত যোগদান কৰিছে। ছহিদ মেজৰ বিভূতিশংকৰক তেওঁৰ আত্মত্যাগৰ বাবে ২০১৯ বৰ্ষত ভাৰত চৰকাৰে শৌৰ্য চক্ৰৰ পুৰস্কাৰো প্ৰদান কৰিছিল।
স্মৰ্তব্য যে ছহিদগৰাকীৰ মৃত্যুৰ ছমাহ পিছতে তেওঁৰ পত্নী নিকিতা কউলে সেনা বাহিনীত ভৰ্তি হোৱাৰ সিদ্ধান্ত লোৱাৰ কথা প্ৰকাশ কৰিছিল।
২৮ বছৰীয়া নিকিতাই ২০২০ চনত চৰ্ট চাৰ্ভিছ কমিশ্যন(SSC) পৰীক্ষাত অৱতীৰ্ণ হৈ উত্তীৰ্ণ হয়। ইয়াৰ পিছতে মৌখিক সাক্ষাৎকাৰো উত্তীৰ্ণ হয় নিকিতা।
যোৱা ২৬ মে’ত নিকিতাই ‘অফিচাৰ্ছ ট্ৰেনিং অকাডেমি’ৰ পৰা উত্তীৰ্ণ হোৱাৰ পিছতে ভাৰতীয় সেনা বাহিনীত যোগদান কৰিছে।
সেনাবাহিনীত যোগদান কৰি নিকিতাই নিজৰ মনৰ ভাৱ প্ৰকাশ কৰি কয় যে সেনা বাহিনীত ভৰ্তি হৈ তেওঁ প্ৰয়াত স্বামীৰ প্ৰতি শ্ৰদ্ধা জনাবলৈ বিচাৰিছিল। সেনা বাহিনীত যোগদান কৰি এতিয়া তেওঁ স্বামীৰ আৰু অধিক কাষলৈ যাব পাৰিব বুলিও মন্তব্য কৰিছে।
উল্লেখ্য যে ২০১৯ চনৰ ফেব্ৰুৱাৰীত সন্ত্ৰাসবাদীৰ আক্ৰমণত মেজৰ বিভূতিশংকৰৰ মৃত্যুৰ সময়ত তেওঁলোকৰ বিবাহৰ মাত্ৰ ৯ মাহহে হৈছিল।
মেজৰ স্বামীৰ মৃত্যুৰ পিছতে নিকিতাই এক বিবৃতি প্ৰকাশ কৰি কৈছিল, “তুমি কৈছিলা, মোক ভাল পাওঁ। কিন্তু সত্যটো হ’ল, দেশ মাতৃক তুমি সকলোতকৈ বেছি ভালপোৱা। মই সঁচাকৈ গৰ্বিত। আমি সকলোৱে তোমাক ভালপাওঁ। তুমি সকলোকে যেনেকৈ ভাল পাইছিলা সেয়া কিন্তু সকলোতকৈ পৃথক আছিল।”
বিবৃতিটোত নিকিতাই আৰু কৈছিল, “যিবোৰ মানুহৰ বাবে তুমি জীৱন উৎসৰ্গা কৰিলা তেওঁলোকৰ সৈতে তোমাৰ পৰিচয়ও নাছিল। তুমি ইমান সাহসী! তোমাক স্বামী হিচাপে পাই মই গৰ্বিত। জীৱনৰ শেষ দিন পৰ্যন্ত মই তোমাক ভাল পাই থাকিম। মোৰ জীৱন তোমাৰ বাবেই উৎসৰ্গা কৰিলো।”
উল্লেখ্য যে স্বামীৰ উদ্দেশ্যে জীৱন উছৰ্গা কৰাৰ বাবেই নিকিতাই সেনা বাহিনীত ভর্তি হোৱাৰ বাবে সিদ্ধান্ত লৈছিল আৰু অৱশেষত স্বামীৰ অসমাপ্ত কাম সম্পূৰ্ণ কৰাৰ সপোন পূৰ হ’ল ছহিদ মেজৰ বিভূতিশংকৰ ধোন্দিয়ালৰ পত্নী নিতিকা কউলৰ।
