তৃতীয়বাৰৰ বাবে প্ৰধানমন্ত্ৰী হিচাপে শপত লোৱাৰ পূৰ্বে ৰাহুল গান্ধীয়ে নৰেন্দ্ৰ মোডীক যথেষ্ট চাপত পেলাবলৈ চেষ্টা কৰিলে। নিঃসন্দেহে এই চাপ সৃষ্টিৰ যুঁজত কংগ্ৰেছ অকলশৰীয়া নহয়। সামূহিকভাৱে সমগ্ৰ ইণ্ডিয়া মিত্ৰজোঁটে কঁকালত টঙালি বান্ধিছে।
বৃহস্পতিবাৰে সংবাদমেল সম্বোধন কৰি ৰাহুল গান্ধীয়ে কয় যে এক্সিট প’লৰ জৰিয়তে দেশৰ ৫ কোটি বিনিয়োগকাৰীৰ পৰা ৩০ লাখ কোটি টকা লুটি লোৱা হৈছে। সেই লুণ্ঠনৰ আঁৰত কোন? নিৰ্বাচনৰ ফলাফলৰ পূৰ্বে প্ৰধানমন্ত্ৰী নৰেন্দ্ৰ মোডী আৰু গৃহমন্ত্ৰী অমিত শ্বাহে শ্বেয়াৰ বজাৰত বিনিয়োগ কৰাৰ পৰামৰ্শ কিয় দিছিল? মানুহক বিনিয়োগ কৰিবলৈ পৰামৰ্শ দিয়াটো প্ৰধানমন্ত্ৰীৰ কাম নেকি?
কোন সেই বিদেশী বিনিয়োগকাৰী যিয়ে শ্বেয়াৰ বজাৰত মাত্ৰ ৫ কোটি টকা বিনিয়োগ কৰি মাত্ৰ এদিনতে বিপুল মুনাফা লুটি নিলে। সেই বিদেশী বিনিয়োগ কোম্পানীৰ সৈতে বিজেপিৰ নিৰ্দেশিত এক্সিট প’ল কোম্পানীটোৰ মাজত কি সম্পৰ্ক?
লগতে পঢ়কঃ নৰেন্দ্ৰ মোদীৰ সন্মুখত নীতিশ কুমাৰৰ প্ৰথম দাবী; ‘পুনৰ বিবেচনা কৰা হওক অগ্নিবীৰ আঁচনি’
ৰাহুলে কয় যে ৩০ লাখ কোটি টকাৰ এই শ্বেয়াৰ বজাৰ কেলেংকাৰিৰ বাবে যুটীয়া সংসদীয় সমিতিৰ জৰিয়তে তদন্ত বিচাৰো। এই কেলেংকাৰিৰ পৰা কোনে লাভৱান হৈছে, এই কেলেংকাৰী কেনেকৈ কৰা হৈছে, সেইয়া বিচাৰি উলিয়াব লাগিব।
এইবাৰ লোকসভা নিৰ্বাচনৰ সময়ত অমিত শ্বাহ আৰু নৰেন্দ্ৰ মোদীয়ে এনডিটিভিত সাংবাদিক সঞ্জয় পুগলিয়াক সাক্ষাৎকাৰ দিয়ে। এনডিটিভি এতিয়া ক্ৰয় কৰিছে আদানি গ্ৰুপে। হিণ্ডেনবাৰ্গৰ প্ৰতিবেদনৰ পিছত আদানি গ্ৰুপৰ বিৰুদ্ধে ছেবিৰ তদন্ত চলি আছে।
সঞ্জয় পুগলিয়াক দিয়া এক সাক্ষাৎকাৰত অমিত শ্বাহে কয় যে, “৪ জুনৰ আগতে শ্বেয়াৰ কিনি লওক, ই শ্বুট আপ হ’ব”। অৰ্থাৎ হুৰহুৰাই দাম বাঢ়িব। পুনৰ প্ৰধানমন্ত্ৰীয়ে সঞ্জয় পুগলিয়াক দিয়া সাক্ষাৎকাৰতে কয় যে ৪ জুনৰ নিৰ্বাচনৰ ফলাফল ঘোষণাৰ পিছত শ্বেয়াৰ বজাৰ ইমান আকাশলংঘী হ’ব যে তেওঁলোকৰ সকলো প্ৰগ্ৰেমিং বিফল হ’ব।
ৰাহুলৰ বক্তব্য হ’ল যে প্ৰধানমন্ত্ৰী আৰু অমিত শ্বাহে আদানী গ্ৰুপৰ চেনেলত দিয়া সাক্ষাৎকাৰত কিয় এই কথা ক’লে? কিয় ৫ কোটি ঘৰুৱা বিনিয়োগকাৰীক উচটনি দিলে?
ৰাহুলৰ কাষত বহি কংগ্ৰেছ নেতা জয়ৰাম ৰমেশে কয়যে কালক্ৰম বুজিবলৈ চেষ্টা কৰক। প্ৰথমে মোডী আৰু অমিত শ্বাহে শ্বেয়াৰ বজাৰত বিনিয়োগ কৰিবলৈ ক’লে। ইয়াৰ পিছত এক্সিট প’লত বিজেপি উজলি উঠা দেখা গ’ল। ইয়াৰ পিছত এদিনৰ ভিতৰতে কেইবাটাও কোম্পানীয়ে ব্যৱসায় কৰি বিপুল পৰিমাণৰ ধন লুটি নিলে। আৰু দুখীয়া বিনিয়োগকাৰীসকলক কাঙাল কৰি দিলে। ইয়াত মুঠ ৩০ লাখ কোটি টকাৰ কেলেংকাৰী কৰা হৈছে।
The common people of India lost Rs 30 lakh crore in the stock market on June 4. We ask:
1. Why did the PM and HM give specific investment advice to the 5 crore families investing in the stock markets? Is it their job to give investment advice to the people?
2. Why both… pic.twitter.com/lMCkMGBHBa
— Congress (@INCIndia) June 6, 2024
তৃণমূলৰ সাংসদ চাকেট গোখেলেও একে অভিযোগ উত্থাপন কৰি ছেবিলৈ পত্ৰ লিখিছে। তেওঁৰ মতে, এক্সিছ মাই ইণ্ডিয়াই ১ জুনত ঘোষণা কৰিছিল যে এন ডি এ ৪০০ত উপনীত হ’ব পাৰে। বংগত বিজেপিয়ে লাভ কৰিব পাৰে ২৬ৰ পৰা ৩১খন আসন। শনিবাৰে এক্সিট প’লৰ ফলাফল প্ৰকাশ পোৱাৰ পিছত সোমবাৰে শ্বেয়াৰ বজাৰত বৃহৎ উত্থান দেখা গ’ল। তৃণমূলৰ প্ৰশ্ন হ’ল, সেইদিনা এক্সিট প’লৰ সহায়ত কোনে মুনাফা লুটিলে? ইয়াৰ পিছত ৰিজাল্ট ওলোৱাৰ দিনা শ্বৰ্ট চেল কৰি পুনৰ মুনাফা লুটিলে? চাকেটে কয়, এক্সিছ মাই ইণ্ডিয়াৰ অন্যতম ক্লায়েণ্ট হৈছে বিজেপি। গতিকে আমি চাব লাগিব এই চক্ৰত কোন কাৰ সৈতে জড়িত।
কৌশলগতভাৱে কংগ্ৰেছে এতিয়া যুটীয়া সংসদীয় সমিতি গঠনৰ দাবী উত্থাপন কৰিছে। যাৰ স্পষ্ট অৰ্থ হ’ল প্ৰথম দিনাৰ পৰাই মসৃণ নহ’ব সংসদ পৰিচালনা। বিৰোধীয়ে সংসদ অচল কৰি ৰাখিব। ঠিক যেনেকৈ বিজেপিয়ে ২জি স্পেকট্ৰম গোচৰত সংসদ স্থৱিৰ কৰি ৰাখিছিল।
