তেওঁ ভাবে যে সমগ্ৰ ইউক্ৰেইনেই ৰাছিয়াৰ। এইদৰেই জনালে ৰাছিয়াৰ ৰাষ্ট্ৰপতি ভ্লাদিমিৰ পুটিনে। সেইদৰে ইউক্ৰেইনৰ অধিক ভূমি দখল কৰাৰো সতৰ্কবাণী দি ৰাখে। শুকুৰবাৰে পুটিনে এই মন্তব্য কৰাৰ পিছতে সৰৱ হৈছে ইউক্ৰেইন।
তেওঁলোকে কয় যে আমেৰিকাই ৰাছিয়া আৰু ইউক্ৰেইনৰ মাজত শান্তি ঘূৰাই আনিবলৈ চেষ্টা কৰা পদক্ষেপৰ প্ৰতি পুটিনৰ ‘ঘৃণা’ তেওঁৰ মন্তব্যত স্পষ্ট। ইউক্ৰেইনৰ অধিক মাটি দখল কৰা আৰু অধিক নাগৰিকক হত্যা কৰাৰ দিশত তেওঁৰ প্ৰৱণতা প্ৰৱল।
ইউক্ৰেইনৰ এক পঞ্চমাংশ ভূমি এতিয়া ৰাছিয়াৰ নিয়ন্ত্ৰণত আছে। ৰাছিয়াই ক্ৰিমিয়াকো দখল কৰিছে। ৰাছিয়াই লুহানস্ক অঞ্চলৰ ৯৯ শতাংশ, ডনেস্ক অঞ্চলৰ ৭০ শতাংশ, জাপ’ৰিজিয়া, খেৰচন অঞ্চল, খাৰ্কিভ, ছুমি আৰু ড্নিপ্ৰ’পেট্ৰ’ভস্ক অঞ্চলৰ কিছু অংশ নিয়ন্ত্ৰণ কৰে।
শুকুৰবাৰে চেণ্ট পিটাৰ্ছবাৰ্গ আন্তঃৰাষ্ট্ৰীয় অৰ্থনৈতিক মঞ্চত পুটিনক সোধা হৈছিল যে ইউক্ৰেইনত ৰাছিয়াই কিমান দূৰলৈ যাব। ইয়াৰ উত্তৰত তেওঁ কয় যে তেওঁ ৰাছিয়ান আৰু ইউক্ৰেইনীয়সকলক একে বুলি গণ্য কৰে। তেওঁৰ ভাষাত “সেই সূত্ৰে গোটেই ইউক্ৰেইনে আমাৰ।”
ইউক্ৰেইনৰ ৰাষ্ট্ৰপতি ভ’ল’ডিমাইৰ জেলেনস্কিয়ে আৰম্ভণিৰে পৰাই পুটিনৰ এই দাবী নাকচ কৰি আহিছে। তেওঁ বাৰে বাৰে দাবী কৰি আহিছে যে ৰাছিয়ান আৰু ইউক্ৰেইনৰ লোক কেতিয়াও একে নহয়। কিয়েভ আৰু পশ্চিমৰ ইয়াৰ “বন্ধুত্বপূৰ্ণ” দেশসমূহেও কয় যে ৰাছিয়াই ক্ৰিমিয়া আৰু ইউক্ৰেইনৰ অঞ্চলসমূহ নিয়ন্ত্ৰণ কৰাৰ দাবী অবৈধ।
পূব ইউক্ৰেইনক আক্ৰমণ কৰাৰ আঠ বছৰ পিছত ২০২২ চনত ৰাছিয়াই সেই দেশখনৰ সৈতে প্ৰত্যক্ষ সংঘাতত লিপ্ত হয়। শুকুৰবাৰে পুটিনে কয় যে তেওঁ ইউক্ৰেইনৰ স্বাধীনতাৰ সন্দৰ্ভত কোনো প্ৰশ্ন উত্থাপন কৰিব নিবিচাৰে। কিন্তু ১৯৯১ চনত ছোভিয়েট ইউনিয়নৰ পতনৰ পিছত যেতিয়া ইউক্ৰেইনে স্বাধীনতা ঘোষণা কৰিছিল, তেতিয়া ই নিৰপেক্ষ হৈ থকাৰ প্ৰতিশ্ৰুতি দিছিল।
পুটিনে দাবী কৰে যে ইউক্ৰেইনে সেই নিৰপেক্ষতা বজাই ৰাখিব পৰা নাই। পুটিনে ইউক্ৰেইনৰ নাটোত যোগদান আৰু আমেৰিকা আৰু পশ্চিম ইউৰোপৰ দেশসমূহৰ সৈতে ইয়াৰ “ঘনিষ্ঠতা”ৰ কথা উল্লেখ কৰা বুলি অনুমান কৰা হৈছে। তেওঁ এটা ফকৰাও উল্লেখ কৰে। তেওঁৰ কথাত ‘’ৰাছিয়াৰ সেনাই য’তেই ভৰি দিয়ে, সেয়াই আমাৰ।’
ইউক্ৰেইনৰ বৈদেশিক মন্ত্ৰী এণ্ড্ৰি ছিবিহাই টুইটাৰত লিখিছে, “পুটিনৰ এই মন্তব্যই শান্তি পুনৰুদ্ধাৰৰ বাবে আমেৰিকাৰ প্ৰচেষ্টাৰ প্ৰতি অৱজ্ঞা প্ৰকাশ কৰিছে।” তেওঁ লগতে কয় যে আমেৰিকা আৰু বিশ্বৰ অন্যান্য দেশসমূহে যুদ্ধ বন্ধ কৰিবলৈ চেষ্টা কৰাৰ সময়তে ৰাছিয়াই ইউক্ৰেইনৰ অধিক ভূখণ্ড দখল কৰি ইউক্ৰেইনৰ লোকক হত্যা কৰাৰ পদক্ষেপ গ্ৰহণ কৰিছে। জেলেনস্কিয়ে ভিডিঅ’ বাৰ্তাযোগে কয় যে ৰাছিয়াই আচলতে যুদ্ধ অব্যাহত ৰাখিব বিচাৰে।
