অসমত শীঘ্ৰেই প্ৰবৰ্তন কৰা হ’ব QR ক’ড সংলগ্ন থকা বাহন পঞ্জীয়ন প্ৰমাণপত্ৰ (আৰচি) আৰু ড্ৰাইভিং লাইচেঞ্চ। ৰাজ্যৰ পৰিবহন বিভাগে ইতিমধ্যে এই সন্দৰ্ভত সিদ্ধান্ত গ্ৰহণ কৰিছে বুলি ঘোষণা কৰিছে।
পৰিবহণ বিভাগৰ সচিব আদিল খানে জানিবলৈ দিয়া মতে পথ পৰিবহণ মন্ত্ৰালয়ৰ অধিসূচনা অনুসৰি প্ৰচলিত চিপ-আধাৰিত স্মাৰ্ট কাৰ্ডৰ সলনি QR ক’ড সংলগ্ন পঞ্জীয়ন প্ৰমাণপত্ৰ আৰু ড্ৰাইভিং লাইচেঞ্চ কাৰ্ড জাৰী কৰাৰ বাবে এক নতুন ব্যৱস্থা প্ৰবৰ্তন কৰা হৈছে।
খানে লগতে কয় যে এই নতুন ব্যৱস্থা প্ৰবৰ্তনৰ পিছত কাগজপত্ৰ দাখিল, মাচুল পৰিশোধ আৰু মুদ্ৰিত ড্ৰাইভিং লাইচেঞ্চ/আৰচি সংগ্ৰহ কৰাৰ বাবে কোনো ব্যক্তিয়ে এতিয়া জিলা পৰিবহন কাৰ্যালয়লৈ বাৰে বাৰে গৈ থকাৰ প্ৰয়োজন নাথাকিব।
ৰাজহুৱা পৰিবহণ আৰু ব্যক্তিগত বাহন- দুয়োটাৰ পঞ্জীয়নৰ বাবে পৰিবহন বিভাগৰ দ্বাৰা অটোমোবাইল ডিলাৰক পঞ্জীয়ন কৰ্তৃপক্ষৰ ক্ষমতা প্ৰদান কৰা হৈছে আৰু ডিলাৰসমূহে আধাৰ প্ৰমাণীকৰণৰ জৰিয়তে গ্ৰাহকসকলক বাহন বিক্ৰী কৰাৰ সময়ত আৰ.চি প্ৰিণ্ট কৰিব পাৰে।
এতিয়া QR ক’ড সংলগ্ন নতুন আৰ.চিত গিলোচ পেটাৰ্ণ, মাইক্ৰ’ লাইন, ৱাটাৰমাৰ্ক, আৰু হলোগ্ৰামৰ অতিৰিক্ত সুৰক্ষা সুবিধা যোগ দিয়া হ’ব বুলি পৰিবহণ সচিব আদিল খানে কয়।
তেওঁ লগতে উল্লেখ কৰা মতে এজন ব্যক্তিয়ে ড্ৰাইভিং পৰীক্ষাত উত্তীৰ্ণ হোৱাৰ পাছত ড্ৰাইভিং লাইচেঞ্চ অনাৰ বাবে এতিয়া ডিটিঅ’ কাৰ্যালয়লৈ যোৱাৰ প্ৰয়োজন নাথাকিব, তিনিৰ পৰা পাঁচ দিনৰ ভিতৰত ডাকযোগে ব্যক্তি গৰাকীলৈ লাইচেঞ্চ প্ৰেৰণ কৰা হ’ব।
খানে লগতে কয় যে QR ক’ড সংলগ্ন ড্ৰাইভিং লাইচেঞ্চৰ ফলত যিকোনো ট্ৰেফিক কৰ্মচাৰী বা আইন প্ৰৱৰ্তনকাৰী সংস্থাই QR ক’ড স্কেন কৰি লাইচেঞ্চৰ পৰীক্ষণ সহজে কৰিব পাৰিব। লগতে ইয়াৰ দ্বাৰা নকলৰ সম্ভাৱনা নাইকিয়া হ’ব বুলিও তেওঁ মন্তব্য কৰে।
