ৰাফাল বিমান কেতিয়াবাই ক্ৰয় কৰিব লাগিছিল যদিও কংগ্ৰেছে সেয়া নকৰিলে বুলি অভিযোগ কৰিছে গুৱাহাটী লোকসভা সমষ্টিৰ সাংসদ কুইন ওজাই।
আজি বিজেপিয়ে উলিওৱা এটা প্ৰতিবাদী কাৰ্য্যসূচীত ভাগ লৈ সাংসদগৰাকীয়ে ৰাফাল বিমান ক্ৰয় সম্পৰ্কীয় বিতৰ্ক আৰু গোচৰৰ বাবে কংগ্ৰেছৰ সাংসদ ৰাহুল গান্ধীক সমালোচনা কৰে।
গোচৰটোত উচ্চতম ন্যায়ালয়ে চৰকাৰক ক্লীনশ্বীট দিয়াৰ পাছত কংগ্ৰেছ সাংসদ ৰাহুল গান্ধীক দেশবাসীৰ ওচৰত ক্ষমা খোজাৰ দাবীৰে আজি বিজেপিয়ে প্ৰতিবাদ কাৰ্য্যসূচী লৈছিল। সমগ্ৰ দেশৰ সমান্তৰালভাৱে ৰাজ্যিক বিজেপিয়ে এই কাৰ্য্যসূচী লৈ ভিন্ন প্ৰান্তত আৰু গুৱাহাটীত প্ৰতিবাদ সাব্যস্ত কৰে।
প্ৰতিবাদত ভাগ লোৱা ওজাৰ মন্তব্য, “ৰাহুল গান্ধীয়ে দিয়া আবেদন উচ্চতম ন্যায়ালয়ে খাৰিজ কৰিলে। এই কথাই কংগ্ৰেছ আৰু ৰাহুল গান্ধীৰ মিথ্যাচাৰ প্ৰমাণিত কৰিলে। কংগ্ৰেছে দেশৰ সুৰক্ষাৰ কথা চিন্তা কৰা নাছিল। দেশৰ সুৰক্ষাৰ স্বাৰ্থত বহু পূৰ্বেই ৰাফেল বিমানখন ক্ৰয় কৰিব লাগিছিল যদিও কংগ্ৰেছে নকৰিলে।”
ৰাহুল গান্ধীক সকীয়াই কুইন ওজাই কয়, “ৰাহুল গান্ধী সাৱধান, ভৱিষ্যতে এনে মন্তব্য দিয়াৰ পৰা বিৰত থাকিব, নহ’লে ইয়াৰ পৰিণাম ভয়াবহ হ’ব।”
বিজেপিৰ নেতা-কৰ্মীসকলে গুৱাহাটীৰ খ্ৰীষ্টান বস্তিস্থিত জিলা বিজেপিৰ কাৰ্য্যালয়ৰ পৰা এ বি চিস্থিত কংগ্ৰেছৰ কাৰ্য্যালয় ৰাজীৱ ভৱনলৈ উলিয়ায় প্ৰতিবাদ।
কিন্তু এটা গুৰুত্বপূৰ্ণ বিষয়ত প্ৰতিবাদী কাৰ্য্যসূচী লোৱা বিজেপিৰ নেতা-কৰ্মীসকলে প্ৰতিবাদস্থলীক পৰিণত কৰে আমোদজনক দৃশ্যৰ সমাহাৰত।
ৰাহুল গান্ধী গ’ বেক ধ্বনি দি থকাৰ সমান্তৰালভাৱে বিজেপিৰ নেতা-কৰ্মীসকল মুখত এমোকোৰা হাঁহি লৈ ছেলফি উঠাত ব্যস্ত হোৱাও দেখা গ’ল।
আনহাতে, পূৰ্বৰে পৰা পৰিকল্পনা কৰি থোৱাৰ দৰে আৰক্ষী আৰু প্ৰতিবাদকাৰীৰ মাজত বেৰিকেইড ঠেলাঠেলিৰ এখন নাটক দেখা পোৱা গ’ল মহানগৰীৰ প্ৰতিবাদস্থলীত।
আনকি কৰ্তব্যৰত আৰক্ষীয়েও মুখত এমোকোৰা হাঁহি লৈয়ে বেৰিকেইড ঠেলাৰ অভিনয় কৰি গ’ল।
তাৰ মাজতে দেখা গ’ল কেইগৰাকীমান মহিলা প্ৰতিবাদকাৰীক আৰক্ষী জোৱানসকলৰ সৈতে মাজে মাজে ধেমালীয়া কথা পতাৰ দৃশ্য।
মুঠতে মহানগৰীৰ ৰাজপথত আৰক্ষী আৰু প্ৰতিবাদকাৰীৰ মাজত পূৰ্বে নেদেখা ধৰণৰ মিলা-প্ৰীতিয়ে বিৰাজ কৰা দেখা যায়। সাধাৰণতে প্ৰতিবাদকাৰীয়ে অপ্ৰীতিকৰ পৰিস্থিতিৰ সৃষ্টি কৰিলে আৰক্ষীয়ে কন্দুৱা গেছ প্ৰয়োগ কৰাৰ লগতে লাঠিচালনা কৰি গ্ৰেপ্তাৰ কৰি লৈ যোৱাৰ নজিৰেই বেছি।
শেষ দৃশ্য হিচাপে দেখা গ’ল- আৰক্ষীক বাই বাই দি প্ৰতিবাদকাৰী ঘৰমুৱা হোৱাৰ বিৰল উদাহৰণ।
