একপ্ৰকাৰৰ ৰাজনৈতিক অচলাৱস্থাই গা কৰি উঠা উত্তৰাখণ্ডত অৱশেষত পুষ্কৰ সিং ধামিক নতুন মুখ্যমন্ত্ৰী হিচাবে নিৰ্বাচিত কৰা হৈছে।
৪৫ বছৰীয়া ধামিয়েই হৈছে উত্তৰাখণ্ডৰ সৰ্ব কনিষ্ঠ মুখ্যমন্ত্ৰী।উত্তৰাখণ্ডৰ কুমাওন অঞ্চলৰ খাটিমা সমষ্টিৰ পৰা ধামিয়ে দুবাৰ একেৰাহে বিজেপিৰ বিধায়ক হিচাবে নিৰ্বাচিত হৈছে।
ধামি হৈছে উত্তৰাখণ্ডৰ একাদশগৰাকী মুখ্যমন্ত্ৰী।
কেন্দ্ৰীয় প্ৰতিৰক্ষামন্ত্ৰী ৰাজনাথ সিঙৰ অতি ঘনিষ্ঠ হিচাবে পৰিচিত ধামিয়ে ৰাজ্য খনৰ প্ৰাক্তন মুখ্যমন্ত্ৰী ভগত সিং কোছিয়াৰৰ বিশেষ কৰ্তব্যৰত বিষয়া হিচাবেও এসময়ত কাৰ্যনিৰ্বাহ কৰিছিল।
উল্লেখ্য শুকুৰবাৰে নিশা উত্তৰাখণ্ডৰ মুখ্যমন্ত্ৰী তিৰথ সিং ৰাৱাটে পদত্যাগ কৰিছিল ।তেওঁ চাৰি মাহো মুখ্যমন্ত্ৰী হিচাপে কাৰ্যকাল সম্পূৰ্ণ কৰিব নোৱাৰিলে।
শুকুৰবাৰে নিশা ৰাজভৱনলৈ গৈ তাত ৰাজ্যপাল বেবী ৰাণী মৌৰ্যৰ হাতত নিজৰ পদত্যাগ পত্ৰ দাখিল কৰিছিল।
যোৱা ১০ মাৰ্চত তেওঁ ত্ৰিবেন্দ্ৰ সিং ৰাৱাটৰ সলনি উত্তৰাখণ্ডৰ মুখ্যমন্ত্ৰীৰ আসনত বহিছিল।
শনিবাৰে বিয়লি ৰাজ্যিক বিজেপিৰ মুখ্য কাৰ্যালয়ত বিধায়িনী দলৰ বৈঠক আহ্বান কৰা হয় আৰু আৰু তাতেই ৰাজ্যখনৰ পৰৱৰ্তী মুখ্যমন্ত্ৰী হিচাবে পুষ্কৰ সিং ধামিৰ নাম ঘোষণা কৰা হয়।
কেন্দ্ৰীয় পৰ্যবেক্ষক হিচাপে নৰেন্দ্ৰ সিং তোমৰক ৰাজ্যখনলৈ প্ৰেৰণ কৰা হৈছিল।অহা বছৰ মাৰ্চ মাহত উত্তৰাখণ্ড বিধানসভাৰ ম্যাদ উকলিব। হাতত মাত্ৰ কেইমাহ সময় থকা অৱস্থাত বিজেপিৰ হাতত থকা ৫৬গৰাকী বিধায়কৰ মাজৰ পৰাই নতুন মুখ্যমন্ত্ৰী নিৰ্বাচিত কৰা হয়।
তিৰথ সিং ৰাৱাটৰ ক্ষেত্ৰতো একে সমস্যাৰ উদ্ভৱ হৈছিল।
ত্ৰিবেন্দ্ৰ সিং ৰাৱাটৰ সলনি পাউৰি গাৰোৱালৰ সাংসদ তিৰথক বিজেপিয়ে মুখ্যমন্ত্ৰীৰ আসনত বহুৱাইছিল। নিয়ম মতে ছ’মাহৰ ভিতৰত তেওঁক কোনো বিধানসভা আসনত বিজয়ী কৰাই আনিব লাগে। এই সময়ৰ ম্যাদ অহা ১০ছেপ্টেম্বৰত অন্ত পৰিলেহেঁতেন।
কিন্তু ৰাজ্যখনৰ মুখ্যমন্ত্ৰী বা বিজেপিৰ ফালৰ পৰা তেনে কোনো প্ৰচেষ্টা চলোৱাই নহ’ল। স্বাভাৱিকতে বিজেপিয়ে তিৰথক মুখ্যমন্ত্ৰী ৰাখিব বিচৰা নাছিল বাবেই তেনে কোনো প্ৰচেষ্টাই হাতত লোৱা নাছিল।
