ৰাজ্য জোকাৰি যোৱা অসম আৰক্ষীৰ নিযুক্তি কেলেংকাৰি সন্দৰ্ভত আজি আৰক্ষী সঞ্চালক প্ৰধান ভাস্কৰজ্যোতি মহন্তই এক সংবাদমেলৰ আয়োজন কৰে।
সংবাদমেলত আৰক্ষী মহাপৰিদৰ্শক (চি আই ডি) সুৰেন্দ্ৰ সিঙৰ লগতে আৰক্ষী আয়ুক্ত প্ৰসাদ গুপ্তাও উপস্থিত থাকে।
প্ৰশ্ন কাকত ফাদিল সন্দৰ্ভত মন্তব্য কৰি আৰক্ষী মহাপৰিদৰ্শক (চি আই ডি) সুৰেন্দ্ৰ সিঙে কয় যে দিবন ডেকা আৰু পি কে দত্তক গ্ৰেপ্তাৰ কৰাৰ পিছতহে সমগ্ৰ ঘটনাটোৰ তথ্য উদ্ঘাটন কৰিব পৰা যাব।
এতিয়ালৈকে এই ঘটনা সন্দৰ্ভত চি আই ডিয়ে ৪ জন লোকক গ্ৰেপ্তাৰ কৰা বুলি তেওঁ সদৰী কৰে।
সিঙে লগতে কয় যে বিভিন্ন জিলাত আৰক্ষীয়ে অভিযান অব্যাহত ৰাখিছে।পি কে দত্তৰ হোটেলৰ একোটা কোঠাত দুজনকৈ পৰীক্ষাৰ্থী আছিল আৰু তেওঁলোকে ২০ ছেপ্তেম্বৰত তাৰ পৰা ওলাই গৈছিল।
সংবাদমেলত আৰক্ষী সঞ্চালক প্ৰধান ভাস্কৰজ্যোতি মহন্তই সমগ্ৰ ঘটনাটোৰ তদন্ত প্ৰক্ৰিয়াত সংবাদ মাধ্যমৰ পৰাও ইতিবাচক সঁহাৰি কামনা কৰে।
তেওঁ অসম আৰক্ষীয়ে বিভিন্ন দিশত পাৰদৰ্শীতাৰ প্ৰমাম দিবলৈ সক্ষম হোৱা বুলিও প্ৰকাশ কৰে।
ইপিনে আৰক্ষীৰ নিযুক্তি কেলেংকাৰিত জৰিত বুলি অভিযোগ উঠা দিবন ডেকাক চি আই ডিয়ে হাততে পায়ো এৰি দিয়াৰ বিষয়টোকলৈ বিভিন্ন জনৰ মনত সন্দেহৰ উদ্ৰেক ঘটাইছে।
পৰীক্ষা আছিল আৰক্ষীৰ , প্ৰশ্ন কাকত প্ৰস্তুত কৰা হৈছিল আৰক্ষীৰ তত্বাৱধানত,ফাদিলো কৰিছিল প্ৰাক্তন আৰক্ষী বিষয়াই আৰু এতিয়া অভিযোগৰো তদন্ত কৰিছে আৰক্ষীয়েই।
গতিকে এই তদন্তৰ ফলাফল কি হ’ব তাকে লৈয়ো এতিয়া বিভিন্ন জনে প্ৰশ্ন উত্থাপন কৰিবলৈ লৈছে।
মূৰকত গৈ সমগ্ৰ তদন্তই ফুটুকাৰ ফেনত পৰিণত হব পাৰে বুলি বহুতে আশংকা ব্যক্ত কৰিছে।
বহুতৰে সন্দেহ—ৰৌ বৰালি সাৰি যাব, জালত পৰিব কেৱল পুঠি খলিহনা।
